ନୂଆଦିଲ୍ଲୀ,୨୧।୨: ଉଚ୍ଚ ଶିକ୍ଷା କ୍ଷେତ୍ରରେ ଶିକ୍ଷାର୍ଥୀମାନଙ୍କ ପାଇଁ ଖୁସି ଖବର ଆସିଛି। ଏଣିକି ଶିକ୍ଷାର୍ଥୀମାନେ ଦେଶରେ କୌଣସି ବିଶ୍ୱବିଦ୍ୟାଳୟରେ ଅଧ୍ୟୟନ କରୁଥିବାବେଳେ ବିଦେଶର ଯେ କୌଣସି ବିଶ୍ୱବିଦ୍ୟାଳୟରେ ନିଜ ପସନ୍ଦର ପାଠ୍ୟକ୍ରମରେ ନାମ ଲେଖାଇ ଏକାସାଙ୍ଗରେ ପାଠପଢ଼ି ଡିଗ୍ରୀ ହାସଲ କରିପାରିବେ। ଏସମ୍ପର୍କିତ ଏକ ଚିଠା ନିୟାମକ ପ୍ରସ୍ତାବକୁ ୟୁଜିସି ପକ୍ଷରୁ ଚୂଡ଼ାନ୍ତ ରୂପ ପ୍ରଦାନ କରାଯାଇଛି। ଚିଠା ପ୍ରସ୍ତାବର ମୂଲ୍ୟାଙ୍କନ ଏବଂ ଆବଶ୍ୟକ ଫିଡ୍ବ୍ୟାକ୍ ପରେ ଏସମ୍ପର୍କିତ ଅନ୍ତିମ ନିଷ୍ପତ୍ତି ଗ୍ରହଣ କରାଯିବ। ଶୀଘ୍ର ଏହାର ସୂଚନା ପ୍ରକାଶ କରାଯାଇ ସାର୍ବଜନୀକ ଭାବେ ଗ୍ରହଣ କରାଯିବାର ଯୋଜନା ରହିଛି। ତେବେ ଏହି ନିୟମ ଅନ୍ଲାଇନ୍ ପାଠ୍ୟକ୍ରମ ଉପରେ ଲାଗୁ ହେବ ନାହିଁ।
