ପାଟନା, ୪ା୩: ବିହାର ସମସ୍ତିପୁର ଜିଲାରେ ଏକ ବିବାହ ଉତ୍ସବ ଶୋକାକୁଳ ପରିବେଶରେ ପରିଣତ ହୋଇଛି। ଗତ ବୁଧବାର ବିବାହ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଥିଲା। ବରକନ୍ୟା ପରସ୍ପରକୁ ବରଣମାଳା ପିନ୍ଧାଇ ସାରିଥିଲେ। କିଛି ସମୟ ପରେ କନ୍ୟା ବିଦା ପର୍ବ ଆରମ୍ଭ ହୋଇଥାନ୍ତା। ଏହା ପୂର୍ବରୁ ସେଠାରେ ଘଟିଲା ଅଘଟଣ। ବିବାହ ଉତ୍ସବରେ ବାଜୁଥିବା ଡିଜେ ବର ସୁରେନ୍ଦ୍ର କୁମାରଙ୍କ ପାଇଁ କାଳ ହେଲା। ଏହାର ଉଚ୍ଚ ଶବ୍ଦରେ ସୁରେନ୍ଦ୍ର କୁମାର ଅସୁସ୍ଥ ଅନୁଭବ କରିବା ସହ ଷ୍ଟେଜ୍ ଉପରେ ଟଳିପଡ଼ିଥିଲେ। ତାଙ୍କୁ ସଙ୍ଗେ ସଙ୍ଗେ ସ୍ଥାନୀୟ ହସ୍ପିଟାଲ ଓ ପରେ ସୀତାମାଢ଼ିକୁ ସ୍ଥାନାନ୍ତର କରାଯାଉଥିବାବେଳେ ବାଟରେ ତାଙ୍କର ମୃତ୍ୟୁ ଘଟିଥିଲା। ଡିଜେ ଶବ୍ଦରେ ଅସୁସ୍ଥ ଅନୁଭବ କରୁଥିବା ନେଇ ସୁରେନ୍ଦ୍ର ବାରମ୍ବାର ଅଭିଯୋଗ କରିଥିଲେ ମଧ୍ୟ ତାଙ୍କ କଥା କେହି ଶୁଣି ନ ଥିଲେ। ଡିଜେ ବଜାଇବା ଉପରେ କଟକଣା ରହିଥିଲେ ମଧ୍ୟ ଏହାକୁ କଡ଼ାକଡ଼ି ପାଳନ କରାଯାଉ ନ ଥିବାରୁ ବିଭିନ୍ନ ସମୟରେ ଅପ୍ରୀତିକର ସ୍ଥିତି ଉପୁଜୁଛି। ଡିଜେ ସମ୍ପୂର୍ଣ୍ଣ ନିଷେଧ କରିବା ପାଇଁ ସାମାଜିକ କର୍ମୀ ଡ. ରାଜୀବ କୁମାର ମିଶ୍ରା ପ୍ରଶାସନ ନିକଟରେ ଦାବି କରିଛନ୍ତି।
