ଇସ୍ଲାମାବାଦ, ୨।୮(ପି.ଟି.): ଗିଲ୍ଗିଟ୍-ବଲ୍ଟିସ୍ତାନକୁ ଅସ୍ଥାୟୀ ଭାବେ ପ୍ରାଦେଶିକ ମାନ୍ୟତା ପ୍ରଦାନ ଲାଗି ପାକିସ୍ତାନ କର୍ତ୍ତୃପକ୍ଷ ଆଇନ ଆଣୁଥିବା ଏକ ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି। ସମ୍ପୂର୍ଣ୍ଣ ଆଇନଗତ ଓ ଅପରିବର୍ତ୍ତିତ ପରିଗ୍ରହଣ ଅନୁଯାୟୀ ଜମ୍ମୁ-କଶ୍ମୀର, ଲଦାଖ କେନ୍ଦ୍ରଶାସିତ ଅଞ୍ଚଳ ସମେତ ଗିଲ୍ଗିଟ୍ ଏବଂ ବଲ୍ଟିସ୍ତାନ ଭାରତର ଅବିଚ୍ଛେଦ୍ୟ ଅଙ୍ଗ ବୋଲି ନୂଆଦିଲ୍ଲୀ ପାକିସ୍ତାନକୁ ସ୍ପଷ୍ଟ ଭାବେ ଜଣାଇଦେଇଛି। ବେଆଇନ ଏବଂ ବଳପୂର୍ବକ ଦଖଲ କରାଯାଇଥିବା ଅଞ୍ଚଳ ଉପରେ ପାକ୍ ସରକାର କିମ୍ବା ଏହାର ନ୍ୟାୟପାଳିକାର କୌଣସି ଅଧିକାର ନାହିଁ ବୋଲି ଭାରତ କହିଆସିଛି।
ପାକିସ୍ତାନ ଆଇନ ଓ ନ୍ୟାୟ ମନ୍ତ୍ରଣାଳୟ ଆଣିଥିବା ପ୍ରସ୍ତାବିତ ଆଇନ ଅନୁଯାୟୀ ଗିଲ୍ଗିଟ୍-ବଲ୍ଟିସ୍ତାନର ସୁପ୍ରିମ୍ ଆପିଲେଟ କୋର୍ଟକୁ ଉଚ୍ଛେଦ କରାଯିବା ସହ ଉକ୍ତ ଅଞ୍ଚଳର ନିର୍ବାଚନ କମିଶନକୁ ପାକିସ୍ତାନର ନିର୍ବାଚନ କମିଶନଙ୍କ ସହ ମିଶାଇ ଦିଆଯାଇପାରେ। ଏହି ୨୬ତମ ସମ୍ବିଧାନ ସଂଶୋଧନ ବିଲ୍ର ଚିଠା ପ୍ରସ୍ତୁତ କରାଯାଇ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ପାଖକୁ ପଠାଯାଇଥିବା ଆଇନ ମନ୍ତ୍ରଣାଳୟ ସୂତ୍ରରୁ ଜଣାପଡ଼ିଛି। ଆଇନ ପ୍ରସ୍ତୁତ କରିବାକୁ ଇମ୍ରାନ ଗତ ମାସରେ ଆଇନମନ୍ତ୍ରୀ ବାରିଷ୍ଟର ଫାରୋଗ ନସୀମଙ୍କୁ କହିଥିଲେ। ପ୍ରସ୍ତାବିତ ସମ୍ବିଧାନ ସଂଶୋଧନ ସମ୍ପର୍କରେ ଗିଲ୍ଗିଟ୍-ବଲ୍ଟିସ୍ତାନ ଏବଂ ପାକ୍ ଅଧିକୃତ କଶ୍ମୀର ସରକାରଙ୍କ ପରାମର୍ଶ ନିଆଯାଇଥିଲା।
