ବାରିପଦା ଅଫିସ,୨ା୮-‘ଫ୍ରେଣ୍ଡ ଇଜ୍ ନିଡ୍ ଇଜ୍ ଏ ଫ୍ରେଣ୍ଡ ଇନ୍ଡିଡ୍’। ଇଂଲିଶରେ ଥିବା ଏହି ବାକ୍ୟର ଅର୍ଥ ବିପଦ ବେଳର ବନ୍ଧୁ ହିଁ ପ୍ରକୃତ ବନ୍ଧୁ। ବନ୍ଧୁମାନଙ୍କ ଉଦ୍ଦେଶ୍ୟରେ ପ୍ରତିବର୍ଷ ଅଗଷ୍ଟ ମାସର ପ୍ରଥମ ରବିବାରକୁ ଫ୍ରେଣ୍ଡଶିପ୍ ଡେ’ (ବନ୍ଧୁତ୍ୱ ଦିବସ) ଭାବେ ପାଳନ କରାଯାଇଆସୁଛି। ଏହିଦିନ ନିଜର ପ୍ରିୟ ସାଙ୍ଗ ହାତରେ ଫେଣ୍ଡଶିପ୍ ବ୍ୟାଣ୍ଡ ବାନ୍ଧି ସମୟ ବିତାଇବା ସତରେ ନିଆରା। ରବିବାର ଛୁଟି ଦିନରେ ଏହି ଦିବସ ପାଳିତ ହେଉଥିବାରୁ ଏହା ବନ୍ଧୁମାନଙ୍କ ଖୁସିକୁ ଦ୍ୱିଗୁଣିତ କରିଥାଏ। ଚଳିତବର୍ଷ କରୋନା ମହାମାରୀ ଯୋଗୁ ଏହା କିଛି ମାତ୍ରାରେ ଫିକା ପଡ଼ିବ।
ବନ୍ଧୁତ୍ୱର ପରିଭାଷା ସମ୍ପର୍କରେ ଯାହା କୁହନ୍ତି ବାରିପଦା ସହରର ଯୁବପିଢ଼ି –
ପ୍ରକୃତ ବନ୍ଧୁଟିଏ ମିଳିବା ସହଜ ନୁହେଁ
ଦୁନିଆରେ ବନ୍ଧୁତ୍ୱ ସବୁଠାରୁ ମୂଲ୍ୟବାନ ସମ୍ପର୍କ। ତାହା କେବେ ବି ମଉଳି ଯାଏନାହିଁ। ବନ୍ଧୁ ବିନା ଜୀବନ ଏକରକମ ଅଧୁରା ଅନୁଭବ ହୋଇଥାଏ। ସେଥିପାଇଁ ତ ବନ୍ଧୁଙ୍କୁ ଜୀବନରେ ଅଭିନ୍ନ ଅଙ୍ଗ ବୋଲି ମଧ୍ୟ କୁହାଯାଏ। ଜୀବନର ପ୍ରତିଟି ମୋଡ଼ରେ ନୂଆ ନୂଆ ବନ୍ଧୁଙ୍କ ସହିତ ଭେଟ ହୋଇଥାଏ। ସେମାନେ ଆମ ହୃଦୟରେ ସ୍ବତନ୍ତ୍ର ସ୍ଥାନଟିଏ ସୃଷ୍ଟି କରିବା ସହିତ ଜୀବନରେ ଯୋଡ଼ି ହୋଇରୁହନ୍ତି। ବର୍ତ୍ତମାନ ସୋସିଆଲ ମିଡିଆ ମାଧ୍ୟମରେ ଅନେକ ବନ୍ଧୁ ତ ମିଳିଯାଆନ୍ତି କିନ୍ତୁ ଜୀବନରେ ପ୍ରକୃତ ବନ୍ଧୁଟିଏ ମିଳିବା ସହଜ ନୁହେଁ।
ସୁବ୍ରତ ମୁଖୀ, ବାରିପଦା
ଭଲ ବନ୍ଧୁ ହିଁ ମାର୍ଗଦର୍ଶକ
ଜଣେ ଭଲ ବନ୍ଧୁ ସବୁବେଳେ ଅନ୍ୟବନ୍ଧୁଙ୍କ ପାଇଁ ମାଗଦର୍ଶକ ହୋଇଥାଏ। ସୁଖ, ଦୁଃଖ ଓ ଜୀବନର ସବୁ ସମୟରେ ଛାଇପରି ପାଖରେ ଛିଡ଼ା ହୋଇଥାଏ। ଦୁନିଆରେ ବାପା, ମା , ଭାଇ,ଭଉଣୀ,ସ୍ବାମୀ-ସ୍ତ୍ରୀ ସମ୍ପର୍କ ପରେ କୌଣସି ରକ୍ତଗତ ସମ୍ପର୍କ ନ ଥାଇ ମଧ୍ୟ ବନ୍ଧୁତା ଦୁନିଆର ସବୁଠାରୁ ପବିତ୍ର ।
ଦେବବ୍ରତ ଦେ, ବାରିପଦା
ବିଶ୍ୱାସକୁ ନେଇ ବାଟ ଚାଲେ
ବନ୍ଧନୀମୁକ୍ତ ସମ୍ପର୍କ ହିଁ ବନ୍ଧୁତା। କିଛି କହିବା ଆଗରୁ ଯଦି ସେ ବୁଝିଗଲା ତେବେ ସେ ହିଁ ପ୍ରକୃତ ବନ୍ଧୁ। ବନ୍ଧୁତା ବିଶ୍ୱାସକୁ ନେଇ ବାଟ ଚାଲିଥାଏ। ପରିବାର, ସମ୍ପର୍କୀୟଙ୍କଠାରୁ ବନ୍ଧୁର ସମ୍ପର୍କ ଅଲଗା। ଏମାନଙ୍କ ସହ ତୁମେ ସୁଖ ଦୁଃଖ ସବୁ କିଛି ବାଣ୍ଟିପାରିବ। ଭଲମନ, ସୁସ୍ଥ ସମାଜ ଗଠନର ଉଦ୍ଦେଶ୍ୟ ସାଧନରେ ଜଣେ ବନ୍ଧୁ ହିଁ ସହାୟକ ହୁଏ।
ମଧୁସ୍ମିତା ପାଣି
ଭଲ ରାସ୍ତା ଦେଖାଏ
ବନ୍ଧୁମାନେ ସବୁବେଳେ ସମସ୍ତକୁ ସହଯୋଗ କରନ୍ତି ଓ ପ୍ରେରଣା ଦିଅନ୍ତି। ସୁଖଦୁଃଖରେ ତୁମ ପାଖରେ ଛିଡ଼ା ହୁଅନ୍ତି। ବନ୍ଧୁ ହିଁ ବନ୍ଧୁକୁ ସତ୍ ପରାମର୍ଶ ଦିଏ, ଭଲ ରାସ୍ତା ଦେଖାଏ। ନିର୍ମଳ ଦୃହୟ ହୋଇ ପରସ୍ପରକୁ ଭଲପାଇବା ହେଉଛି ପ୍ରକୃତ ବନ୍ଧୁତା।
ପ୍ରିୟଙ୍କା ପୃଷ୍ଟି
