ବଇଣ୍ଡା,୧୯।୧୦(ପରିକ୍ଷିତ ସାହୁ)ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ଥାନା ଅଞ୍ଚଳରେ ଥିବା ଏକ ବିଦେଶୀ ମଦ ଦୋକାନରୁ ବାଇକ୍ ଯୋଗେ ଗ୍ରାମାଞ୍ଚଳକୁ ପେଟି ପେଟି ମଦ ଚାଲାଣ କରାଯାଉଥିବା ଅଭିଯୋଗ ହେଉଛି। ପ୍ରତ୍ୟେକ ଦିନ ଏହି କାରବାର ଚାଲୁଥିଲେ ମଧ୍ୟ ପୋଲିସ ପକ୍ଷରୁ ଚଢାଉ କରାଯାଉ ନାହିଁ। ଫଳରେ ଗ୍ରାମାଞ୍ଚଳରେ ଚୋରା ମଦ କାରବାର ବୃଦ୍ଧି ପାଉଥିବାରୁ ସାଧାରଣରେ ଅସନ୍ତୋଷ ଦେଖାଯାଇଛି।
ଗ୍ରାମାଞ୍ଚଳର କେତେକ ଦୋକାନରେ ଚୋରା ମଦ ବ୍ୟବସାୟ କରାଯାଉଛି। ଏହି ଚୋରା ବ୍ୟବସାୟରେ ଅତ୍ୟଧିକ ଲାଭ ହେଉଥିବାରୁ କେତେଜଣ ଦୋକାନୀ ଏପରି ବେଆଇନ କାରବାର କରୁଛନ୍ତି। ବଇଣ୍ଡା ଅଞ୍ଚଳରେ ଥିବା ଏକ ବିଦେଶୀ ମଦ ବ୍ୟବସାୟୀ ବ୍ୟବସାୟ ବୃଦ୍ଧି କରିବା ପାଇଁ ବାଇକ୍ ମାଧ୍ୟମରେ ଗ୍ରାମାଞ୍ଚଳକୁ ମଦ ଚାଲାଣ କରୁଛନ୍ତି। ବିଶେଷକରି ପ୍ରତ୍ୟେକ ଦିନ ସକାଳେ ଓ ରାତି ସମୟରେ ଏହି ଚାଲାଣ କରାଯାଉଛି। ବଇଣ୍ଡା, ଗାଁ ବଇଣ୍ଡା, ଲୁହାମୁଣ୍ଡା, କଣ୍ଟେଇକୋଳିଆ, ମଧପୁର, ଜାମୁନାଳି, ଖଣ୍ଡବର, ଅଶୁ୍ରବାହାଳ, ବାଦିବାହଳ ଆଦି ସ୍ଥାନରେ ଚୋରା ବିଦେଶୀ ମଦ କାରବାର କରାଯାଉଛି। ସେହିପରି ଜାତୀୟ ରାଜପଥ କଡରେ ଥିବା କେତେକ ହୋଟେଲରେ ନିରାପଦରେ ଏହି କାରବାର କରାଯାଉଛି। ଅବକାରୀ ବିଭାଗର କେତେଜଣ କର୍ମଚାରୀଙ୍କ ସହ ସଲାସୁତରା କରି ଏହି ବ୍ୟବସାୟ କରୁଥିବା ବଇଣ୍ଡା ଗ୍ରାମବାସୀ ଅଭିଯୋଗ କରିଛନ୍ତି। ରବିବାର ରାତିରେ ଉକ୍ତ ମଦ ଦୋକାନର ଜଣେ କର୍ମଚାରୀ ବାଇକ୍ରେ ମଦ ଚାଲାଣ କରୁଥିବାବେଳେ ଧରାପଡି ହଟହଟା ହୋଇଥିଲେ। ଏହି ମଦ ବ୍ୟବସାୟ ଯୋଗୁ ଅନେକ ସମୟରେ ଗ୍ରାମାଞ୍ଚଳରେ ଗଣ୍ଡଗୋଳ ପରିସ୍ଥିତ ସୃଷ୍ଟି ହେଉଛି। ତୁରନ୍ତ ଏଥିପ୍ରତି ଅନୁଗୋଳ ଏସ୍ପି ଦୃଷ୍ଟି ଦେଇ ଚୋରା ମଦ କାରବାର ଉପରେ ରୋକ ଲଗାଇବା ପାଇଁ ବଇଣ୍ଡା ଗ୍ରାମବାସୀ ଦାବି କରିଛନ୍ତି। ଏ ନେଇ ହଣ୍ଡପା ଥାନା ଆଇଆଇସି ନମିତା ନାୟକ କହିଛନ୍ତି, ପୋଲିସ ପକ୍ଷରୁ ଚଢ଼ାଉ କରାଯାଇ ପୂର୍ବରୁ ୨ ଥର ମଦ କାଉଣ୍ଟର କର୍ମଚାରୀଙ୍କୁ ଗିରଫ କରାଯାଇଛି। ପୁଣି ଚଢ଼ାଉ କରାଯିବ।
