ନୟାଗଡ଼,୧୭।୧୨(ଲୋକନାଥ ମିଶ୍ର)ନୟାଗଡ଼ ଡିଏଫ୍ଓଙ୍କ ନୂଆ କ୍ୱାର୍ଟର୍ସ ନିର୍ମାଣ ଓ ପୁରୁଣା କ୍ୱାର୍ଟର୍ସ ମରାମତିରେ ଅନିୟମିତତା ଅଭିଯୋଗ ଆସିବା ପରେ ଏହାର ତଦନ୍ତ ନ ହୋଇ ପ୍ରସଙ୍ଗକୁ ଚାପି ଦେବାକୁ ଚେଷ୍ଟା ଚାଲିଛି। ତେବେ ବନବିଭାଗରୁ ଡିଏଫ୍ଓଙ୍କ କ୍ୱାର୍ଟର୍ସକୁ ନେଇ ମିଳିଥିବା ଆରଟିଆଇ ତଥ୍ୟ ଏହି ଅନିୟମିତତାର ଗୁମରକୁ ପଦାରେ ପକାଇଛି ା ଏହାକୁ ନେଇ ଡିଏଫ୍ଓଙ୍କ ସ୍ବଚ୍ଛତା ଉପରେ ପ୍ରଶ୍ନବାଚୀ ଲଗାଇଛି । ପର୍ବତ ୨ କିସମରେ ଡିଏଫ୍ଓଙ୍କ ନୂଆ କ୍ୱାର୍ଟର୍ସ ନିର୍ମାଣ ହେବା ବେଆଇନ ହୋଇଥିଲେ ହେଁ ଆଇନକୁ ଦଳି ଚକଟି କ୍ୱାର୍ଟର୍ସ ନିର୍ମାଣ ହୋଇଛି । ପୁଣି କ୍ୱାର୍ଟର୍ସ ନିର୍ମାଣ ପାଇଁ ନୟାଗଡ଼ ତହସିଲଦାରଙ୍କ ଠାରୁ ଅନୁମତି ନିଆଯାଇନାହିଁ । ଅନ୍ୟପକ୍ଷେ ଡିଏଫ୍ଓଙ୍କ ପୁରୁଣା କ୍ୱାର୍ଟର୍ସକୁ ବିପଦସଙ୍କୁଳ ଘୋଷଣା ପରେ ବି ସରକାରୀ ଅନୁଦାନ ଖର୍ଚ୍ଚ ହୋଇଛି ।
ଆରଟିଆଇରେ ମିଳିଥିବା ତଥ୍ୟ କହୁଛି, ୧୫।୯।୨୦୨୨ରେ ଡିଏଫ୍ଓଙ୍କ ପୁରୁଣା କ୍ୱାର୍ଟର୍ସକୁ ପୂର୍ତ୍ତ ବିଭାଗର ସୁପରିଟେଣ୍ଡଣ୍ଟ ଇଞ୍ଜିନିୟର(ଏସସି) ବିପଦସଙ୍କୁଳ ଘୋଷଣା କରିଛନ୍ତି । ତେବେ ଡିଏଫ୍ଓଙ୍କ ପୁରୁଣା କ୍ୱାର୍ଟର୍ସରେ ୨୦୧୯ ଜାନୁୟାରୀରୁ ଡିସେମ୍ବର ୨୦୨୨ ପର୍ଯ୍ୟନ୍ତ ମରାମତି ବାବଦକୁ ୧୧ ଲକ୍ଷ ୮୭୮ ହଜାର ୫୪୫ ଟଙ୍କା ଖର୍ଚ୍ଚ ହୋଇଛି । ଯଦି ନୂଆ କ୍ୱାର୍ଟର୍ସ ନିର୍ମାଣ କରିବାର ଥିଲା ତେବେ ପରିତ୍ୟକ୍ତ କ୍ୱାର୍ଟର୍ସରେ ୧୧ ଲକ୍ଷ ୭୮ ହଜାର ୮୪୫ ଟଙ୍କା କାହିଁକି ଖର୍ଚ୍ଚ କରାଗଲା । ନୟାଗଡ଼ ବନଖଣ୍ଡରେ ଡିଏଫ୍ଓଙ୍କ ନୂଆ କ୍ୱାର୍ଟର୍ସ ନିର୍ମାଣ ଓ ପୁରୁଣା କ୍ୱାର୍ଟର୍ସ ମରାମତିରେ ପ୍ରାୟ ୬୫ ଲକ୍ଷ ଖର୍ଚ୍ଚ ପରେ ବି ଜିଲା ପ୍ରଶାସନ ପକ୍ଷରୁ ଅନିୟମିତତା ବିରୋଧରେ କୌଣସି କାର୍ଯ୍ୟାନୁଷ୍ଠାନ ନ କରି ଡିଏଫ୍ଓଙ୍କୁ ଅନୁକମ୍ପା ପ୍ରଦର୍ଶନ ସାଧାରଣରେ ଅସନ୍ତୋଷ ଓ ଉଦ୍ବେଗ ସୃଷ୍ଟି କରିଛି ।
