ନବରଙ୍ଗପୁର,୨୮।୯(ସଦାଶିବ ପ୍ରହରାଜ): ମଶାମାଛିଙ୍କ ଦାଉରୁ କିଭଳି ଦୂରେଇ ରହିବା ଓ ପରିବେଶ ସଫାସୁତୁରା ରଖିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ସଚେତନ କରାଯାଉଛି। ଆବର୍ଜନା ଜମି ରହିଲେ ଡେଙ୍ଗୁ, ମ୍ୟାଲେରିଆ ଆଦି ବ୍ୟାପିବ ବୋଲି କୁହାଯାଉଛି। ନାଳ, ଆବର୍ଜନା ସଫା କରିବା ପୌରସଂସ୍ଥାର ମୌଳିକ କାର୍ଯ୍ୟ। ଏବେ କିନ୍ତୁ ଆଶୀର୍ବାଦ କଲ୍ୟାଣ ମଣ୍ଡପରେ କୁଢ଼କୁଢ଼ ଆବର୍ଜନା ଜମି ରହୁଛି, ଯାହାକୁ ଦେଖିଲେ ଡମ୍ପିଂୟାର୍ଡ ଭ୍ରମ ସ୍ୟଷ୍ଟି ହେଉଛି। ଜମିଥିବା ସ୍ଥାନଟି ଆଶୀର୍ବାଦ ଓ ପୁଷ୍ପାଞ୍ଜଳି କଲ୍ୟାଣ ମଣ୍ଡପ ଭାବେ ପରିଚିତ ଥିଲା। ଉକ୍ତ ସ୍ଥାନରେ କଲ୍ୟାଣ ମଣ୍ଡପ ହେବା ପୂର୍ବରୁ ମୁଖ୍ୟମନ୍ତ୍ରୀ ୨୦୦୨ରେ ଆଦିବାସୀ ସଂଗ୍ରହାଳୟ ଭାବେ ଉଦ୍ଘାଟନ କରିଥିଲେ। ଏହାପରେ ଉକ୍ତ ସ୍ଥାନର କୋଠା ଅବ୍ୟବହୃତ ଭାବେ ନିଆଗଲା। ପରେ କିଛିଦିନ ପାଇଁ ପୌରସଂସ୍ଥା ବୁଲା ଗୋରୁଙ୍କୁ ଉକ୍ତ ସ୍ଥାନରେ ରଖି କାଞ୍ଜିଆହୁଦା କଲେ। ଏବେ ସେହି ସ୍ଥାନରେ ସହରର ଆବର୍ଜନା ଡମ୍ପିଂୟାର୍ଡ କରିଛନ୍ତି। ସହରର ମଧ୍ୟଭାଗରେ ଥିବା ଏହି ସ୍ଥାନ ଏବେ ମ୍ୟାଲେରିଆ ଓ ଡେଙ୍ଗୁ ମଶାଙ୍କ ପାଇଁ ଉତ୍ତମ ସ୍ଥାନ ହୋଇଛି। ନିକଟରେ ଦୈନିକ କୃଷକ ବଜାର, ଏଲ୍ଆଇସି ଅଫିସ ଓ ମାର୍କେଟ କମ୍ପ୍ଲେକ୍ସ ରହିଛି। ନବରଙ୍ଗପୁର ଘରୋଇ ବସ୍ଷ୍ଟାଣ୍ଡରୁ ମଙ୍ଗଲମ ଟିମ୍ବର ବାଇପାସ୍ ରାସ୍ତା ଭଳି ପ୍ରମୁଖ ରାସ୍ତାକଡରେ ଏହି ସ୍ଥାନ ରହିଛି। ଉକ୍ତ ସ୍ଥାନ ଏବେ ଗନ୍ଧମୟ ଓ ସେଠାରେ ମାଛି ମଶାର ପ୍ରାଦୁର୍ଭାବ ବଢୁଛି। ପୌରସଂସ୍ଥାର ଦୂର ଦୃଷ୍ଟି ନ ଥିବା ଲାଗି ଜନସାଧାରଣ ସମସ୍ୟା ଭୋଗୁଛନ୍ତି ବୋଲି ଅଭିଯୋଗ ହେଉଛି। ଏନେଇ ପୌରସଂସ୍ଥା ନିର୍ବାହୀ ଅଧିକାରୀ ପ୍ରାଣନାଥ ସେଠଙ୍କୁ ପଚାରିବାରୁ ମେଶିନ ଲଗାଇ ଆବର୍ଜନା ହଟାଇଦେବେ ବୋଲି କହିଛନ୍ତି।
