ନୂଆଦିଲ୍ଲୀ, ୨।୯: ଦେଶରେ କରୋନା ମହାମାରୀ ସଂକ୍ରମଣ ବଢ଼ିଚାଲିଛି। ଏହାକୁ ଦୃଷ୍ଟିରେ ରଖି ସେପ୍ଟେମ୍ବର ୧୪ରୁ ଅକ୍ଟୋବର ୧ ପର୍ଯ୍ୟନ୍ତ ହେବାକୁ ଥିବା ସଂସଦର ମୌସୁମୀ ଅଧିବେଶନରେ ପ୍ରଶ୍ନକାଳ ନ ରଖାଯିବାକୁ ନିଷ୍ପତ୍ତି ଗ୍ରହଣ କରାଯାଇଛି। ତେବେ ଏହାକୁ ନେଇ କଂଗ୍ରେସ ଏବଂ ତୃଣମୂଳ କଂଗ୍ରେସ ପକ୍ଷରୁ ବିରୋଧ କରାଯାଇଛି। ବିରୋଧୀ ଦଳ ଏନେଇ ସରକାରଙ୍କୁ ଘେରିବା ଆରମ୍ଭ କରିଛନ୍ତି। କଂଗ୍ରେସ ଏମ୍ପି ଶଶି ଥରୁର୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଟାର୍ଗେଟ କରିଛନ୍ତି। ଶଶି କହିଛନ୍ତି ସରକାର ରବର ଷ୍ଟାମ୍ପ୍ ଭଳି କାମ କରିବାକୁ ଚାହୁଁଛନ୍ତି। କରୋନା ମହାମାରୀ ସଙ୍କଟରେ ସୁରକ୍ଷାର କଥା କହି ସରକାର ଗଣତାନ୍ତ୍ରିକ ଅଧିକାରକୁ କ୍ଷୂର୍ଣ୍ଣ କରିବାକୁ ଉଦ୍ୟମ କରୁଛନ୍ତି। ବିରୋଧୀ ଦଳ ସବୁବେଳେ ଜଗୁଆଳି ଭଳି କାମ କରିଥାନ୍ତି। ତେବେ ଜାଣି ଶୁଣି ସରକାର ଏଭଳି କରୁଥିବା ଶଶି ଅଭିଯୋଗ କରିଛନ୍ତି। ଶଶି ଟୁଇଟ୍ କରି କହିଛନ୍ତି ଯେ କରୋନା ମହାମାରୀକୁ ଅସ୍ତ୍ର କରି ସରକାର ଦେଶରୁ ଗଣତନ୍ତ୍ରର ଲୋପ କରିବାର ମସୁଧା କରୁଛନ୍ତି। ସରକାର ସଂସଦକୁ ଏକ ନୋଟିସ୍ ବୋର୍ଡ ଭଳି ରୂପ ଦେବାକୁ ଷଡ଼ଯନ୍ତ୍ର କରୁଥିବା ଶଶି କହିଛନ୍ତି।
