ଇସ୍ଲାମାବାଦ,୨୦ ୫: ବିଶ୍ୱ ଯେତେ ବିକଶିତ ହେଲେ ଓ ଆଗକୁ ବଢ଼ିଲେ ମଧ୍ୟ ସମ୍ବଳ ଓ କ୍ଷମତାର ଅଭାବ ଥିବା ଲୋକଙ୍କ ପାଇଁ ସ୍ବାଧୀନତା ଏକ ରହସ୍ୟମୟ ଧାରଣା। ଏବେ ବି ଅନେକ ଲୋକ ଗୋତି ଶ୍ରମିକ ଭଳି ଶୋଷଣମୂଳକ ବ୍ୟବସ୍ଥାରେ ଫସିରହିଛନ୍ତି। ନା ସରକାର ସେମାନଙ୍କ ପାଇଁ କିଛି କରୁଛି ନା ସମାଜ ସେମାନଙ୍କ ପାଇଁ ବ୍ୟସ୍ତ ହେଉଛି। ପାକିସ୍ତାନରେ ଏଭଳି ଏକ ହୃଦୟସ୍ପର୍ଶୀ ଘଟଣା ଘଟିଛି, ଯେଉଁଠି ଜଣେ ବିଦେଶୀ ଏକ ପରିବାରର ଋଣ ଶୁଝି ସେମାନଙ୍କୁ ୧୩୦ ବର୍ଷର ଦାସତ୍ୱରୁ ମୁକ୍ତ କରିଛନ୍ତି। ପାକିସ୍ତାନର ପଞ୍ଜାବ ପ୍ରଦେଶ ଅନ୍ତର୍ଗତ କସୁର ଅଞ୍ଚଳରେ ଉକ୍ତ ପରିବାର ୪ ପିଢ଼ି ହେଲା ଇଟା ଭାଟିରେ ଗୋତିଶ୍ରମିକ ଭାବେ କାମ କରିଆସୁଥିଲେ। ପୂର୍ବ ପିଢ଼ି ନେଇଥିବା ଋଣ ଶୁଝିପାରୁ ନ ଥିବାରୁ ସେମାନଙ୍କୁ ବହୁ ବର୍ଷ ଧରି ବିନା ପାରିଶ୍ରମିକରେ କାମ କରିବାକୁ ପଡ଼ୁଥିଲା।
‘ଏବେ ଦାସତ୍ୱର ଶେଷ’ ସ୍ଲୋଗାନ ସହ ଜୁବିଲି କ୍ୟାମ୍ପେନ୍ରେ ସମ୍ପୃକ୍ତ ଆରୋନ ହୁଚିଙ୍ଗ୍ସ ଇନ୍ଷ୍ଟାଗ୍ରାମ୍ରେ ଏକ ସମ୍ବେଦନଶୀଳ ଭିଡିଓ ଶେୟାର କରି ଉକ୍ତ ପରିବାରକୁ ମୁକ୍ତ କରିବା ବିଷୟ ଉଲ୍ଲେଖ କରିଛନ୍ତି। ଅଭିଯାନର ୫ମ ଦିନରେ ଆମେ ଯେତେବେଳେ ସେମାନଙ୍କ ପାଖକୁ ଗଲୁ ଆଖିରେ ଲୁହ ଆଣିଦେବା ଭଳି ମୁହୂର୍ତ୍ତ ଥିଲା। ଆବେଗଭରା ଭିଡିଓଟି ଖୁବ୍ଶୀଘ୍ର ଅନ୍ଲାଇନ୍ରେ ଚର୍ଚ୍ଚାକୁ ଆସିଥିଲା। ଉକ୍ତ ପରିବାରକୁ ଋଣମୁକ୍ତ କରି ସ୍ବାଧୀନ ଭାବେ ବଞ୍ଚତ୍ବା ସୁଯୋଗ ଦେଇଥିବା ହୁଚିଙ୍ଗ୍ସଙ୍କ ଉଦ୍ୟମ ଓ ସହାୟତାକୁ ସୋସିଆଲ ମିଡିଆରେ ଉଚ୍ଚ ପ୍ରଶଂସା କରାଯାଇଛି।