ଅଭିଯୋଗ ଅନୁଯାୟୀ, ନୟାଗଡ଼ ଜିଲାପାଳଙ୍କ ଆବାସିକ କାର୍ଯ୍ୟାଳୟ ପୂର୍ବରୁ ଖାତା ନଂ.୧୨୫୯, ପ୍ଲଟ ନଂ.୫୮୫ ରେ ବନବିଭାଗର ଏକ ନର୍ସରୀ ରହିଥିଲା । ନର୍ସରୀଟି ୫୧ ଡେସିମିଲ ଜମିରେ ଥିଲା । ନର୍ସରୀକୁ ବାରପଲ୍ଲା ସ୍ଥାନାନ୍ତରିତ କରାଇ ସଂପୃକ୍ତ ଜମି ଉପରେ ଡିଏଫ୍ଓଙ୍କ ନୂଆ କ୍ୱାର୍ଟର୍ସ ନିର୍ମାଣ ହୋଇଥିଲା । ଡିଏଫ୍ଓଙ୍କ ନୂଆ କ୍ୱାର୍ଟର୍ସରେ ୫୩ ଲକ୍ଷ ଖର୍ଚ୍ଚ ହୋଇଛି। ପୁରୁଣା କ୍ୱାର୍ଟର୍ସ ବିପଦସଙ୍କୁଳ ହେବା ପରେ ବିପଦସଙ୍କୁଳ ଘୋଷଣା କରାଯାଇ ନୂଆ କ୍ୱାର୍ଟର୍ସ ନିର୍ମାଣ ହୋଇଛି । ପୁଣି ନୂଆ କ୍ୱାର୍ଟର୍ସ ନିର୍ମାଣରେ ୫୩ ଲକ୍ଷ ଖର୍ଚ୍ଚ ପରେବି ଟେଣ୍ଡର ନ ହୋଇ ଡିପାର୍ଟମେଣ୍ଟାଲି କାମ ହୋଇଛି । ଡିପାର୍ଟମେଣ୍ଟାଲି କାମ, କ୍ୱାର୍ଟର୍ସ ନିର୍ମାଣ ଓ ପୁରୁଣା କ୍ୱାର୍ଟର୍ସ ମରାମତି କାମ ସରକାରୀ ନୀତି ନିୟମ ଭିତ୍ତିରେ ହୋଇଛି ବୋଲିି ଗତ ଅକ୍ଟୋବର ମାସରେ ଡିଏଫ୍ଓ କ୍ଷମା ଷଡ଼ଙ୍ଗୀ ଧରିତ୍ରୀକୁ କହିଥିଲେ। ଯଦି ଡିଏଫ୍ଓଙ୍କ ସୂଚନା ଅନୁସାରେ ଅନିୟମିତତା ହୋଇନି ତେବେ ନୂଆ ଡିଏଫ୍ଓଙ୍କ କ୍ୱାର୍ଟର୍ସ ନିର୍ମାଣ ପାଇଁ କାହିଁକି ତହସିଲଦାରଙ୍କ ଅନୁମତି ନିଆଯାଇନି। ପୁରୁଣା କ୍ୱାର୍ଟର୍ସରେ ୧୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ପରେ କିପରି ବିପଦସଙ୍କୁଳ ଘୋଷଣା ହେଲା ତାହା ସନ୍ଦେହ ଘେରରେ। ଡିଏଫ୍ଓଙ୍କ ପୁରୁଣା କ୍ୱାର୍ଟର୍ସକୁ ପୂର୍ତ୍ତ ବିଭାଗର ସୁପରିଟେଣ୍ଡିଂ ଇଞ୍ଜିନିୟର (ଏସସି) ବିପଦସଙ୍କୁଳ ଘୋଷଣା ସନ୍ଦେହ ଘେରକୁ ଆସିଛି। ଡିଏଫ୍ଓଙ୍କ ପୁରୁଣା କ୍ୱାର୍ଟର୍ସ ଯାଞ୍ଚ କରାଗଲେ ବିପଦସଙ୍କୁଳ ଘଟଣାର ରହସ୍ୟ ଉନ୍ମୋଚନ ହେବବୋଲି ସାଧାରଣରେ ମତ ପ୍ରକାଶ ପାଇଛି।
