ନୂଆଦିଲ୍ଲୀ,୨୪ ।୯: ୟୁଜର୍ସଙ୍କ ଗୋପନୀୟତାକୁ ନେଇ ସାରା ବିଶ୍ୱରେ ସମାଲୋଚନା ହେବା ପରେ ଏବେ ଗୁଗଲ ସର୍ଚ୍ଚରୁ ବ୍ୟକ୍ତିଗତ ସୂଚନା ହଟାଇବାକୁ ଗୁଗଲ ଏକ ନୂଆ ଟୁଲ ଆଣିଛି । ‘ରିଜଲ୍ଟସ ଏବାଉଟ ୟୁ’ ନାମକ ଏହି ଟୁଲ ଜରିଆରେ ୟୁଜର୍ସ ସିଧାସଳଖ ଗୁଗଲରୁ ମୋବାଇଲ ନମ୍ବର, ଇମେଲ ଓ ଘରର ଠିକଣା ସମେତ ବ୍ୟକ୍ତିଗତ ପରଚିୟ ଯୋଗ୍ୟ ସୂଚନା(ପିଆଇଆଇ) ହଟାଇବାକୁ ଅନୁରୋଧ କରିପାରିବେ । ଆରମ୍ଭରେ ଏହି ଫିଚର ଆଣ୍ଡ୍ରଏଡରେ ଚାଲୁଥିବା ଗୁଗଲ ଆପ ବ୍ୟବହାର କରୁଥିବା କେତେଜଣଙ୍କ ପାଇଁ ଉପଲବ୍ଧ ହେବ ।
ଗୁଗଲ ତା’ର ବାର୍ଷିକ ଡେଭଲପର କନଫରେନ୍ସ ଅବସରରେ ଏହି ଟୁଲର ଘୋଷଣା କରିଥିଲା । କମ୍ପାନୀର ସୂଚନା ଅନୁଯାୟୀ, ୟୁଜର୍ସ ପ୍ରୋଫାଇଲ ପେଜ ମାଧ୍ୟମରେ ‘ରିଜଲ୍ଟସ ଏବାଉଟ ୟୁ’ ବିକଳ୍ପକୁ ଯାଇପାରିବେ । ସେଠାରୁ ସେମାନେ ଗୁଗଲରୁ ପିଆଇଆଇ ହଟାଇବାକୁ ଅନୁରୋଧ କରିବାକୁ ଦ୍ୱିତୀୟ ପେଜରେ ରିଡାଇରେକ୍ଟ କରାଯିବ । ଏହି ସମୟରେ ପ୍ରତ୍ୟେକ ପରିଣାମର ଡାହାଣ ପଟ କୋଣରେ ଉପରି ଭାଗରେ ଦେଖାଯାଉଥିବା ତିନୋଟି ବିନ୍ଦୁ ଉପରେ କ୍ଲିକ କରି ସୂଚନା ହଟାଯାଇ ପାରିବ । ସୂଚନାଯୋଗ୍ୟ, ଗୁଗଲର ନୂଆ ପ୍ରୟୋଗକୁ ନେଇ ଭଲ ସଙ୍କେତ ମିଳିଛି ।
