ରସୁଲପୁର,୨୫।୯(ଡି.ଏନ.ଏ.): ରସୁଲପୁର ତହସିଲ ଅଧୀନ ଭୋଟକା ପଞ୍ଚାୟତ ସେରପୁର ଗ୍ରାମର ସରକାରୀ ଜମିରୁ ଜବରଦଖଲ ଉଚ୍ଛେଦ କରାଯାଇଛି। ଉକ୍ତ ପଞ୍ଚାୟତ ସାନରମ୍ପେଇ ଗ୍ରାମର ସୁଧାକର ଦାସ ୪ବର୍ଷ ହେଲା ସେରପୁର ଗ୍ରାମର ଆବାଦଯୋଗ୍ୟ ଅନାବାଦୀ ଖାତା ନଂ.-୨୫୯, ପ୍ଲଟ ନଂ-୭୩୦ର ୧୩ ଡିସିମିଲି ଜମି ଜବରଦଖଲ କରିଥିଲେ। ସେଠାରେ ସେ ଏକ ଆଜ୍ବେଷ୍ଟସ୍ ଘର କରିଥିଲେ। ଉକ୍ତ ଘରକୁ ତହସିଲ ପ୍ରଶାସନ ଜେସିବି ଲଗାଇ ଭାଙ୍ଗି ଦେଇଛି। ଉଚ୍ଛେଦବେଳେ ଘରୁ କିଛି କାଠ ଓ ଲୁଗା ବୁଣାରେ ବ୍ୟବହୃତ ତନ୍ତ ଥିବା ଦେଖାଯାଇଥିଲା।
ଜମି ଜବରଦଖଲ ନେଇ ଗ୍ରାମବାସୀଙ୍କ ପକ୍ଷରୁ ନରସିଂହପୁର ରାଜସ୍ବ ନିରୀକ୍ଷକଙ୍କୁ ଅବଗତ କରାଯାଇଥିଲା। ୬ମାସ ତଳେ ରାଜସ୍ବ ନିରୀକ୍ଷକ ଦୁର୍ଜେୟ ଷଡ଼ଙ୍ଗୀ ତଦନ୍ତ କରି ଜବରଦଖଲ ହୋଇଥିବା ନେଇ ତହସିଲ କାର୍ଯ୍ୟାଳୟରେ ରିପୋର୍ଟ କରିଥିଲେ। ରିପୋର୍ଟ ମୁତାବକ ତହସିଲ ପକ୍ଷରୁ ସୁଧାକରଙ୍କୁ ନୋଟିସ କରାଯାଇଥିଲା। ନୋଟିସ ପାଇବା ସତ୍ତ୍ୱେ ସେ ତହସିଲଦାରଙ୍କ ନିକଟରେ କୌଣସି ତଥ୍ୟ ରଖି ନ ଥିଲେ। ତେଣୁ ୩ମାସ ତଳେ ତହସିଲଦାରଙ୍କ ପକ୍ଷରୁ ଘର ଭାଙ୍ଗିବାକୁ ନୋଟିସ ଜାରି କରାଯାଇଥିଲା। ସୁଧାକର ପୁଣି ସମୟ ମାଗିଥିଲେ। ମାତ୍ର ସମୟ ଅବଧି ମଧ୍ୟରେ ନିଜର ପକ୍ଷ ରଖିବାରେ ବିଫଳ ହୋଇଥିଲେ। ଶେଷରେ ଘର ଭାଙ୍ଗିବା ପାଇଁ ତହସିଲ ପକ୍ଷରୁ ୩ ଦିନିଆ ନୋଟିସ ଦିଆଯାଇଥିଲା।
ଶୁକ୍ରବାର ଅତିରିକ୍ତ ତହସିଲଦାର ମୋହନ ଜେନାଙ୍କ ନେତୃତ୍ୱରେ ନରସିଂହପୁର ରାଜସ୍ବ ନିରୀକ୍ଷକ ଦୁର୍ଯେୟ ଷଡ଼ଙ୍ଗୀ, ଆଦମପୁର ରାଜସ୍ବ ନିରୀକ୍ଷକ ମନୋଜ କବି, ପହଁଗା ରାଜସ୍ବ ନିରୀକ୍ଷକ ରମେଶ ଚନ୍ଦ୍ର ସାହୁ, ଭାରପ୍ରାପ୍ତ ସୁପରଭାଇଜର ସନ୍ତୋଷ ପରିଡ଼ା ପ୍ରମୁଖ ପହଞ୍ଚତ୍ ଉଚ୍ଛେଦ କାର୍ଯ୍ୟରେ ସାମିଲ ହୋଇଥିଲେ। ଆଇନ ଶୃଙ୍ଖଳାକୁ ଦୃଷ୍ଟିରେ ରଖି କୁଆଖିଆ ପୋଲିସ ପକ୍ଷରୁ ଫୋର୍ସ ମୁତୟନ କରାଯାଇଥିଲା। ତେବେ ତହସିଲ ପ୍ରଶାସନ ପକ୍ଷରୁ ନିଆଯାଇଥିବା ପଦକ୍ଷେପକୁ ନେଇ ସୁଧାକର ପରିବାର ଅସନ୍ତୋଷ ବ୍ୟକ୍ତ କରିଛନ୍ତି। ଭୋଟକା ପଞ୍ଚାୟତର ଅଧିକାଂଶ ସ୍ଥାନରେ ସରକାରୀ ଜମି ଜବରଦଖଲରେ ରହିଛି। ତାହାକୁ ପ୍ରଶାସନ ଉଚ୍ଛେଦ କରୁନାହିଁ। ଜଣେ ଗରିବ, ନିରୀହ ପରିବାର ହୋଇଥିବାରୁ ତହସିଲ ପ୍ରଶାସନ ତାଙ୍କ ପରିବାର ପ୍ରତି ଅନ୍ୟାୟ କରିଛି ବୋଲି ସେ ଅଭିଯୋଗ କରିଛନ୍ତି।
