ପୁରୀ ଅଫିସ,୨୨।୧: ହଟିଛି କୋଭିଡ୍ ନେଗେଟିଭ୍ ରିପୋର୍ଟ କଟକଣା। ଦାରୁଦିଅଁଙ୍କ ଦର୍ଶନ ପାଇଁ ଶ୍ରୀମନ୍ଦିରକୁ ଛୁଟିଛନ୍ତି ଶ୍ରଦ୍ଧାଳୁ। ରାଜ୍ୟ ତଥା ରାଜ୍ୟ ବାହାରୁ ବହୁ ସଂଖ୍ୟାରେ ଦର୍ଶନାର୍ଥୀ ଗୁରୁବାର ଶ୍ରୀଜୀଉଙ୍କ ଦର୍ଶନ କରିଛନ୍ତି। ଗୁରୁବାର ସହଜ ଦର୍ଶନ ଆରମ୍ଭ ହୋଇଥିବାରୁ ଏଥିପାଇଁ ଶ୍ରୀମନ୍ଦିର ପ୍ରଶାସନ ବ୍ୟାପକ ପ୍ରସ୍ତୁତି କରିଥିଲା। ଶ୍ରୀମନ୍ଦିର ସମ୍ମୁଖ ଓ ପ୍ରବେଶ ଦ୍ୱାରକୁ ପୁଷ୍ପମାଳାରେ ସଜା ଯାଇଥିଲା। ମାର୍କେଟ ଛକରୁ ବ୍ୟାରିକେଡ୍ ବ୍ୟବସ୍ଥା ଲାଗୁ କରାଯାଇଥିଲା। ସକାଳ ୬ରୁ ୭ଟା ପର୍ଯ୍ୟନ୍ତ ପୁରୀ ସହରବାସୀ ଦର୍ଶନ କରି ସାରିବା ପରେ ୭ଟାରୁ ମାର୍କେଟ ଛକରୁ ବ୍ୟାରିକେଡ୍ରେ ସାଧାରଣ ଲୋକେ ପ୍ରବେଶ କରିଥିଲେ। ଥର୍ମାଲ ସ୍କ୍ରିନିଂ କରାଯିବାପରେ ଶ୍ରଦ୍ଧାଳୁଙ୍କୁ ମନ୍ଦିର ଭିତରକୁ ଛଡ଼ାଯାଇଥିଲା। ପୂର୍ବରୁ କିଓସ୍କୋ ଦର୍ଶନ ବ୍ୟବସ୍ଥାର ଅଂଶ ରହି ଆସିଥିଲା। ତେବେ ଗୁରୁବାର ଦର୍ଶନରେ କିଓସ୍କୋ ଦେଖିବାକୁ ମିଳି ନ ଥିଲା। କିଓସ୍କୋ ରହିବା ଫଳରେ ଦର୍ଶନରେ ବିଳମ୍ବ ହେଉଥିବା ଯୁକ୍ତି ବାଢ଼ି ପ୍ରଶାସନ ଏହାକୁ ବନ୍ଦ କରିଛି। ଦର୍ଶନାର୍ଥୀମାନେ ପ୍ରଥମେ ୨୨ପାହାଚ, ପାଟ ଅଗଣା, ସାତ ପାହାଚ, ଜୟବିଜୟ ଦ୍ୱାର ଦେଇ ଭିତରକାଠରେ ପହଞ୍ଚତ୍ ଶ୍ରୀଜୀଉଙ୍କୁ ଦର୍ଶନ କରିଛନ୍ତି। ଭୋର ୫ଟା ୨୫ରେ ମହାପ୍ରଭୁଙ୍କ ଦ୍ୱାର ଫିଟା ନୀତି ସମ୍ପାଦନ ହୋଇଥିଲା। ମହାପ୍ରଭୁଙ୍କ ମହାପ୍ରସାଦ ଆନନ୍ଦବଜାରରେ ସେବନ କରିବାର ସୁଯୋଗ ମିଳି ନ ଥିଲେ ମଧ୍ୟ ଆନନ୍ଦବଜାରରେ ଦିନ ତମାମ୍ ଅବଢ଼ା ବିକ୍ରି ହୋଇଛି। ଦୂରଦୂରାନ୍ତରୁ ଆସିଥିବା ଲୋକେ ଆନନ୍ଦବଜାରରୁ ଅବଢ଼ା କିଣି ଉତ୍ତର ଦ୍ୱାର ଦେଇ ଶ୍ରୀମନ୍ଦିରରୁ ପ୍ରସ୍ଥାନ କରିଥିବା ଦୃଶ୍ୟ ସାମ୍ନାକୁ ଆସିଛି।
ଅନ୍ୟପକ୍ଷରେ ପ୍ରଶାସନ ପକ୍ଷରୁ ବରିଷ୍ଠ ନାଗରିକ ଓ ଦିବ୍ୟାଙ୍ଗଙ୍କ ଦର୍ଶନ ସୁବିଧା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଥିଲା। ଏହି କାର୍ଯ୍ୟରେ ନିୟୋଜିତ ୨୫ଜଣ କର୍ମଚାରୀ ଦିନ ତମାମ୍ ଦର୍ଶନକୁ ଶୃଙ୍ଖଳିତ କରିଥିଲେ। ସେହିଭଳି ଦର୍ଶନ ବ୍ୟବସ୍ଥା ଉପରେ ପ୍ରତିକ୍ରିୟା ନେବା ପାଇଁ ଏକ ଅସ୍ଥାୟୀ କ୍ୟାମ୍ପ ମଧ୍ୟ ସ୍ଥାପନ କରାଯାଇଥିଲା। ଉତ୍ତର ଦ୍ୱାର ଦେଇ ଫେରୁଥିବା ଶ୍ରଦ୍ଧାଳୁଙ୍କୁ ଦର୍ଶନର ଅନୁଭୂତି ଓ ବ୍ୟବସ୍ଥାରେ ଥିବା ଅସୁବିଧାକୁ ପ୍ରଶାସନକୁ ଜଣାଇବା ପାଇଁ ଅପିଲ୍ କରାଯାଇଥିଲା। ଏସ୍ପି କନୱର ବିଶାଲ ସିଂ କ୍ୟାମ୍ପରେ ଉପସ୍ଥିତ ରହି ସାଧାରଣ ଲୋକଙ୍କ ସହ ଆଲୋଚନା କରିଥିଲେ। ଜିଲାପାଳ ସମର୍ଥ ବର୍ମା ଓ ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷ୍ଣନ କୁମାର ମଧ୍ୟ ଗୁରୁବାର ଦର୍ଶନ ସମୟରେ ଶ୍ରୀମନ୍ଦିର ସମ୍ମୁଖରେ ଦର୍ଶନ ବ୍ୟବସ୍ଥାର ତତ୍ତ୍ବାବଧାନ କରୁଥିବା ଦେଖିବାକୁ ମିଳିଥିଲା। ଅନ୍ୟପକ୍ଷରେ ପୋଲିସ ପ୍ରଶାସନ ୨୬ ପ୍ଲାଟୁନ୍ ଫୋର୍ସ ନିୟୋଜନ କରି ଶୃଙ୍ଖଳିତ ଦର୍ଶନ ବ୍ୟବସ୍ଥା ଉପରେ ଗୁରୁତ୍ୱ ଦେଇଥିଲା। ଦର୍ଶନ ସମୟରେ ପାନୀୟ ଜଳ, ଆମ୍ବୁଲାନ୍ସ, ଦମକଳ ବାହିନୀର ବ୍ୟାପକ ବ୍ୟବସ୍ଥା ହୋଇଥିଲା।
