ଖଲ୍ଲିକୋଟ,୮ା୭(ଡି.ଏନ୍.ଏ.)- ପୁଣି ଖାକିରେ କଳଙ୍କ। ମହିଳାଙ୍କୁ ସୁରକ୍ଷା ଦେବା ବଦଳରେ ଦିନକୁ ଦିନ ସେମାନଙ୍କ ଉପରେ ପୋଲିସର ଅତ୍ୟାଚାର ବଢୁଛି। ବିବାହ ପ୍ରତିଶ୍ରୁତି ଦେଇ ଜଣେ ଯୁବତୀଙ୍କ ସହ ଶାରୀରିକ ସମ୍ପର୍କ ରଖିବା ଓ ପରେ ପ୍ରତାରଣା ଅଭିଯୋଗରେ ଗଞ୍ଜାମ ଜିଲା ଖଲ୍ଲିକୋଟ ଥାନା ଭେଜିପୁଟ ଫାଣ୍ଡି ଓଆଇସି ଟୁନା ପିଡ଼ିକାଙ୍କୁ ମଙ୍ଗଳବାର ଗିରଫ କରି କୋର୍ଟ ଚାଲାଣର କରାଯାଇଛି। ଗଞ୍ଜାମ ଏସ୍ପି ବ୍ରିଜେଶ କୁମାର ରଏ ତାଙ୍କୁ ନିଲମ୍ବିତ କରିଛନ୍ତି।ଅଭିଯୋଗ ଅନୁଯାୟୀ, ଭୁବନେଶ୍ୱରରେ ଟ୍ରେନିଂ ନେଉଥିବାବେଳେ ପ୍ରାୟ ୪ ବର୍ଷ ତଳେ ସମ୍ପୃକ୍ତ ଯୁବତୀଙ୍କ ସହ ଟୁନାଙ୍କର ପ୍ରେମ ସମ୍ପର୍କ ଗଢି ଉଠିଥିଲା। ବିବାହ ପ୍ରତିଶ୍ରୁତି ଦେବା ସହ ସେ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ମାତ୍ର ପରେ ବିବାହ କରିବାକୁ ମନା କରିବା ସହ କିଛିଦିନ ହେଲା ଫୋନ୍ କଲେ ମଧ୍ୟ ଉଠାଉ ନ ଥିଲେ। ଏପରିକି ତାଙ୍କୁ ନ ଜଣାଇ ଟୁନା ଆଉ ଜଣେ ଯୁବତୀଙ୍କ ସହ ଏବେ ନିର୍ବନ୍ଧ କରିଛନ୍ତି। ଏହା ଜାଣିବା ପରେ ସମ୍ପୃକ୍ତ ଯୁବତୀ ଗତ ୩ ତାରିଖରେ ଖଲ୍ଲିକୋଟ ଥାନାରେ ପହଞ୍ଚତ୍ ଅଭିଯୋଗ କରିଥିଲେ। ସୋମବାର ଏନେଇ ଗଞ୍ଜାମ ଏସ୍ପି ବ୍ରିଜେଶ କୁମାର ରଏଙ୍କୁ ମଧ୍ୟ ଭେଟି ଜଣାଇଥିଲେ। ଏସ୍ପିଙ୍କ ନିର୍ଦ୍ଦେଶକ୍ରମେ ଖଲ୍ଲିକୋଟ ଥାନା ଅଧିକାରୀ ନଂ.୧୬୫/୨୦ରେ ମାମଲା ରୁଜୁକରି ଟୁନାଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଥିଲେ। ଜାମିନ ନାମଞ୍ଜୁର ହେବାରୁ ମଙ୍ଗଳବାର କୋଦଳା ସବ୍ଜେଲ୍କୁ ପଠାଇଦିଆଯାଇଛି। ପ୍ରକାଶ ଯେ, ଜଣେ ନାବାଳିକାଙ୍କୁ ଥାନା ଭିତରେ ବଳାତ୍କାର ପରେ ଗର୍ଭପାତ କରାଇବା ଅଭିଯୋଗରେ ସୁନ୍ଦରଗଡ ଜିଲା ବୀରମିତ୍ରପୁରର ପୂର୍ବତନ ଥାନା ଅଧିକାରୀ ଆନନ୍ଦ ଚନ୍ଦ୍ର ମାଝିଙ୍କୁ ଗତ ୧ ତାରିଖରେ କ୍ରାଇମ୍ବ୍ରାଞ୍ଚ ଗିରଫ କରିଥିଲା।
