ପୁରୀ ଅଫିସ,୧୧ା୩:କୋଭିଡ୍ କଟକଣା ମଧ୍ୟରେ ଗୁରୁବାର ଶ୍ରୀଲୋକନାଥଙ୍କ ପୀଠରେ ଜାଗରଯାତ୍ରା ଅନୁଷ୍ଠିତ ହେବ। କଟକଣା ମାନି ଭକ୍ତମାନେ ଶ୍ରୀଲୋକନାଥ ଦେବଙ୍କୁ ଦର୍ଶନ କରିବାକୁ ଥିବାବେଳେ ମନ୍ଦିର ପ୍ରଶାସନ କମିଟି ପକ୍ଷରୁ ଗମ୍ଭୀରା ମଧ୍ୟକୁ ପ୍ରବେଶ ବାରଣ କରାଯାଇଛି। ଗୁରୁବାର ରାତ୍ର ୧୨ଟା ୩୦ ମିନିଟ୍ ସମୟରେ ରାତ୍ର ପହୁଡ଼ ଦ୍ୱାର ଖୋଲିବ। ରାତ୍ର ୧ଟାରୁ ୪ଟା ମଧ୍ୟରେ ମଙ୍ଗଳ ଆଳତି, ଅବକାଶ ନୀତି ଓ ସୂର୍ଯ୍ୟପୂଜା ଆଦି ଅନୁଷ୍ଠିତ ହେବ। ଏହାପରେ ଭୋର୍ ୪ଟାରୁ ସାଧାରଣ ଦର୍ଶନ ଆରମ୍ଭ ହୋଇ ରାତ୍ର ୧୦ଟା ପର୍ଯ୍ୟନ୍ତ ଚାଲୁ ରହିବ। ୧୦ଟା ପରେ ଦର୍ଶନ ବନ୍ଦ ହୋଇ ଲୋକନାଥ ଦେବଙ୍କର ନୀତିକାନ୍ତି ଆରମ୍ଭ ହୋଇ ପାଖାପାଖି ରାତ୍ର ୨ଟା ପର୍ଯ୍ୟନ୍ତ ଚାଲିବ। ରାତ୍ର ୨ଟାରୁ ୩ଟା ମଧ୍ୟରେ ହରିହର ପୂଜାଭୋଗ ସମ୍ପନ୍ନ, ଚତୁର୍ଦ୍ଦଶୀ ଭୋଗ, ବଡ଼ସିଂହାର ଭୋଗ ଓ ମହାଦୀପ ପ୍ରଜ୍ଜ୍ୱଳନ ହେବ। ଉଲ୍ଲେଖଯୋଗ୍ୟ, ଶ୍ରୀଶ୍ରୀ ଲୋକନାଥ ଦେବଙ୍କ ଚଳନ୍ତି ପ୍ରତିମା ଜଗନ୍ନାଥ ମନ୍ଦିରରୁ ବାହାରି ସହରର ବିଭିନ୍ନ ସ୍ଥାନରେ ପନ୍ତି ଭୋଗ ଖାଇ ରାତ୍ର ୧୧ଟା ୩୦ ମିନିଟ୍ ସମୟରେ ଲୋକନାଥ ମନ୍ଦିରରେ ପହଞ୍ଚିବେ। ଅନ୍ୟପକ୍ଷେ ଶୃଙ୍ଖଳିତ ଦର୍ଶନ ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ୧୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବା ସହ ମନ୍ଦିରଠାରୁ ୨ଶହ ମିଟରକୁ ଯାନବାହନ ନିଷିଦ୍ଧାଞ୍ଚଳରେ ପରିଣତ କରାଯାଇଛି। ଏପରିକି କୌଣସି ଦୋକାନ ବଜାରର ଆସର ବସିବ ନାହିଁ। ଧାଡ଼ି ଦର୍ଶନକୁ ଗୁରୁତ୍ୱ ଦିଆଯିବା ସହ ଆପରାଧିକ କାର୍ଯ୍ୟକଳାପକୁ ଟ୍ରାକ୍ କରିବା ନେଇ କଡ଼ା ନଜର ରଖାଯାଇଥିବା ଏସ୍ପି କନୱର ବିଶାଲ ସିଂ କହିଛନ୍ତି। ଜଣେ ଅତିରିକ୍ତ ଏସ୍ପି, ୫ଜଣ ଡିଏସ୍ପି, ୧୧ଜଣ ଇନ୍ସପେକ୍ଟର, ୪୦ଜଣ ଅଫିସର, ୨ଶହ ହୋମଗାର୍ଡ ଓ ଶହେ କନଷ୍ଟେବଳଙ୍କୁ ଜାଗର ଯାତ୍ରା କାର୍ଯ୍ୟରେ ନିୟୋଜିତ କରାଯିବ। ସେହିଭଳି ଅଗ୍ନିଶମ ବାହିନୀ ଓ ଡାକ୍ତରୀ ଟିମ୍ ମଧ୍ୟ ଘଟଣାସ୍ଥଳରେ ମହଜୁଦ ରହିବେ।
