ଲଣ୍ଡନ, ୯।୨: ଭବିଷ୍ୟତରେ ସାରା ବିଶ୍ୱ ହିମ ହ୍ରଦ ବନ୍ୟା ଦ୍ୱାରା ପ୍ରଭାବିତ ହେବାକୁ ଯାଉଛି। ବ୍ରିଟେନ ନ୍ୟୁକାଷ୍ଟଲ ୟୁନିଭର୍ସିଟି ବିଶେଷଜ୍ଞମାନଙ୍କ ଦ୍ୱାରା କରାଯାଇଥିବା ଅଧ୍ୟୟନରେ ଏହା ଜଣାପଡ଼ିଛି। ଗ୍ଲାସିଆଲ ଲେକ୍ ଆଉଟ୍ବ୍ରଷ୍ଟ ଫ୍ଲଡ୍ସ (ଜିଏଲ୍ଓଏଫ୍) ବା ହିମ ହ୍ରଦ ବନ୍ୟା ସମ୍ପର୍କିତ ଅଧ୍ୟୟନର ବିସ୍ତୃତ ତଥ୍ୟ ଜର୍ନାଲ ନେଚର କମ୍ୟୁନିକେଶନ୍ରେ ପ୍ରକାଶ ପାଇଛି। ରିପୋର୍ଟ ମୁତାବକ ବିଶ୍ୱର ୧୫ ନିୟୁତ ଲୋକେ ଏହା ଦ୍ୱାରା ପ୍ରଭାବିତ ହେବେ। ଭାରତ ଉପରେ ମଧ୍ୟ ଏହାର ପ୍ରଭାବ ପଡ଼ିବ ଯଦ୍ଦ୍ବାରା ପାଖାପାଖି ୩ ନିୟୁତ ଲୋକଙ୍କୁ ଜିଏଲ୍ଓଏଫ ପ୍ରଭାବିତ କରିବ।
ଭାରତ, ପାକିସ୍ତାନ, ପେରୁ ଓ ଚାଇନା ବିଶ୍ୱର ୪ ଜନବହୁଳ ରାଷ୍ଟ୍ର। ଏଗୁଡ଼ିକ ମଧ୍ୟରୁ ଭାରତ ଓ ପାକିସ୍ତାନରେ ସର୍ବାଧିକ ଲୋକ ବସବାସ କରନ୍ତି। ହିମବାହରୁ ସୃଷ୍ଟି ହୋଇଥିବା ଏହି ହିମ ହ୍ରଦ ସୃଷ୍ଟି। ବାୟୁମଣ୍ଡଳରେ ତାପମାତ୍ରା ବୃଦ୍ଧି ଘଟିବା ଦ୍ୱାରା ହିମ ହ୍ରଦ ତରଳିବା ଆରମ୍ଭ କରିବ, ଯାହାଫଳରେ ଜିଏଲ୍ଓଏଫ ବା ହିମ ହ୍ରଦ ବନ୍ୟା ସୃଷ୍ଟି ହେବ। ପ୍ରକାଶିତ ରିପୋର୍ଟ ମୁତାବକ ବନ୍ୟା ସୃଷ୍ଟି ହେବା ଦ୍ୱାରା ଏହି ହ୍ରଦର ଜଳ ଅତିବେଶୀରେ ୧୨୦ କି.ମି ଦୂର ପର୍ଯ୍ୟନ୍ତ ଅତିକ୍ରମ କରିପାରିବ। ବହୁ ସମ୍ପତ୍ତି ସାଙ୍ଗକୁ ଇନ୍ଫ୍ରାଷ୍ଟ୍ରକ୍ଚର, ଚାଷ ଜମି କ୍ଷେତ୍ରରେ ବଡ଼ କ୍ଷତି ଘଟିବାର ଆଶଙ୍କା ରହିଛି। ୨୦୨୧ରେ ଉତ୍ତରାଖଣ୍ଡର ଚମ୍ବୋଲିରେ ଜିଏଲ୍ଓଏଫ ଦ୍ୱାରା ୮୦ ଜଣଙ୍କ ମୃତ୍ୟୁ ଘଟିଥିଲା।
ପରଠାରୁ ବିଶ୍ୱରେ ହିମ ହ୍ରଦର ସଂଖ୍ୟା ବଢ଼ିବାରେ ଲାଗିଛି। ଏହାର ମୁଖ୍ୟ କାରଣ ହେଉଛି ଜଳବାୟୁ ପରିବର୍ତ୍ତନ। ବିଶ୍ୱରେ ମୋଟ ୧,୦୮୯ ଟି ହିମ ହ୍ରଦ ବିଶେଷଜ୍ଞଙ୍କ ଦ୍ୱାରା ଠାବ କରାଯାଇଛି। କେତେକ ହ୍ରଦଠାରୁ ୫୦ କି.ମି. ଦୂରରେ ଲୋକେ ବସବାସ କରୁଥିବା ବିଶେଷଜ୍ଞ ଦଳ ପକ୍ଷରୁ କୁହାଯାଇଛି। ପ୍ରଭାବିତ ହେବାକୁ ଥିବା ଲୋକଙ୍କ ମଧ୍ୟରୁ ୯.୩ ନିୟୁତ ଲୋକ ଡେଞ୍ଜର ଜୋନ୍ରେ ଥିବା ଅଧ୍ୟୟନରୁ ଜଣାପଡ଼ିଛି।
