କେନ୍ଦୁଝର,୧୦ା୨ (ସ୍ବ.ପ୍ର.)-ଦେଶୀ ଅଦାର ଚାହିଦା ସବୁଠି ରହିଛି । ଏହାର ଔଷଧୀୟ ଗୁଣ ମଧ୍ୟ ରହିଛି । ଚା’ଠାରୁ ଆରମ୍ଭ କରି ତରକାରୀ, ଔଷଧ ପ୍ରସ୍ତୁତିରେ ଏହାର ବ୍ୟବହାର ରହିଛି। ଲୋକ ମାନେ ଏହାକୁ ନିତିଦିନିଆ ସାମଗ୍ରୀ ଭାବରେ ବ୍ୟବହାର କରିଆସୁଛନ୍ତି। ଏଣୁ ଏହାକୁ ଆଖି ଆଗରେ ରଖି ବାଂଶପାଳ ବ୍ଲକ ଅନ୍ତର୍ଗତ ବାୟାକୁମୁଟିଆ ଗ୍ରାମର ଭୂୟାଁ ଜନଜାତିର ଲୋକମାନେ ନିଜ ଉଦ୍ୟମରେ ଅଦା ଚାଷ କରି ରୋଜଗାରର ବାଟକୁ ଆପଣେଇଛନ୍ତି। ବିନା ସହାୟତାରେ ନିଜେ ଏହି ଚାଷ କରି ପାଖାପାଖି ୧୫ ପରିବାର ସ୍ବାବଲମ୍ବୀ ହୋଇପାରିଛନ୍ତି। ଏବେ ଟିକେ ଆଗକୁ ଯାଇ ସେମାନେ ନିଜ ଉଦ୍ୟମରେ ଅଦା ଚାଷ ଆରମ୍ଭ କରିଛନ୍ତି। ଯଶୋଦା ଧାଙ୍ଗଡା କହିଛନ୍ତି ଯେ ଆଗରୁ ଖାଇବା ପାଇଁ ଟିକେ ଟିକେ ଚାଷ କରୁଥିଲୁ। ଏବର୍ଷ ଅଧିକ ଜମିରେ ଚାଷ କରିଛୁ ଏବଂ ଏବେ ଅମଳ କରି ହାଟବଜାରରେ ବିକୁଛୁ। ଗତ ବର୍ଷ କରିଥିବା ଅଦାକୁ ବିହନ ଭାବରେ ସାଇତି ରଖି ସେସବୁକୁ ଚଳିତ ବର୍ଷ ଚାଷ କରିଛୁ। ରଜ ସମୟରେ ଚାଷ କରି ମକର ପରେ ଅମଳ କରୁଛୁ ବୋଲି ସେ କହିଛନ୍ତି। ଏହି ସବୁ ଚାଷ କାର୍ଯ୍ୟରେ ବନବାସୀ ମହିଳାମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଥାଏ। ସେମାନେ ଚାଷ କାମରେ ସହଯୋଗ କରିବା ସହ ବିକ୍ରି ବଟା ପାଇଁ ହାଟବଜାର ଯାଇଥାନ୍ତି। କିନ୍ତୁ ବଜାର ଅଭାବରୁ ସେମାନେ ଅଦାର ଠିକ ମୂଲ୍ୟ ପାଉ ନ ଥିବା କହିଛନ୍ତି। କିଲୋ ୫୦ରୁ ୬୦ ଟଙ୍କାରେ ବିକୁଥିବା ବେଳେ ସାଇତି ରଖିବା ପାଇଁ କୌଣସି ସୁବିଧା ନ ଥିବାରୁ ନଷ୍ଟ ମଧ୍ୟ ହୋଇଯାଉଛି। ଏଣୁ ଆଗ୍ରହ ଥିଲେ ହେଁ ବାଂଶପାଳ ବ୍ଲକ ଅଞ୍ଚଳର ଏହି ଭୂୟାଁ ଓ ଜୁଆଙ୍ଗ ବନବାସୀ ମାନେ ହଳଦୀ ଭଳି ଅଦା ଚାଷ ଅଧିକ ପରିମାଣରେ କରିପାରୁନାହାନ୍ତି। ହଳଦୀ ଭଳି ଅଦା ଚାଷ ପାହାଡିଆ ଜମିରେ ଭଲ ହୋଇଥାଏ ଏବଂ ଏଥିପାଇଁ କମ ପାଣିର ଆବଶ୍ୟକତା ରହିଥାଏ। ସେହିପରି ଏହାକୁ ଗୋରୁଗାଈ ବା ହାତୀ ଖାଇ ନ ଥାନ୍ତି। ଏଣୁ ଏହାର ଅଧିକ ସୁରକ୍ଷା ଜରୁରୀ ହୋଇ ନ ଥାଏ। ସେମାନଙ୍କୁ ସରକାରୀ ସୁବିଧା ମିଳୁନାହିଁ ା ନିଜେ ବିହନ ରଖିଥିଲୁ ା ସାର କିଣି ପକେଇଲୁ। ପ୍ରାୟ ୧୨ଶହ ଟଙ୍କା ଖର୍ଚ୍ଚ କରିଛୁ ା ଭାବୁଛୁ ୫ ହଜାର ଟଙ୍କା ପାଇବୁ ା ବିକିଲେ ଜାଣିବୁ ବୋଲି ବନବାସୀ ଉଲ୍ଲାସ ନାଏକ କହିଛନ୍ତି। ସୁବିଧା ମିଳିଲେ ଆଉ ଟିକେ ଭଲ କରି ପାରିବୁ ା ଏହା ଛଡା ପନିପରିବା ଚାଷ ମଧ୍ୟ କରୁଛୁ ା ସମସ୍ତେ ନିଜ ନିଜର ଅଦା ଧରି ମିଶି ଅଟୋଭଡା ଦେଇ ହାଟବଜାରକୁ ଆଣୁଛୁ ଏବଂ ବିକିବା ପରେ ଘରକୁ ଫେରୁଛୁ ବୋଲି ବନବାସୀ ଦସରୀ ଧାଙ୍ଗଡ କହିଛନ୍ତି।
