ଦାରିଙ୍ଗବାଡ଼ି,୨ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ଅନ୍ତର୍ଗତ ଦାରିଙ୍ଗବାଡ଼ି ବଜାରରେ ରହୁଥିବା ଲୁଗା ବ୍ୟବସାୟୀ ଅଶୋକ କୁମାର ସାହୁଙ୍କ ଘରୁ ଲକ୍ଷାଧିକ ଟଙ୍କାର ସୁନା ଗହଣା, ରୁପା, ନଗଦ ଟଙ୍କା ଆଦି ଲୁଟ୍ ହୋଇଥିବା ଥାନାରେ ଅଭିଯୋଗ ହୋଇଛି।
ପ୍ରକାଶ ଯେ, ଶୁକ୍ରବାର ସନ୍ଧ୍ୟାରେ ବ୍ୟବସାୟୀ ଅଶୋକ ପରିବାର ସହ ଘର ତାଲା ପକାଇ କୌଣସି କାର୍ଯ୍ୟରେ ବ୍ରହ୍ମପୁର ଯାଇଥିଲେ। ରବିବାର ପୂର୍ବାହ୍ନରେ ସେ ବ୍ରହ୍ମପୁରରୁ ଫେରି ଘରର ମୁଖ୍ୟ ଫାଟକର ତାଲା ଖୋଲିଥିଲେ। ଘର ଭିତରକୁ ଯିବା ବେଳେ ଘରର ୨ଟି ଫାଟକର ତାଲା କଟାଯାଇଥିବା ଦେଖିଥିଲେ। ପରେ ଘରେ ପଶି ଦେଖିଲେ ତାଙ୍କ ବେଡ୍ରୁମ୍ରେ ରହିଥିବା ଆଲମିରା ଭାଙ୍ଗି ତା’ ଭିତରେ ରହିଥିବା ୬ ଟି ସୁନା ମୁଦି ସହ ୪ ଟି ସୁନା ହାର, ଗୋଟିଏ ଚେନ୍, ୧୩ ହଳ ସୁନାଫୁଲ ଯାହାକି ମୋଟ୍ ୨୦ରୁ ୨୨ ଭରି ସୁନା ଗହଣା ଓ ରୁପାର କପ୍, ଗିନା ୨ଟି, ରୁପା ଫରୁଆ, ରୁପା କଏନ ମୋଟ୍ ପ୍ରାୟ ୫ ଶହ ଗ୍ରାମ ରୁପା ସହ ନଗଦ ୫୦ ହଜାର ଟଙ୍କା ଚୋରି ହୋଇଛି। ଦୁର୍ବୃତ୍ତମାନେ ମୁଖ୍ୟ ଫାଟକର ତାଲା ନ କାଟି କାନ୍ଥ ଡେଇଁ ପ୍ରବେଶ କରିଥିବା ଜଣାପଡ଼ିଛି। ବ୍ୟବସାୟୀ ଜଣକ ଏନେଇ ଥାନାରେ ଅଭିଯୋଗ କରିବା ପରେ ପୋଲିସ ପକ୍ଷରୁ ମାମଲା (୨୦୨/୨୬) ରୁଜୁ କରି ଆଇଆଇଆସି ସଂଗ୍ରାମ କେଶରୀ ଜେନାଙ୍କ ନିର୍ଦ୍ଦେଶ କ୍ରମେ ଏଏସ୍ଆଇ ଅର୍ଜୁନ ଶବର ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ସୂଚନାଯୋଗ୍ୟ, ଗତ ୨୧ ତାରିଖରେ ଦାରିଙ୍ଗବାଡ଼ି ବଜାରରୁ ଏକ ସୁନା ଦୋକାନ ଏବଂ ଜାଗୃତି ସାହିରୁ ସଦାନନ୍ଦ ସିଂଙ୍କ ଘରୁ ଚୋରି ଯାଇଥିଲ। ଆଜି ପର୍ଯ୍ୟନ୍ତ ଉକ୍ତ ମାମଲାରେ ପୋଲିସ କାହାରିକୁ ଧରିପାରି ନ ଥିବା ବେଳେ ଏବେ ପୁଣି ବଡ଼ ଧରଣର ଲୁଟ୍କୁ ନେଇ ପୋଲିସ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ଏହି ସମସ୍ତ ଲୁଟ୍ ଘଟଣା ଘର ମାଲିକମାନଙ୍କ ଅନୁପସ୍ଥିତି ଓ ଘର ତାଲା ପଡ଼ିଥିବା ଘରକୁ ଦୁର୍ବତ୍ତମାନେ ଟାର୍ଗେଟ କରୁଥିବା ଜଣାଯାଇଛି। ପୋଲିସ ସମସ୍ତ ଘଟଣାର ତଦନ୍ତ କରି ଦୁର୍ବୃତ୍ତମାନଙ୍କୁ ଧରିବାକୁ ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏବେ ଘନଘନ ଚୋରି ଯୋଗୁ ଅଞ୍ଚଳରେ ଭୟ ଓ ଆତଙ୍କ ଦେଖାଯାଇଛି। ବାହାର ରାଜ୍ୟର ଲୋକଙ୍କ ସହ ସ୍ଥାନୀୟ ଅସାମାଜିକ ଲୋକଙ୍କ ସାମିଲ ଥିବା ଏବେ ମୁଖ୍ୟ ଆଲୋଚନା ହେଉଛି। ଏହି ବଡ଼ ଧରଣର ଘଟଣା ପରେ ପୋଲିସ ପାଇଁ ଏବେ ଦୁର୍ବୃତ୍ତଙ୍କୁ ଧରିବାକୁ ଚାଲେଞ୍ଜ ସୃଷ୍ଟି ହୋଇଥିବା କୁହାଯାଉଛି।
