ଭବାନୀପାଟଣା,୨୯ା୧୨(ସ୍ବ.ପ୍ର.): କଳାହାଣ୍ଡି ଜିଲାକୁ ଗୁରୁବାର ଦିନିକିଆ ଗସ୍ତରେ ଆସିଛନ୍ତି ଓଡ଼ିଶା ରାଜ୍ୟପାଳ ପ୍ରଫେସର ଗଣେଶୀ ଲାଲ୍। ଆଜି ପୂର୍ବଳହ୍ନରେ ରାଜ୍ୟପାଳ ଭବାନୀପାଟଣାସ୍ଥିତ କଳାହାଣ୍ଡି ବିଶବିଦ୍ୟାଳୟରେ ନୂତନ ଏକାଡେମୀ କୋଠା ଓ ଲାଇବ୍ରେରୀ କୋଠା ଉଦ୍ଘାଟନ କରିଥିଲେ। ପରେ ବିଶ୍ୱବିଦ୍ୟାଳୟ ପରିସରରେ ଅନୁଷ୍ଠିତ ଉଦ୍ଘାଟନୀ ସମାରୋହରେ ସେ ଯୋଗଦେଇ ଯେଉଁ ହାଣ୍ଡିରେ ପ୍ରଭୁ କାଳିଆଙ୍କ ପାଇଁ ଭାତ ରନ୍ଧା ଯାଏ ତାହା ହେଉଛି କଳାହାଣ୍ଡି ବୋଲି କହିଥିଲେ। ବିଶ୍ୱରେ ଭାରତର ସଂସ୍କୃତି ଓ ପରମ୍ପରା ସବୁଠି ନିଆରା। ସେହିପରି ମହାଭାରତ,ରାମାୟଣଠାରୁ ଆରମ୍ଭ କରି ବର୍ତ୍ତମାନର ଆଧୁନିକ ଭାରତର ଅଗ୍ରଗତି ଉପରେ ତୁଳନାତ୍ମକ ଶୈଳୀରେ ବିଶ୍ଳେଷଣ କରିଥିଲେ। ଗୁରୁ ବିନା ଶିକ୍ଷା ଅସମ୍ଭବ। ତେଣୁ ପୌରାଣିକ ଯୁଗଠୁ ଆରମ୍ଭ କରି ବର୍ତ୍ତମାନ ପର୍ଯ୍ୟନ୍ତ ଗୁରୁର ସର୍ବଦା ମର୍ଯ୍ୟାଦା ରହିଛି। ଛାତ୍ରୀଛାତ୍ର ଜଗନ୍ନାଥ ସଂସ୍କୃତିର ଅନୁପ୍ରାଣୀତ ହୋଇ ପ୍ରଭୁ ଜଗନ୍ନାଥଙ୍କ ଭଳି ତେଜିୟାନ ହେବା ପାଇଁ ଆହ୍ବାନ ଦେଇଥିଲେ। ଭାରତରେ ଆଜି ଓଡ଼ିଶା ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିପାରିଛି। ଏଠାକାର ଜଣେ ଗ୍ରାମାଞ୍ଚଳର ଆଦିବାସୀ ମହିଳା ଦେଶର ସର୍ବୋଚ୍ଚ ପଦବୀ ରାଷ୍ଟ୍ରପତି ହୋଇଥିବା ବେଳେ ଶିକ୍ଷାମନ୍ତ୍ରୀ, ଆର୍ବିଆଇ ଗଭର୍ନର, ସିଏଜି ଭଳି ଗିରୁତ୍ୱପୂର୍ଣ୍ଣ ପଦବୀରେ ରହି ଓଡ଼ିଶାକୁ ଗୌରବାନ୍ବିତ କରିଛନ୍ତି ବୋଲି ତାଙ୍କ ଅଭିଭାଷଣରେ କହିଥିଲେ।
କଳାହାଣ୍ଡି ବିଶବିଦ୍ୟାଳୟ କୁଳପତି ପ୍ରଫେସର ସଞ୍ଜୟ ଶତପଥୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ କଳାହାଣ୍ଡି ଜିଲାପାଳ ପି.ଅନ୍ବେଷା ରେଡ୍ଡୀ,ଏସ୍ପି ଅଭିଲାଷ ଜି,ରେଜିଷ୍ଟାର ପୀତାମ୍ବର ଭୋଇ ପ୍ରମୁଖ ଯୋଗଦେଇଥିଲେ।
