ନୂଆଦିଲ୍ଲୀ ,୩୦।୧୦: ଗତ କିଛି ମାସ ହେବ ଉଭୟ ଭୌଗୋଳିକ ଓ ରାଜନୈତିକ କାରଣରୁ ସାରା ବିଶ୍ୱରେ ମାନ୍ଦାବସ୍ଥା ଜାରି ରହିଛି। ରୁଷିଆ-ୟୁକ୍ରେନ୍ ଯୁଦ୍ଧ ବିଶ୍ୱ ଅର୍ଥବ୍ୟବସ୍ଥା ଉପରେ ବ୍ୟାପକ ପ୍ରଭାବ ପକାଇଛି ବୋଲି ଏକ ଅନ୍ତଃରାଷ୍ଟ୍ରୀୟ ସର୍ଭେ ସଂସ୍ଥା ପକ୍ଷରୁ କୁହାଯାଇଛି। ଏପରିକି ଗତ ୨ ବର୍ଷର କୋଭିଡ୍ କଟକଣା ଯୋଗୁ ବିଶ୍ୱ ଅର୍ଥ ବ୍ୟବସ୍ଥା ଏକ ପ୍ରକାର ନିମ୍ନଗାମୀ ହୋଇପଡ଼ିଥିଲା। ମାନ୍ଦାବସ୍ଥାରୁ ମୁକୁଳିବା ପାଇଁ ସାରା ବିଶ୍ୱ ନାନାଦି ଉପାୟ ଓ ପଦକ୍ଷେପ ଗ୍ରହଣ କରିଥିଲା। ସେହିଭଳି ଅର୍ଥ ବ୍ୟବସ୍ଥାରେ ସୁଧାର ପାଇଁ କୋଭିଡ୍ କଟକଣାକୁ କୋହଳ କରିଥିଲା ବେଳେ ଭୌଗୋଳିକ ସମସ୍ୟା ଏକ ପ୍ରକାର ପ୍ରତିବନ୍ଧକ ସାଜିଥିଲା। ସେହିଭଳି ଅନ୍ତଃରାଷ୍ଟ୍ରୀୟ ବିବାଦଗୁଡିକ ପାଇଁ ଦରବୃଦ୍ଧି ଓ ଅର୍ଥ ବ୍ୟବସ୍ଥା ଉଭୟ ସରକାର ଓ ଜନସାଧାରଣଙ୍କୁ ଚିନ୍ତାରେ ପକାଇ ଦେଇଛି। ଖାଲି ଭାରତ ଯେ ମାନ୍ଦାବସ୍ଥା ଓ ଦରବୃଦ୍ଧିର ସମ୍ମୁଖୀନ ହେଉଛି ତା’ ନୁହେଁ ସାରା ବିଶ୍ବରେ ମାନ୍ଦାବସ୍ଥା ଜାରି ରହିଛି। ଆୟଠାରୁ ଆରମ୍ଭକରି ଦରବୃଦ୍ଧିକୁ ନିୟନ୍ତ୍ରଣରେ ରଖିବା ପାଇଁ ସବୁ ଦେଶର ସରକାର ପ୍ରାଣପଣେ ଲାଗିଛନ୍ତି। ହେଲେ ମୁଦ୍ରାସ୍ଫୀତ ଓ ଉଚ୍ଚ ଦର ଏବଂ ବେକାରି ସମସ୍ୟା ଯୋଗୁ ଅସ୍ଥିରତା ଦେଖାଦେଇଛି। ସେହିପରି ବିଭିନ୍ନ ଅଞ୍ଚଳରେ ବର୍ତ୍ତମାନ ଦରଦାମ ବୃଦ୍ଧି ଜାରି ରହିଛି। କାରଣ ଆମଦାନୀ ଓ ରପ୍ତାନି ଜନିତ ସମସ୍ୟା ଯୋଗୁ ଦରବୃଦ୍ଧି ମୁଖ୍ୟ ସମସ୍ୟା ପାଲଟିଛି ବୋଲି ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
ଅପରପକ୍ଷରେ ମୁଦ୍ରାସ୍ଫୀତିକୁ ଆୟତ୍ତରେ ରଖିବା ପାଇଁ ଭାରତୀୟ ରିର୍ଜଭ ବ୍ୟାଙ୍କ (ଆର୍ବିଆଇ) ପକ୍ଷରୁ ଅନେକ ପଦକ୍ଷେପ ଗ୍ରହଣ କରାଯାଇଥିଲେ ମଧ୍ୟ ଦରବୃଦ୍ଧି ଓ ଅର୍ଥ ବ୍ୟବସ୍ଥାରେ ସୁଧାର ପରିଲକ୍ଷିତ ହେଉନାହିଁ। ଏଭଳି ପରିସ୍ଥିତିରେ ଆର୍ବିଆଇ ଆସନ୍ତା ମାସରେ ଏକ ଜରୁରିକାଳୀନ ଏମ୍ପିସି ବୈଠକ ଡକାଇଛନ୍ତି। ଉକ୍ତ ବୈଠକ ପରେ ଆର୍ବିଆଇ ପୁଣି ଥରେ ଋଣ ସୁଧ ହାରକୁ ବଢାଇପାରନ୍ତି ବୋଲି ଆକଳନ କରାଯାଉଛି। ଫଳରେ ସୁଧ ହାର ବୃଦ୍ଧି ହେଲେ ଦରବୃଦ୍ଧି ଓ ଖର୍ଚ୍ଚ ପରିମାଣ ପୂର୍ବାପେକ୍ଷା ବୃଦ୍ଧି ପାଇବ।
