ଢେଙ୍କାନାଳ ଅଫିସ, ୧୨।୩: ଢେଙ୍କାନାଳ ଜିଲା କଙ୍କଡ଼ାହାଡ଼ ଥାନା ବୀରାଶାଳା ଆଞ୍ଚଳିକ ଡିଗ୍ରୀ କଲେଜର ପୂର୍ବତନ ଅଧ୍ୟକ୍ଷ ଅଟଳ ବିହାରୀ ବାରିକ ଗିରଫ ହୋଇଛନ୍ତି। ତାଙ୍କ ବିରୋଧରେ ଜାଲ ପ୍ରମାଣପତ୍ର ଦେଇ ଅଧ୍ୟକ୍ଷ ପଦବୀ ହାତେଇବା ଏବଂ ଶିକ୍ଷାନୁଷ୍ଠାନର ୪ ଲକ୍ଷ ଟଙ୍କା ଆତ୍ମସାତ୍ କରିଥିବା ଅଭିଯୋଗ ହୋଇଥିଲା। ଦୀର୍ଘ ୫ବର୍ଷ ହେଲା ସେ ପୋଲିସ ଆଖିରେ ଧୂଳିଦେଇ ଫେରାର ଥିଲେ। ଯାଜପୁର ଜିଲା ସୁକିନ୍ଦା ଥାନା ବରଡ଼ିସ୍ଥିତ ନିଜସ୍ବ ଘରେ ଆତ୍ମଗୋପନ କରି ରହିଥିବା ସୂଚନା ପାଇ ଶନିବାର ଏକ ପୋଲିସ ଟିମ୍ ଚଢ଼ାଉ କରି ତାଙ୍କୁ ଗିରଫ କରିଛି।
ସୂଚନାଯୋଗ୍ୟ, ବୀରାଶାଳା ଆଞ୍ଚଳିକ ଡିଗ୍ରୀ କଲେଜରେ ୨୦୦୮ରୁ ୨୦୧୮ ଯାଏ ଅଧ୍ୟକ୍ଷ ପଦବୀରେ ରହିଥିଲେ ଅଟଳବିହାରୀ। ସେ ଛତିଶଗଡ଼ର ରବିଶଙ୍କର ଶୁକ୍ଳା ବିଶ୍ୱବିଦ୍ୟାଳୟରୁ ସ୍ନାତକୋତ୍ତର (ପିଜି) ପାସ୍ କରିଥିବା କହି ଜାଲ ପ୍ରମାଣପତ୍ର ଦାଖଲ କରି କଲେଜ ଅଧ୍ୟକ୍ଷ ପଦବୀକୁ କରାୟତ୍ତ କରିଥିଲେ। କେବଳ ଏତିକି ନୁହେଁ, ଶିକ୍ଷାନୁଷ୍ଠାନର ଉନ୍ନୟନ ବାବଦ ବହୁ ଲକ୍ଷ ଟଙ୍କା ଆତ୍ମସାତ୍ କରିଥିବା ନେଇ ତାଙ୍କ ସହକର୍ମୀ ଏବଂ ଛାତ୍ରୀଛାତ୍ର କାମାକ୍ଷାନଗର ଉପଖଣ୍ଡ ଦାୟିତ୍ୱରେ ଥିବା ସେତେବେଳର ଉପଜିଲାପାଳ କଳ୍ପତରୁ ବେହେରାଙ୍କ ନିକଟରେ ଅଭିଯୋଗ କରିଥିଲେ। ତତ୍କାଳୀନ ଜିଲାପାଳ ବେହେରା ସୂଚନା ଅଧିକାର ଆଇନ ବଳରେ ଏ ସଂକ୍ରାନ୍ତ ତଥ୍ୟ ଲୋଡ଼ିଥିବା ବେଳେ ହସ୍ତଗତ ହୋଇଥିବା ସୂଚନାରୁ ଅଭିଯୋଗ ସତ୍ୟ ବୋଲି ପ୍ରମାଣିତ ହୋଇଥିଲା। ଏହାପରେ ଅଟଳବିହାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଙ୍କଡ଼ାହାଡ଼ ଥାନାରେ ଏକ ମାମଲା (ନଂ ୫୧/୧୮) ରୁଜୁ କରାଯାଇଥିଲା। ଏହାପରେ ଦୀର୍ଘ ୫ବର୍ଷ ହେଲା ଅଭିଯୁକ୍ତ ଫେରାର ଥିଲେ। ପୋଲିସ ତାଙ୍କୁ ଧରିବା ଲାଗି ବିଭିନ୍ନ ସମୟରେ ଚଢ଼ାଉ ଜାରି ରଖିଥିଲେ ମଧ୍ୟ ତାଙ୍କର କୌଣସି ସନ୍ଧାନ ମିଳୁ ନ ଥିଲା। ଏସ୍ପି ଜ୍ଞାନରଞ୍ଜନ ମହାପାତ୍ରଙ୍କ ନିର୍ଦ୍ଦେଶରେ ଏସ୍ଡିପିଓ ରଞ୍ଜନ କୁମାର ଦେଙ୍କ ନେତୃତ୍ୱରେ ଥାନାଧିକାରୀ ନିର୍ମଳା ଗୋଚ୍ଛାୟତ ଏବଂ ଅନ୍ୟ ପୋଲିସ କର୍ମଚାରୀମାନେ ଶନିବାର ତାଙ୍କୁ ବରଡ଼ିସ୍ଥିତ ବାସଭବନରୁ ଗିରଫ କରିଥିଲେ। ଅଭିଯୁକ୍ତଙ୍କୁ ଅପରାହ୍ନରେ କୋର୍ଟ ଚାଲାଣ କରାଯାଇଥିବା ଥାନାଧିକାରୀ ଗୋଚ୍ଛାୟତ ସୂଚନା ଦେଇଛନ୍ତି।
