ଚେନ୍ନାଇ,୧୫।୧: ବିଧାନସଭାରେ ସରକାରୀ ଭାଷଣ ନ ପଢ଼ିବା ନେଇ ତାମିଲନାଡୁ ରାଜ୍ୟପାଳ ଆର୍.ଏନ୍. ରବି ଏବଂ ଶାସକ ଦଳ ଡିଏମ୍କେ ମଧ୍ୟରେ ବିବାଦ ଲାଗିରହିଥିବାବେଳେ ଜଣେ ଦଳୀୟ କର୍ମୀ ତାଙ୍କୁ ଖୋଲାଖୋଲି ଧମକ ଦେଇଛନ୍ତି। ଯଦି ରାଜ୍ୟପାଳ ବି.ଆର୍. ଆମ୍ବେଡକରଙ୍କ ନାଁ ନ ନିଅନ୍ତି, ତେବେ ସେ କଶ୍ମୀରୀ ଚାଲିଯିବା ଉଚିତ, ଯେଉଁଠି ଆତଙ୍କବାଦୀମାନେ ତାଙ୍କୁ ହତ୍ୟା କରିବେ ବୋଲି ଡିଏମ୍କେ କର୍ମୀ ଶିବାଜୀ କ୍ରିଷ୍ଣମୂର୍ତ୍ତି କହିଛନ୍ତି।
ତାମିଲନାଡୁରେ ସେହି ଲୋକ ଯଦି ଆମ ପୂର୍ବଜ ତଥା ଭାରତୀୟ ସମ୍ବିଧାନର ପ୍ରଣେତା ଆମ୍ବେଡ୍କରଙ୍କ ନାଁ ନେବାକୁ ରାଜି ନୁହନ୍ତି, ତେବେ ତାଙ୍କୁ ଚପଲରେ ପିଟିବା ଅଧିକାର ମୋର ରହିଛି କି ବୋଲି କ୍ରିଷ୍ଣମୂର୍ତ୍ତି ପ୍ରଶ୍ନ କରିଛନ୍ତି। ସେ ନିଜେ କଶ୍ମୀର ନ ଗଲେ ଆମେ ଆତଙ୍କବାଦୀ ପଠାଇବୁ ବୋଲି ଡିଏମ୍କେ କର୍ମୀ କହିଛନ୍ତି। ଏହା କ୍ରିଷ୍ଣମୂର୍ତ୍ତିଙ୍କର ବ୍ୟକ୍ତିଗତ ମନ୍ତବ୍ୟ କହି ଡିଏମ୍କେ ଏଥିରୁ ନିଜକୁ ଦୂରେଇ ରଖିଛି। ଡିଏମ୍କେ କର୍ମୀଙ୍କ ଏଭଳି ମନ୍ତବ୍ୟକୁ ଭାଜପା ନିନ୍ଦା କରିବା ସହ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛି। ଆତଙ୍କବାଦୀଙ୍କ ସହ ଡିଏମ୍କେର ସମ୍ପର୍କ ଥାଇପାରେ ବୋଲି ଭାଜପା ସନ୍ଦେହ ପ୍ରକଟ କରିଛି। ତୁରନ୍ତ କ୍ରିଷ୍ଣମୂର୍ତ୍ତିଙ୍କୁ ଗିରଫ କରାଯାଉ ବୋଲି ଭାଜପା ରାଜ୍ୟ ଉପସଭାପତି ନାରାୟଣନ ତ୍ରିପାଠୀ ଦାବି କରିଛନ୍ତି।
ଇତିମଧ୍ୟରେ ରାଜ୍ୟପାଳଙ୍କ କାର୍ଯ୍ୟାଳୟ କ୍ରିଷ୍ଣମୂର୍ତ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ଚେନ୍ନାଇ ଥାନାରେ ଏତଲା ଦାଏର କରିଛି। ରାଜ୍ୟପାଳଙ୍କ ଉପସଚିବ ଏହି ଏତଲା ଦାଏର କରିଛନ୍ତି। ଏହି ଘଟଣା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଲାଗି ରାଜ୍ୟ ଭାଜପା ତାମିଲନାଡୁ ପୋଲିସ ମହାନିର୍ଦ୍ଦେଶକଙ୍କୁ ପତ୍ର ଲେଖିଛି। ଡିଏମ୍କେ ସବୁବେଳେ ତିରସ୍କାର ରାଜନୀତିରେ ସମ୍ପୃକ୍ତ ରହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ଉଚ୍ଚ ସାମ୍ବିଧାନିକ ପଦବୀରେ ଥିବା ନେତାଙ୍କୁ ଗାଳି କରିଥାନ୍ତି। ସ୍ଥାନୀୟ ଡିଏମ୍କେ ନେତାମାନେ ଥାନାକୁ ସେମାନଙ୍କ କାର୍ଯ୍ୟାଳୟ ଭଳି ବ୍ୟବହାର କରୁଥିବା ଭାଜପା ରାଜ୍ୟ ସଭାପତି କେ. ଆନ୍ନାମଲାଇ କହିଛନ୍ତି।
