କ୍ୱିଭ୍, ୧୩ା୩: ୟୁକ୍ରେନ୍ ଉପରେ ରୁଷିଆ ଆକ୍ରମଣକୁ ଶନିବାର ୧୭ ଦିନ ପୂରିଥିବାବେଳେ ପ୍ରତିରୋଧ ପାଇଁ ଲଢ଼େଇ ଜାରି ରଖିଛନ୍ତି କ୍ୱିଭ୍ ସୈନ୍ୟ। ଏପରି ସମୟରେ ୟୁକ୍ରେନ୍ ଲଢ଼ୁଆଙ୍କ ସାହସ ବଢ଼ାଇଛନ୍ତି ‘ଘୋଷ୍ଟ ଅଫ୍ କ୍ୱିଭ୍’। ୟୁକ୍ରେନ୍ ସେନାର ଭେରିଫାଏଡ୍ ଫେସ୍ବୁକ୍ ଆକାଉଣ୍ଟରୁ ଏହି ଭାଇରାଲ ଭୂତଙ୍କ ଏକ ଫଟୋ ଶେୟାର କରାଯାଇଛି, ଯାହାଙ୍କୁ ଏହି ପୂର୍ବ ୟୁରୋପୀୟ ଦେଶର ବାସିନ୍ଦା ‘ଏୟାର ଆଭେଞ୍ଜର’ ନାମ ମଧ୍ୟ ଦେଇଛନ୍ତି। ବାସ୍ତବରେ ଘୋଷ୍ଟ ଅଫ୍ କ୍ୱିଭ୍ ନାଁ ପାଇଥିବା ତଥାକଥିତ ‘ଭୂତ’ ଜଣକ ୟୁକ୍ରେନ୍ର ଜଣେ ଦକ୍ଷତାସମ୍ପନ୍ନ ପାଇଲଟ ବୋଲି କୁହାଯାଉଛି। ସେ ଏଯାବତ୍ ୧୦ରୁ ଊର୍ଦ୍ଧ୍ୱ ରୁଷୀୟ ବିମାନକୁ ନଷ୍ଟ କରିସାରିଥିବା ଜଣାପଡ଼ିଛି। ମିଗ୍-୨୯ ଫାଇଟର ଜେଟ୍ରେ ବ୍ଲାକ୍ ଭିଜର୍, ଅକ୍ସିଜେନ୍ ମାସ୍କ ପିନ୍ଧିଥିବା ଏହି ପାଇଲଟ ଏବେ ସମସ୍ତ ୟୁକ୍ରେନ୍ ସୈନ୍ୟଙ୍କ ସାହସ ପାଲଟିଛନ୍ତି।
ଷ୍ଟାଫ୍ ଅଫ୍ ୟୁକ୍ରେନ୍ ଆର୍ମର୍ଡ ଫୋର୍ସ ପକ୍ଷରୁ କରାଯାଇଥିବା ଉକ୍ତ ପୋଷ୍ଟରେ ସମ୍ପୃକ୍ତ ପାଇଲଟଙ୍କ ଫଟୋ ଅପ୍ଲୋଡ୍ କରାଯାଇଛି। ଏଥିରେ ସେ ଏକ ଅକ୍ସିଜେନ୍ ମାସ୍କ ସହ ମୁଖା ପିନ୍ଧିଛନ୍ତି। ‘ଘୋଷ୍ଟ୍ ଅଫ୍ କ୍ୱିଭ୍ ରୁଷୀୟ ଖଳନାୟକଙ୍କ ଆତ୍ମାକୁ ନେବାକୁ ଆସିଛି’ ବୋଲି ଉକ୍ତ ପୋଷ୍ଟରେ ଲେଖାଯାଇଛି। ତେବେ ସେହି ପାଇଲଟ୍ଙ୍କ ବାବଦରେ ବିସ୍ତୃତ ତଥ୍ୟ ଦିଆଯାଇନାହିଁ। ଗତ ଫେବୃୟାରୀ ୨୪ରେ ରୁଷିଆ ଆକ୍ରମଣ କରିବାର ୩୦ ଘଣ୍ଟା ମଧ୍ୟରେ ପାଇଲଟ ଜଣକ ୨ଟି ସୁଖୋଇ ଏସ୍ୟୁ-୩୫, ୨ଟି ଏସ୍ୟୁ-୨୫, ଗୋଟିଏ ଏସ୍ୟୁ-୨୭ ଏବଂ ଏକ ମିଗ୍-୨୯କୁ ଟାର୍ଗେଟ କରି ଖସାଇଦେଇଥିବା ୟୁକ୍ରେନ୍ ପକ୍ଷରୁ ଦାବି ହୋଇଥିଲା। ରୁଷିଆ ସହ ଲଢ଼ିବା ପାଇଁ ବହୁ ସଂଖ୍ୟାରେ ତାଲିମ୍ପ୍ରାପ୍ତ ପାଇଲଟ୍ ଯୁଦ୍ଧରେ ସାମିଲ ହୋଇଥିବା ୟୁକ୍ରେନ୍ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି। ତେବେ ୟୁକ୍ରେନ୍ ସରକାରୀ ଭାବେ ‘ଘୋଷ୍ଟ ଅଫ୍ କ୍ୱିଭ୍’ ବାବଦରେ ତଥ୍ୟ ପ୍ରଦାନ କରିନାହିଁ। ଆକ୍ରମଣର ପ୍ରଥମ ଦିନରୁ ଘୋଷ୍ଟ ଅଫ୍ କ୍ୱିଭ୍ ଚର୍ଚ୍ଚାକୁ ଆସିଥିଲେ ହେଁ ଏବେ ସେନାର ପୋଷ୍ଟ ଏହାକୁ ଅଧିକ ଭାଇରାଲ କରିଛି। ପୂର୍ବରୁ ଏହି ଏୟାର ଆଭେଞ୍ଜରଙ୍କ ଏକ ଭିଡିଓ ଟୁଇଟରରେ ଦେଖିବାକୁ ମିଳିଥିଲା। ଏଥିରେ ଏକ ଯୁଦ୍ଧବିମାନ ଅନ୍ୟ ଏକ ବିମାନ ସହ ଲଢ଼େଇ କରି ନଷ୍ଟ କରିଦେଉଥିବା ଦେଖାଯାଇଥିଲା। ଦ୍ୱିତୀୟ ବିଶ୍ୱଯୁଦ୍ଧ ପରଠାରୁ କୌଣସି ଜଣେ ପାଇଲଟ୍ଙ୍କୁ ଏପରି ଆଖ୍ୟା ଦିଆଯିବା ପ୍ରଥମ ବୋଲି କୁହାଯାଉଛି। ଫେବୃୟାରୀ ୨୬ରେ ଜଣେ ୟୁକ୍ରେନ୍ ସୈନ୍ୟ ସମାନ ଢଙ୍ଗରେ ୨୦ରୁ ଊର୍ଦ୍ଧ୍ୱ ରୁଷୀୟ ସୈନ୍ୟଙ୍କୁ ହତ୍ୟା କରି ଚର୍ଚ୍ଚାକୁ ଆସିଥିଲେ।
