କଟକ ଅଫିସ,୨୭ା୮: ବ୍ୟବସାୟିକ ବିବାଦକୁ ନେଇ ପାରାଦୀପ ବନ୍ଦରରେ ଅଟକ ରଖାଯାଇଥିବା ପାନାମାର ପଣ୍ୟବାହୀ ଜାହାଜ ‘ଏମ୍ଭି ମେରାଇନ୍ ହର୍ନବିଲ୍ (ଆଇଏମ୍ଓ ନଂ- ୯୫୯୪୩୬୫)’କୁ ମୁକ୍ତ କରିବା ପାଇଁ ଶୁକ୍ରବାର ହାଇକୋର୍ଟ ବନ୍ଦର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ଏଥିପାଇଁ ଜାହାଜ କର୍ତ୍ତୃପକ୍ଷଙ୍କ ପକ୍ଷରୁ ଡିମାଣ୍ଡ ଡ୍ରାଫ୍ଟ ଆକାରରେ ୨ କୋଟି ୧୧ ଲକ୍ଷ ୩୬ ହଜାର ୪ ଶହ ୮୭ ଟଙ୍କାର ଅମାନତ ରାଶି ହାଇକୋର୍ଟଙ୍କ ରେଜିଷ୍ଟ୍ରାର ଜୁଡିସିଆଲଙ୍କ ନାମରେ ଦାଖଲ କରାଯାଇଛି। ତେବେ ମାମଲାର ରାୟ ଆସିବା ପର୍ଯ୍ୟନ୍ତ ଉକ୍ତ ଅର୍ଥରାଶିକୁ ଏକ ଜାତୀୟକରଣ ବ୍ୟାଙ୍କରେ ସ୍ବଳ୍ପ ଅବଧି ଜମା ଭାବେ ଜମା ରଖିବାକୁ ବିଚାରପତି ଭି. ନରସିଂହ ନିର୍ଦ୍ଦେଶ ଦେଇଛନ୍ତି। ଆବେଦନକାରୀ ସଂସ୍ଥା ପକ୍ଷରୁ ଆଇନଜୀବୀ ଗୌତମ ମିଶ୍ର ମାମଲା ପରିଚାଳନା କରୁଥିବାବେଳେ ବି.ଏନ୍. ମହାନ୍ତି, ଏଚ୍.ଏସ୍. ମୁଦୁଲି ଓ ଡି. ଆନନ୍ଦ ମିଶ୍ର ତାଙ୍କୁ ସହଯୋଗ କରୁଛନ୍ତି। ସେହିପରି ଅପରପକ୍ଷରୁ ଆଇନଜୀବୀ ଏସ୍.ପି. ମିଶ୍ର ମାମଲା ପରିଚାଳନା କରୁଥିବାବେଳେ ବି. ମିଶ୍ର ସହଯୋଗ କରୁଛନ୍ତି।
କକେଟ ମେରାଇନ୍(ଏସିଆ) ପକ୍ଷରୁ ୨,୬୭,୨୨୦ ଆମେରିକୀୟ ଡଲାର ଦାବି କରାଯାଇ ଏମ୍ଭି ମେରାଇନ୍ ହର୍ନବିଲ ବିରୋଧରେ ହାଇକୋର୍ଟରେ ଏକ ମାମଲା ଦାଏର କରାଯାଇଥିଲା। ଜାହାଜଟି ପାରାଦୀପ ବନ୍ଦରରୁ ଗତ ୧୮ ତାରିଖରେ ଯାତ୍ରା ଆରମ୍ଭ କରିବାର ଥିଲା। ତେବେ ଆବେଦନକାରୀଙ୍କ ପକ୍ଷରୁ ତ୍ୱରିତ କାର୍ଯ୍ୟାନୁଷ୍ଠାନ ନେବା ନିମନ୍ତେ କରାଯାଇଥିବା ଆବେଦନର ଗୁରୁତ୍ୱକୁ ଉପଲବ୍ଧି କରି ହାଇକୋର୍ଟ ଜାହାଜକୁ ଅଟକ ରଖିବା ନିମନ୍ତେ ଗତ ୧୭ ତାରିଖରେ ପାରାଦୀପ ବନ୍ଦର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ।
