କଟକ, ୯ା୨(ଶିଳ୍ପା ପ୍ରିୟଦର୍ଶିନୀ):ସାଧାରଣ ନିର୍ବାଚନ ଲାଗି ବାରବାଟୀ-କଟକ ନିର୍ବାଚନମଣ୍ଡଳୀରେ ଭାଜପାର ଆଶାୟୀଙ୍କ ନାମ ସାମ୍ନାକୁ ଆସି ନ ଥିବାବେଳେ କଟକ ମହାନଗର ନିଗମ(ସିଏମ୍ସି) ଅଧୀନ ୨୬ନଂ. ଓ୍ବାର୍ଡର କର୍ପୋରେଟର ତଥା ଭାଜପା ଯୁବମୋର୍ଚ୍ଚା ସମ୍ପାଦକ ଗଗନ ଓଝା ଗୁରୁବାର ଜନସମ୍ପର୍କ ପଦଯାତ୍ରା କରି ଶକ୍ତି ପ୍ରଦର୍ଶନ କରିଛନ୍ତି। ଏହି ପଦଯାତ୍ରା ଝୋଲାସାହିସ୍ଥିତ ଏକ ବ୍ୟାଙ୍କ ନିକଟରୁ ବାହାରି ନିମସାହି, ସେମିନାରୀ ଛକ, ହାତୀପୋଖରୀ, ଦରଘାବଜାର, ଗୌରୀଶଙ୍କର ପାର୍କ, ନନ୍ଦୀସାହି, ଚୌଧୁରୀ ବଜାର ପରିକ୍ରମା କରି କାଠଗଡ଼ା ସାହିଠାରେ ପହଞ୍ଚିଥିଲା। ଏ ସମ୍ପର୍କରେ ଗଗନ କହିଛନ୍ତି, କେନ୍ଦ୍ର ସରକାରଙ୍କ ଜନକଲ୍ୟାଣକାରୀ ଯୋଜନା ଓ କେନ୍ଦ୍ର ସରକାର ଦେଉଥିବା ଅନୁଦାନ କିପରି ହିତାଧିକାରୀଙ୍କ ପାଖରେ ପହଞ୍ଚିବ ସେ ନେଇ ଏହି ପଦଯାତ୍ରା କରାଯାଇଛି। କଟକର ଅନେକ ସାହି କମିଟିର ମୁରବି ଏବଂ କ୍ଲବ ସଦସ୍ୟ ଗଗନଙ୍କୁ ସମ୍ମାନିତ କରିଥିବା ଦେଖିବାକୁ ମିଳିଛି।
ଅପରପକ୍ଷରେ ଏହି ପଦଯାତ୍ରାରେ ଦଳୀୟ ବ୍ୟାନର ଓ ପତାକା କର୍ମୀମାନେ ଧରିଥିବାବେଳେ ନେତୃବୃନ୍ଦଙ୍କୁ ଦେଖିବାକୁ ମିଳି ନ ଥିଲା। କିଛି ମାସ ବ୍ୟବଧାନରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କର୍ପୋରେଟର ଗଗନଙ୍କ ବାସଭବନରେ ପହଞ୍ଚି କର୍ମକର୍ତ୍ତାଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ଆଗାମୀ ଦିନରେ ଗଗନ ଦଳୀୟ ଟିକେଟ ପାଇଁ ଆଶାୟୀଥିବା ସାଧାରଣରେ ଚର୍ଚ୍ଚା ହେଉଛି। ଏହି ପଦଯାତ୍ରାରେ ସାମିଲ ହୋଇଥିବା ଭାଜପାର ପୂର୍ବତନ କଟକ ନଗର ଜିଲା ସଭାପତି ଲକ୍ଷ୍ମୀଧର ପ୍ରଧାନ କହିଛନ୍ତି, ଆସନ୍ତା ନିର୍ବାଚନକୁ ଦୃଷ୍ଟିରେ ରଖି ବାରବାଟୀ-କଟକ ନିର୍ବାଚନମଣ୍ଡଳୀରୁ ବିଧାୟକ ଟିକେଟ ପାଇଁ ଗଗନ ଆଶାୟୀ। ଏଥିରେ ମୋର ସମର୍ଥନ ରହିଛି। ସମସ୍ତ ନେତୃବୃନ୍ଦ ସମର୍ଥନ କଲେ ଗଗନଙ୍କୁ ଟିକେଟ୍ ମିଳିବ ବୋଲି ସେ କହିଛନ୍ତି। ଏହି ପଦଯାତ୍ରାରେ କର୍ପୋରେଟର ଗୋପାଳ ବେହେରା, ଲକ୍ଷ୍ମୀଧର ବେହେରା, ରାକେଶ ସ୍ବାଇଁ, କଟକ ଜିଲା ଯୁବମୋର୍ଚ୍ଚା ସଭାପତି ନଳିନୀ ରାୟ, ପୂର୍ବତନ ଯୁବ ମୋର୍ଚ୍ଚା ନଗର ଜିଲା ସଭାପତି ସତ୍ୟ ମିଶ୍ର, ରୀତା ମହାପାତ୍ର, ଅମ୍ବିକା ଦାସ, ସବିତା ବେହେରା, ହେମନ୍ତ ସେଠୀ, ସୁଚିତ୍ରା ସେନାପତି, ମନୋଜ ମହାରଣା ପ୍ରମୁଖ ସାମିଲ ହୋଇଥିଲେ।
