ରାଉରକେଲା,୧୦।୯(ଦିନେଶ ମିଶ୍ର)ରାଉରକେଲା ସହରକୁ ସ୍ବଚ୍ଛ ଓ ସବୁଜ କରିବା ପାଇଁ ପ୍ରତିଦିନ ବିଭିନ୍ନ କଲୋନୀ ଓ ବସ୍ତି ଅଞ୍ଚଳରେ ଆରଏମ୍ସି ପକ୍ଷରୁ ଅଳିଆ ଗାଡି ବୁଲୁଛି। ସକାଳ ହେଲେ ସହରର ଜନସାଧାରଣଙ୍କୁ ସଚେତନ କରିବା କରିବା ପାଇଁ ଅଳିଆ ଗାଡିଗୁଡିକରେ ସଚେତନତା ବାର୍ତ୍ତା ପ୍ରଚାର ମଧ୍ୟ କରାଯାଉଛି। ହେଲେ ଏଭଳି କିଛି ବସ୍ତି ରହିଛି ଯେଉଁଠାରେ ସ୍ବଚ୍ଛତାକୁ ଗୁରୁତ୍ୱ ଦିଆଗଲା ଭଳି ମନେ ହେଉନାହିଁ। ଏଭଳି ଗାଡାଟୋଲା ବସ୍ତି ଓ ମାଲଗୋଦାମସ୍ଥିତ ସୁଇପର ବସ୍ତିରେ ଦେଖିବାକୁ ମିଳିଛି।
ରାଉରକେଲା ଏସ୍ଟିଆଇ ଓଭରବ୍ରିଜ୍ ନିକଟରେ ଗାଡାଟୋଲା ବସ୍ତି ରହିଛି। ଏହି ବସ୍ତିରେ ୩ଶହରୁ ଊର୍ଦ୍ଧ୍ୱ ଲୋକ ବସବାସ କରନ୍ତି। ଅଳିଆ ଆବର୍ଜନା ପକାଇବା ପାଇଁ ବସ୍ତିରେ କୌଣସି ଡଷ୍ଟବିନ୍ ବ୍ୟବସ୍ଥା ନାହିଁ। ଫଳରେ ବସ୍ତିବାସୀମାନେ ରାସ୍ତାକଡ଼ରେ ଅଳିଆ ଜମା କରୁଛନ୍ତି। ଏହି ଅଳିଆ ମାସ ମାସ ଧରି ପଡିରହୁଥିବାବେଳେ ଏହାକୁ ସଫା କରାଯାଉନାହିଁ। ଫଳରେ ଅଳିଆଗୁଡିକୁ ବୁଲା ପଶୁ ଗୋଡରେ ଖେଳାଇ ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛନ୍ତି। ସେହିପରି ବାସନ୍ତୀ କଲୋନୀ ମାଲଗୋଦାମ ସ୍ଥିତ ସୁଇପରବସ୍ତିରେ କୌଣସି ଡଷ୍ଟବିନ ବ୍ୟବସ୍ଥା କରାଯାଇନାହିଁ। ସ୍ଥାନୀୟ ବସ୍ତିବାସୀମାନେ ବସ୍ତି ନିକଟ ଏକ ଅଙ୍ଗନଓ୍ବାଡି କାନ୍ଥ କଡରେ ଅଳିଆ ଆବର୍ଜନା ପକାଉଛନ୍ତି। ଏହି ବସ୍ତି ଭିତରକୁ କୌଣସି ଆରଏମ୍ସିର ସଫେଇ ଗାଡି ଯାଉ ନ ଥିବାରୁ ପୂତିଗନ୍ଧମୟ ପରିବେଶ ସୃଷ୍ଟି ହେଉଛି। ବସ୍ତିରେ ଅଳିଆ ଗୁଡିକ ବହୁଦିନ ଧରି ଜମା ରହୁଥିବାବେଳେ ବର୍ଷାଦିନ ପାଣିରେ ପଚି ଏକ ଗନ୍ଧ ବାହାରୁଛି। ଏ ନେଇ ଗାଡାଟୋଲା ବସ୍ତିର ବାସିନ୍ଦା ଶୁକ୍ରା କୁଜୁର କୁହନ୍ତି, କେନ୍ଦ୍ର ସରକାର ସ୍ବଚ୍ଛ ଭାରତ ଅଭିଯାନ କରୁଥିବାବେଳେ ଆମ ବସ୍ତିରେ ସ୍ବଚ୍ଛତାକୁ ନେଇ ଆଜିଯାଏ କୌଣସି ଡଷ୍ଟବିନ ବ୍ୟବସ୍ଥା କରାଯାଇନାହିଁ। ଫଳରେ ସ୍ଥାନୀୟ ବସ୍ତିବାସୀ ରାସ୍ତାକଡ ଖୋଲା ସ୍ଥାନରେ ଅଳିଆ ପକାଇଉଛନ୍ତି। ଆରଏମ୍ସିର ଅଳିଆ ଗାଡି ଖାଲି ବିଭିନ୍ନ ସମ୍ଭ୍ରାନ୍ତ କଲୋନୀ ଅଞ୍ଚଳରେ ବୁଲୁଥିବାବେଳେ ଆମ ବସ୍ତିକୁ ଆସୁନାହିଁ। ଏ ସମ୍ପର୍କରେ ଆରଏମ୍ସି ଉପ ଆୟୁକ୍ତ ସୀତାଦେବୀ ମାଝୀଙ୍କୁ ପଚାରିବାରୁ ସେ କହିଲେ, ପ୍ରତିଦିନ ଆର୍ଏମ୍ସି ପକ୍ଷରୁ ବିଭିନ୍ନ ଏରିଆକୁ ଅଳିଆ ଗାଡି ଯାଉଛି। ଗାଡାଟୋଲା ବସ୍ତି ଓ ସୁଇପର ବସ୍ତିରେ ଅଳିଆ ସଫା ହେଉ ନ ଥିବା ଆମ ପାଖରେ ଅଭିଯୋଗ ହୋଇନାହିଁ। ଯଦି କୌଣସି ସ୍ଥାନରେ ଅଳିଆ ଆବର୍ଜନା ଦେଖାଯାଏ ତେବେ ଏକ ଟ୍ରୋଲ ଫ୍ରି ନମ୍ବରରେ ଅଭିଯୋଗ କରନ୍ତୁ। ଦୁଇ ଦିନ ଭିତରେ ଏହି ଅଳିଆ ଆବର୍ଜନାକୁ ତୁରନ୍ତ ସଫା କରାଯିବ ବୋଲି ମାଝୀ କହିଥିଲେ।
