ମୁମ୍ବାଇ: ବଲିଉଡ ଅଭିନେତା ଅମିର ଖାନ ଏବଂ ଅଭିନେତ୍ରୀ ଜୁହି ଚାୱଲା ପ୍ରଥମ ଥର ପାଇଁ ‘କୟାମତ ସେ କୟାମତ ତକ’ରେ ଏକାଠି ନଜର ଆସିଥିଲେ। କିନ୍ତୁ ଆପଣ ଜାଣନ୍ତି କି ‘ଇଶ୍କ’ ଚଳଚ୍ଚିତ୍ରର ଶୁଟିଂ ସମୟରେ ଉଭୟଙ୍କ ମଧ୍ୟରେ ଏକ ଛୋଟ କଥାକୁ ନେଇ ମତଭେଦ ହୋଇଥିଲା, ଯେଉଁଥିପାଇଁ ଦୁହେଁ ୬-୭ ବର୍ଷ ପର୍ଯ୍ୟନ୍ତ ପରସ୍ପର ସହ କଥା ହୋଇ ନ ଥିଲେ।
ଡକ୍ୟୁମେଣ୍ଟାରୀ ଚଳଚ୍ଚିତ୍ର ‘ରୁବରୁ ରୋଶନି’ର ପ୍ରମୋସନ ସମୟରେ ଅମିର ଖାନ ଏହି କାହାଣୀକୁ ମନେ ପକାଇଲେ। ସେ କହଥିଲେ ‘ଇଶ୍କର ଶୁଟିଂ ସମୟରେ ଆମେ ଏକ ଛୋଟ ପ୍ରସଙ୍ଗରେ ଝଗଡା କରିଥିଲୁ। ଏହା ଏକ ଛୋଟ ପ୍ରସଙ୍ଗ ଥିଲା, କିନ୍ତୁ ମୁଁ ଭାବୁଛି ମୁଁ ସେତେବେଳେ ଟିକିଏ ଅହଂକାରୀ ଥିଲି। ତେଣୁ ମୁଁ ସ୍ଥିର କଲି ଯେ ମୁଁ ତାଙ୍କ ସହିତ ଆଉ କଥାବାର୍ତ୍ତା କରିବି ନାହିଁ। ଶୁଟିଂ ସେଟ ଉପରେ ମଧ୍ୟ ମୁଁ ତାଙ୍କଠାରୁ ଦୂରତା ରଖୁଥିଲ। ମୁଁ ଜାଣେ ନାହିଁ ମୁଁ କାହିଁକି ଏହା କଲି। ଯେତେବେଳେ ସେ ଆସି ମୋ ସହିତ ବସନ୍ତି ସେତେବେଳେ ମୁଁ ବାହାରକୁ ଚାଲିଯାଏ। ମୁଁ ଯାଇ ତାଙ୍କଠାରୁ ଅତି କମରେ ୫୦ ଫୁଟ ଦୂରରେ ବସେ। ମୁଁ ତାଙ୍କୁ କେବେ ହେଲେ ନମସ୍କାର କହି ନଥିଲି, କେବଳ ସେହି ଦୃଶ୍ୟ ସମୟରେ ଆମେ ସେହି ପେସାଦାର କଥା କହୁଥିଲୁ ।
୨୦୦୨ରେ ରିନା ଦତ୍ତାଙ୍କ ସହିତ ଛାଡପତ୍ର ପରେ ଅମିର ଜୁହିଙ୍କ ସହ କଥା ହୋଇଥିଲେ। ଅମିର କହିଥିଲେ, ରିନାଙ୍କ ସହ ମୋର ଛାଡପତ୍ର ବିଷୟରେ ଜୁହି ଜାଣିବା ପରେ ସେ ମୋତେ ସାକ୍ଷାତ କରିବାକୁ ଡାକିଲେ। କାରଣ ସେ ଉଭୟ ରିନା ଏବଂ ମୋର ନିକଟତର ଥିଲେ ଏବଂ ସେ ଆମର ମତଭେଦ ସମାଧାନ କରିବାକୁ ଚାହୁଁଥିଲେ। ଜୁହି ବୋଧହୁଏ ଜାଣିଥିଲେ ଯେ ମୁଁ ତାଙ୍କ ଫୋନ ଉଠାଇବି ନାହିଁ, ତଥାପି ସେ ମୋତେ ଡାକିଲେ। ଏହି କଥା ମୋ ହୃଦୟକୁ ଛୁଇଁଲା। ସେବେଠାରୁ ମୁଁ ତାଙ୍କ ସହ କଥା ହୋଇଥିଲି ବୋଲି ଅମିର କହିଥିଲେ। ‘କୟାମତ ସେ କୟାମତ ତକ’ ଚଳଚ୍ଚିତ୍ର ପରେ ଉଭୟ ମିର ଏବଂ ଜୁହି ରାତାରାତି ଷ୍ଟାର ହୋଇଥିଲେ।
