ନୂଆଦିଲ୍ଲୀ,୧୭।୭: କରୋନା ଯୋଗୁ ବିଶ୍ୱବଜାର ଗଭୀର କ୍ଷତି ସାମ୍ନା କରୁଛି। ସାରା ବିଶ୍ୱରେ ଲକ୍ଡାଉନ ଯୋଗୁ ଆର୍ଥତ୍କ କାର୍ଯ୍ୟକଳାପ ଠପ୍ ହୋଇପଡିଛି। ବର୍ତ୍ତମାନ ଶିଳ୍ପ ଜଗତ ଟ୍ରାକ୍କୁ ଫେରି ନ ଥିବା ବେଳେ ବଜାର କ୍ଷତିରେ ଚାଲିଛି। ପୂର୍ବରୁ ମାନ୍ଦାବସ୍ଥା ଦେଇ ଗତି କରୁଥିବା ଭାରତୀୟ ଅର୍ଥ ବ୍ୟବସ୍ଥା ଚଳିତ ବର୍ଷ ମଧ୍ୟ ଗଭୀର କ୍ଷତି ସହିବ ବୋଲି ପୂର୍ବାନୁମାନ କରାଯାଇଛି। ରେଟିଂ ଏଜେନ୍ସି ଇକ୍ରାର ପୂର୍ବାନୁମାନ ମୁତାବକ ୨୦୨୦ରେ ଭାରତର ମୋଟ ଘରୋଇ ଉତ୍ପାଦ(ଜିଡିପି)୯.୫% ଖସିପାରେ। ଏହି ଏଜେନ୍ସି ପୂର୍ବରୁ କରିଥିବା ଅନୁମାନରେ କହିଥିଲା ଯେ, ଚଳିତ ବର୍ଷ ଭାରତର ଜିଡିପି ୫% ଖସିପାରେ। ହେଲେ ବଜାର ସ୍ଥିତି ସଙ୍ଗିନ ହୋଇଥିବାରୁ ପୂର୍ବରୁ ହୋଇଥିବା ଆକଳନକୁ ଏହା ପରିବର୍ତ୍ତନ କରିଛି। ଚଳିତ ବର୍ଷ କୃଷିକ୍ଷେତ୍ରରେ ଗ୍ରସ୍ ଭାଲ୍ୟୁ ଆଡେଡ୍(ଜିଭିଏ) ୩.୫-୪% ରହିପାରେ ବୋଲି ଏହା ରିପୋର୍ଟରେ ଉଲ୍ଲେଖ କରିଛି।
ଘରୋଇ ବଜାରରେ ବର୍ତ୍ତମାନ କରୋନା ସଂକ୍ରମଣ ହାର ଦ୍ରୁତ ହୋଇଛି। ଏଥିଯୋଗୁ ଦେଶ ମଧ୍ୟରେ ବିଭିନ୍ନ ରାଜ୍ୟ ଲକ୍ଡାଉନ ଅବଧିକୁ ବଢ଼ାଇବାକୁ ବାଧ୍ୟ ହେଉଛନ୍ତି। ମେ ଏବଂ ଜୁନ୍ ମାସରେ ସ୍ଥିତିରେ କିଛିଟା ସୁଧାର ଆସିବ ବୋଲି ଅନୁମାନ କରାଯାଉଥିଲା। ହେଲେ ସବୁ କିଛି ଟ୍ରାକ୍କୁ ଫେରିବା ବର୍ତ୍ତମାନ କଷ୍ଟକର ହେଉଛି। ଏଭଳି ବିଭିନ୍ନ ଜଟିଳ ପ୍ରସଙ୍ଗକୁ ବିଚାରକରି ଇକ୍ରା ନିଜର ଆକଳନରେ ହ୍ରାସ କରିଛି। ଚଳିତ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ଜିଡିପି ୨୫% ହ୍ରାସ ହେବା ନେଇ ଏହା ଆଶଙ୍କା କରିଛି। ସେହିଭଳି ଦ୍ୱିତୀୟ ତ୍ରୈମାସରେ ୧୨.୪%, ତୃତୀୟ ତ୍ରୈମାସରେ ୨.୩% ଏବଂ ଚତୁର୍ଥ ତ୍ରୈମାସରେ ଜିଡିପି ୧.୩% ହ୍ରାସ ହେବା ନେଇ ଇକ୍ରା ଏହାର ରିପୋର୍ଟରେ ପୂର୍ବାନୁମାନ କରିଛି।
ଇକ୍ରାର ମୁଖ୍ୟ ଅର୍ଥନୀତିଜ୍ଞ ଆଦିତି ନାୟାର କହିଛନ୍ତି ଯେ, କରୋନା ସଂକ୍ରମଣ ମାମଲା ଗଭୀର ହେବାକୁ ଲାଗିଛି। ଏଥିଲାଗି ସୁରକ୍ଷା ଉପାୟ ଲମ୍ବା ସମୟ ଯାଏ ଗ୍ରହଣ କରିବାର ଆବଶ୍ୟକତା ରହିଛି। ଅର୍ଥ ବ୍ୟବସ୍ଥାର ସ୍ଥିତିକୁ ବିଚାରକରି ପୂର୍ବରୁ ଭାରତ ବଜାର ଲାଗି ଯେଉଁ ପୂର୍ବାନୁମାନ କରାଯାଇଥିଲା ସେଥିରେ ପରିବର୍ତ୍ତନ କରାଯାଇଛି।
