କଣାସ,୧୬।୧୨(ସ୍ବ.ପ୍ର.): କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳର ବିକାଶ ପାଇଁ ରାସ୍ତାଘାଟର ନିର୍ମାଣ ଦିଗରେ ଅଧିକ ଗୁରୁତ୍ୱ ଦେଇ କୋଟିକୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ରାସ୍ତା ନିର୍ମାଣବେଳେ ନିମ୍ନମାନର କାର୍ଯ୍ୟ କରାଯାଉଛି। ବର୍ତ୍ତମାନ ସମୟରେ କଣାସ ବ୍ଲକର ଗଡିଶାଗୋଦାଠାରୁ ଜଙ୍କିଆ ବଜାର ପର୍ଯ୍ୟନ୍ତ ନିର୍ମାଣ କରାଯାଉଥିବା ଦୟାନଦୀର ବନ୍ଧ ନିର୍ମାଣ କାର୍ଯ୍ୟ ଚାଲିଛି। ସେହି କାର୍ଯ୍ୟ ନିମ୍ନମାନର ହେଉଥିବା ଗଡିଶାଗୋଦାବାସୀ ପୁରୀ ଜିଲାପାଳଙ୍କ ନିକଟରେ ଅଭିଯୋଗ କରିଥିବା ଜଣାପଡିଛି। ଖବରନେବାରେ ଜଣାପଡିଛି ଗଡିଶାଗୋଦାଠାରୁ ଜଙ୍କିଆ ପର୍ଯ୍ୟନ୍ତ ଦୟାନଦୀ ବନ୍ଧ ସୁଦୃଢ ପାଇଁ ଢଳେଇ ରାସ୍ତା କରିବାକୁ ଠିକାଦାର ନିଯୁକ୍ତ ହୋଇଛନ୍ତି। ବନ୍ଧରେ ସର୍ବପ୍ରଥମେ ୬ ଇଞ୍ଚ ବାଲି ଓ ନାଲିମୋରମ ଦେବାକୁ ଥିବାବେଳେ ନାମକୁମାତ୍ର ବାଲି ମିଶାଇ ନିମ୍ନମାନର ମୋରମ ଦେଇ ୬ ଇଞ୍ଚ ବଦଳରେ ୩ରୁ ୪ ଇଞ୍ଚ ପକାଯାଇଛି। ତାହା ଉପରେ ୩ ଇଞ୍ଚର ଚିପ୍ସ ପକାଇବାକୁ ନିୟମ ଥିବାବେଳେ ମାତ୍ର ୧ଇଞ୍ଜରୁ ୨ ଇଞ୍ଚ ମଧ୍ୟରେ କଳାଚିପ୍ସ ପକାଯାଇ ତାହା ପରେ ନାଲି ମୋରମ ଛିଞ୍ଚା ଯାଉଛି। ଚିପ୍ସ ଉପରେ ୮ ଇଞ୍ଚର ଢଳେଇ ପକାଇବାକୁ ବ୍ୟବସ୍ଥା ଥିବା ଏବଂ ଢଲେଇ ଦୁଇପାଖକୁ ସୁଦୃଢ ରଖିବା ପାଇଁ କଂକ୍ରିଟ୍ ବନ୍ଧ ହେବାକୁ ଥିବାବେଳେ ଉକ୍ତ ଠିକାଦାର ବନ୍ଧର ଦାଢରୁ ମାଟି ଖୋଳି ବନ୍ଧ ତିଆରି କରୁଛନ୍ତି। ଫଳରେ ଥରକ ବର୍ଷାରେ ଦୁଇପାର୍ଶ୍ୱ ମାଟି ଧୋଇଯାଇ ଢଳେଇ ଫାଟି ଯିବାର ସମ୍ଭାବନା ରହିଛି। ଯେଉଁ ୮ଇଞ୍ଚ ଢଳେଇ କରାଯିବା ବଦଳରେ ମାତ୍ର ୬ଇଞ୍ଚ ଢଳେଇ କରାଯାଉଛି। ଢଳେଇ ମଧ୍ୟରେ ଲୁହାରଡ଼ ଦେବାର ବ୍ୟବସ୍ଥା ନ ଥିବାରୁ ବନ୍ୟା ସମୟରେ ଢଳେଇଗୁଡିକ ଫାଟିଯାଇ ଖଣ୍ଡ ଖଣ୍ଡ ହୋଇଯିବାର ସମ୍ଭାବନା ରହିଛି। ଢଳେଇବେଳେ ୩ପେଟି ଚିପ୍ସ, ୨ପେଟି ବାଲି, ଗୋଟିଏ ପେଟି ସିମେଣ୍ଟ ଦିଆଯାଉଥିବାରୁ ତାହା ଚିରସ୍ଥାୟୀ ନୁହେଁ ବୋଲି ଗଡିଶାଗୋଦା ଗ୍ରାମବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ନଦୀବନ୍ଧ ଢଳେଇର ଦୁଇପାର୍ଶ୍ୱ ସୁରକ୍ଷା ପାଇଁ କଂକ୍ରିଟ୍ ୱାଲ୍ ନିର୍ମାଣ କରାଯିବା ସହିତ ଢଳେଇ ମଧ୍ୟରେ ଲୁହାରଡ୍ ଦେବା ପାଇଁ ଗ୍ରାମବାସୀ ଦାବିକରିଛନ୍ତି। ଏ ସମ୍ପର୍କରେ ଜଳସେଚନ ବିଭାଗ ସହକାରୀ ଯନ୍ତ୍ରୀ ମକାର ବେହେରାଙ୍କୁ ପଚାରିବାରୁ, ସେ କୌଣସି ସନ୍ତୋଜନକ ଉତ୍ତର ଦେଇପାରି ନ ଥିଲେ।
