ଜଶପୁରନଗର, ୧୦।୮: ଛତିଶଗଡ଼ର ଜଶପୁରନଗରର ମାଟି ତଳେ ଟନ୍ ଟନ୍ ସୁନା ରହିଥିବା ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଏଠାରେ ଥିବା ଇବ୍ ନଦୀ ତଥା ସୋନାଜୋରୀ ଅବବାହିକା ତଥା ଜନବସତି ଅଞ୍ଚଳର ରାସ୍ତାର ମାଟିରୁ ସୁନା କଣିକା ମିଳୁଛି। ରାସ୍ତାର ମାଟି ଆଣି ଧୋଇଦେଲେ ଛୋଟଛୋଟ ସୁନା କଣିକଣିକା ଚମକି ଉଠୁଛି। ଏହି ଅଞ୍ଚଳରେ କେତେ ପରିମାଣର ସୁନା ଗଚ୍ଛିତ ରହିଛି ତାହା ଜାଣିବା ପାଇଁ ନୂଆ ପ୍ରଣାଳୀରେ ସର୍ଭେ କରାଯିବା ଉପରେ ଗୁରୁତ୍ୱାରୋପ କରାଯାଇଛି। ଜିଳା ପ୍ରଶାସନ ଏବଂ ରାଜ୍ୟ ଖଣି ବିଭାଗ ପକ୍ଷରୁ ଏନେଇ ନିଜର ମତ ରଖିବାକୁ ମନା କରାଯାଇଛି। ୨୦୧୦ରେ କେନ୍ଦ୍ର ସରକାରଙ୍କ ଖଣି ମନ୍ତ୍ରଣାଳୟ ପକ୍ଷରୁ ଜିନ୍ଦଲ ଷ୍ଟିଲ୍ ଆଣ୍ଡ୍ ପାଓ୍ବାର ଏବଂ ମୁମ୍ବାଇର ଦି ମାର୍କ କମ୍ପାନୀ ଦ୍ୱାରା ଏଠାରେ ସର୍ଭେ କରାଇଥିଲେ। ତେବେ ଫଳାଫଳ ସନ୍ତୋଷ ଜନକ ମିଳି ନ ଥିବା କୁହାଯାଇଥିଲା। ୬ ମାସ ସର୍ଭେରେ ମାଟି ତଳେ ସୁନା ଭଣ୍ଡାର ଥିବା ଜଣାପଡ଼ିଥିଲା। ତେବେ କେଉଁଠି ଏବଂ କେତେ ପରିମାଣର ସୁନା ରହିଛି ତାହା ଅନୁମାନ କରାଯାଇ ପାରି ନ ଥିଲା। ଏବେ ପୁଣି ଜିଲା ପ୍ରଶାସନ ପକ୍ଷରୁ ସୁନା ଭଣ୍ଡାର ସର୍ଭେ ନୂଆ ପ୍ରଣାଳୀରେ କରାଯିବା ଲାଗି ଅଣ୍ଟା ଭିଡ଼ାଯାଉଛି। ମାଟିରୁ ସୁନା ମିଳୁଥିବାରୁ ସ୍ଥାନୀୟ କାଂସବାଲ ଏବଂ ଫରସାବହାର ଅଞ୍ଚଳର ଲୋକେ ବର୍ଷା ଦିନଠାରୁ ସୁନା ସଂଗ୍ରହ କାମରେ ଲାଗି ଯାଉଛନ୍ତି। ଏଠାରେ ଚୋରା ବେପାରୀଙ୍କ ଭିଡ଼ ମଧ୍ୟ ହେଉଥିବା କୁହାଯାଉଛି। ଲୋକଙ୍କଠାରୁ ସୁନା କମ୍ ଦାମରେ ସେମାନେ କିଣି ନେଉଥିବା ଅଭିଯୋଗ ହେଉଛି। ବେପାରୀ ଲୋକଙ୍କଠାରୁ ୪ଶହରୁ ୫ ଶହ ଟଙ୍କାରେ ସୁନା କିଣି ନେଉଛନ୍ତି।
