ଭୁବନେଶ୍ୱର,୧୫।୩(ବ୍ୟୁରୋ):ଶିମିଳିପାଳ ସମେତ ରାଜ୍ୟର ବିଭିନ୍ନ ଜଙ୍ଗଲରେ ଲାଗିଥିବା ନିଆଁ ସମ୍ପୂର୍ଣ୍ଣ ନିୟନ୍ତ୍ରଣାଧୀନ ରହିଛି। ରାଜ୍ୟ ସରକାର ତୁରନ୍ତ ଓ ସକ୍ରିୟ ପଦକ୍ଷେପ ନେଇଥିବାବେଳେ ସ୍ଥାନୀୟ ଜନସାଧାରଣଙ୍କ ସମସ୍ତ ପ୍ରକାର ନିରନ୍ତର ସହଯୋଗ ଯୋଗୁ ଏହା ସମ୍ଭବ ହୋଇପାରିଛି ବୋଲି ଫରେଷ୍ଟ ଫାୟାର ଟାସ୍କ ଫୋର୍ସ ଅଧ୍ୟକ୍ଷ ସନ୍ଦୀପ ତ୍ରିପାଠୀ କହିଛନ୍ତି।
ଜଙ୍ଗଲ ନିଆଁ ସଂକ୍ରାନ୍ତରେ ରବିବାର ସୂଚନା ଦେଇ ସେ କହିଛନ୍ତି, ଗତ ମାସେ ହେବ ରାଜ୍ୟର ଅନେକ ଜଙ୍ଗଲରେ ନିଆଁ ଲାଗିଛି। ଏହାକୁ ଆୟତ୍ତ କରିବା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ପିସିସିଏଫ୍ କାର୍ଯ୍ୟାଳୟର ଏଫ୍ଆଇଟିଜିସି ସେଲ୍ ମାଧ୍ୟମରେ ରାତ୍ରି ପାଟ୍ରୋଲିଂ ସମେତ କ୍ଷେତ୍ର ଅଧିକାରୀଙ୍କ ଅଗ୍ନି ନିର୍ବାପକ ପ୍ରୟାସ ଉପରେ ୨୪ ଘଣ୍ଟିଆ ତଦାରଖ କରାଯାଉଛି। ବିଟ୍-ଗାର୍ଡଙ୍କ ସହ ସମସ୍ତ ସ୍ତରର ବନକ୍ଷେତ୍ର କର୍ମଚାରୀଙ୍କୁ ଡେରାଡୁନ୍ ଫରେଷ୍ଟ ସର୍ଭେ ଅଫ୍ ଇଣ୍ଡିଆରୁ ପ୍ରାପ୍ତ ବନାଗ୍ନି ସତର୍କ ସୂଚନା ଦିଆଯାଉଛି। ଫରେଷ୍ଟ ଫାୟାର୍ ପଏଣ୍ଟ୍ଗୁଡ଼ିକ ସମ୍ପର୍କରେ ସୂଚନା ମିଳିବା ପରେ ଅବିଳମ୍ବେ ତାହାକୁ ନିର୍ବାପିତ କରିବା ସହିତ ବିହିତ କାର୍ଯ୍ୟାନୁଷ୍ଠାନର ତଥ୍ୟ ଓ ଫଟୋ ପ୍ରଦତ୍ତ ପଞ୍ଜୀକୃତ ମୋବାଇଲ୍ ଫୋନ୍ ମାଧ୍ୟମରେ ଅପ୍ଲୋଡ୍ ପାଇଁ ନିର୍ଦ୍ଦେଶ ଦିଆଯାଇଛି। ଏହାଦ୍ୱାରା ମୁଖ୍ୟାଳୟ ଦ୍ୱାରା ବନାଗ୍ନି ନିୟନ୍ତ୍ରଣ ପ୍ରସ୍ତୁତିର ଅନ୍ଲାଇନ୍ ମନିଟରିଂ ପାଇଁ ସହାୟକ ହେଉଛି। ଫଳରେ ରାଜ୍ୟର ଆଉ କ୍ରମାଗତ ବନାଗ୍ନି ଦୃଶ୍ୟ ଦୃଷ୍ଟିଗୋଚର ହୋଇନାହିଁ। ୯୫ ପ୍ରତିଶତରୁ ଅଧିକ କ୍ଷେତ୍ର ଅଧିକାରୀଙ୍କ ତଥ୍ୟରୁ ଏହା ଜଣାପଡୁଛି। ସେହିଭଳି ଏଫ୍ଏସ୍ଆଇ ଆଲର୍ଟ ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା ଜଙ୍ଗଲଗୁଡ଼ିକରେ କ୍ରମାଗତ ନିଆଁ ଲାଗିବା ଘଟଣା ପ୍ରାୟତଃ ନାହିଁ। ତେବେ ଅଗ୍ନିକାଣ୍ଡ ପରିସ୍ଥିତିକୁ ହ୍ରାସ କରିବା ପାଇଁ ବିଶେଷ କରି ଚିହ୍ନଟ ହୋଇଥିବା ବନାଗ୍ନି ପ୍ରବଣ ଅଞ୍ଚଳରେ ବର୍ଦ୍ଧିତ ମାନବ ଶକ୍ତି ଏବଂ ଭିତ୍ତିଭୂମିକୁ ଆବଶ୍ୟକସ୍ଥଳେ ସ୍ଥାନାନ୍ତର କରି ନିୟୋଜିତ କରାଯାଉଛି ବୋଲି ସେ ସୂଚନା ଦେଇଛନ୍ତି।
ସେପଟେ ଶିମିଳପାଳ ଓ ରାଜ୍ୟରେ ବନାଗ୍ନି ସ୍ଥିତିର ଅନୁଧ୍ୟାନରେ ଆସିଥିବା କେନ୍ଦ୍ରୀୟ ଟିମ୍ ସୋମବାର ସରକାରଙ୍କ ସହ ଆଲୋଚନା କରିବେ। ଏହି ଟିମ୍ ପ୍ରଥମେ ଶିମିଳିପାଳ ଯାଇ ତଦାରଖ କରିବା ପରେ କୁଲଡିହା ଅଭୟାରଣ୍ୟ ପରିଦର୍ଶନ କରିଥିଲେ। ରବିବାର ସ୍ଥାନୀୟ ବନକ୍ଷେତ୍ର ଅଧିକାରଙ୍କ ସହ ଚନ୍ଦକା ଅଭୟାରଣ୍ୟ ପରିଦର୍ଶନ କରିଛନ୍ତି। ଏ ସମସ୍ତ ବିଷୟରେ କେନ୍ଦ୍ରୀୟ ଟିମ୍ ସରକାରଙ୍କ ସହ ଆଲୋଚନା କରିବେ ବୋଲି ସନ୍ଦୀପ ତ୍ରିପାଠୀ କହିଛନ୍ତି।
