ଢେଙ୍କାନାଳ ଅଫିସ,୨୭।୫: ରାଜ୍ୟରେ ହାତୀମୃତ୍ୟୁରେ ଅଙ୍କୁଶ ଲାଗିପାରୁନି। କେତେବେଳେ ଦୁର୍ଘଟଣା ତ ଆଉ କେବେ ରୋଗ ସଂକ୍ରମଣର ଶିକାର ହୋଇ ଚାଲିଯାଉଛି ଏହି ବିଶାଳକାୟ ସ୍ତନ୍ୟପାୟୀ ପ୍ରାଣୀଙ୍କ ଜୀବନ। ବିଶେଷ କରି ହାତୀ ଚଲାପଥ ଦେଇ ବିଛାଯାଇଥିବା ରେଳ ଧାରଣା ଗଜରାଜଙ୍କ ପାଇଁ ପାଲଟିଛି ମରଣଯନ୍ତା। ଐତିହ୍ୟ ପ୍ରାଣୀ ତାଲିକାଭୁକ୍ତ ହାତୀବଂଶ ବିପଦରେ ପଡ଼ିଥିବାବେଳେ ସେମାନଙ୍କ ସୁରକ୍ଷା ପାଇଁ କେନ୍ଦ୍ର ସରକାର ଅଣ୍ଟା ଭିଡ଼ିଛନ୍ତି। ଏଥିପାଇଁ କରାଯାଇଛି ମାଷ୍ଟର ପ୍ଲାନ୍। ହାତୀବହୁଳ ଢେଙ୍କାନାଳ ଜିଲାର ରେଳଧାରଣା ନିକଟବର୍ତ୍ତୀ ହସ୍ତୀ ଚଲାପଥ ଉପରେ ନଜର ରଖିବାକୁ ଏଣିକି ନିର୍ମାଣ ହେବ ୱାଚ୍ ଟାୱାର। ଟାଓ୍ବାର ପିଛା ଖର୍ଚ୍ଚ ହେବ ୨୦ରୁ ୨୫ ଲକ୍ଷ ଟଙ୍କା। ଏଥିପାଇଁ ପ୍ରାରମ୍ଭିକ ପର୍ଯ୍ୟାୟରେ ୪ଟି ସ୍ଥାନ ଚିହ୍ନଟ କରାଯାଇଥିବାବେଳେ ମଞ୍ଜୁର ହୋଇଛି ଅନୁଦାନ।
ଜିଲା ବନ ବିଭାଗ ସୂତ୍ରରୁ ମିଳିଥିବା ସୂଚନା ଅନୁଯାୟୀ, କପିଳାସ ଅଭୟାରଣ୍ୟଠାରୁ କଟକ ଜିଲା ଆଠଗଡ଼ ଯାଏ ଏକାଧିକ ହାତୀ ଚଲାପଥ ରହିଛି। ଉକ୍ତ ଅଞ୍ଚଳ ଦେଇ ଯାଇଥିବା ରେଳ ଧାରଣା ପାର୍ ହୋଇ ଦୈନିକ ହାତୀପଲ ଉଭୟପାର୍ଶ୍ୱକୁ ଚଳପ୍ରଚଳ କରିଥାଆନ୍ତି। ତେଣୁ ଦ୍ରୁତଗାମୀ ଟ୍ରେନ୍ ଧକ୍କାରେ ହାତୀଙ୍କ ଜୀବନ ଯିବା ଭୟ ଲାଗି ରହୁଛି। ସମସ୍ୟାର ସମାଧାନ ପାଇଁ ରାଜଆଠଗଡ଼-ଯୋରନ୍ଦା ରୋଡ୍ ଷ୍ଟେଶନ ମଧ୍ୟରେ ଏକ ଓଭରପାସ୍ ନିର୍ମାଣ କରାଯିବ। ଏଥିଲାଗି ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି। ସେହିପରି ଜିଲାର ସମ୍ବେଦନଶୀଳ ତଥା ହାତୀ ଚଳପ୍ରଚଳ କରୁଥିବା ରେଳଧାରଣା ନିକଟରେ ୱାଚ ଟାୱାର ନିର୍ମାଣ କରାଯିବ। ଏଥିଲାଗି ହଳଦିଆବାହାଳ, ଚିନ୍ତାପୋଖରୀ, ରସାସିଂହ, ଗୁଣୁଦେଇ ନିକଟବର୍ତ୍ତୀ ୪ ସ୍ଥାନ ଚିହ୍ନଟ କରାଯାଇଛି। ସୋଲାର ଆଲୋକ ବିଶିଷ୍ଟ ପ୍ରତି ଟାଓ୍ବାର ନିର୍ମାଣ ପାଇଁ ୨୦ରୁ ୨୫ ଲକ୍ଷ ଟଙ୍କା ଖର୍ଚ୍ଚ ହେବ। ହାତୀଙ୍କ ଗତିବିଧି ଉପରେ ନଜର ରଖିବାକୁ ସୁରକ୍ଷା କର୍ମୀ ମୁତୟନ ହେବେ। ଏଥିଲାଗି ବନ ବିଭାଗ ଓ ରେଳ ବିଭାଗ ମଧ୍ୟରେ ଆଲୋଚନା ସରିଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, ଟେନ୍ ଲାଇନ୍ ନିକଟବର୍ତ୍ତୀ ହାତୀ ଉପଦ୍ରୁତ ଅଞ୍ଚଳରେ ଓ୍ବାଚ୍ ଟାଓ୍ବାର ନିର୍ମାଣ ପାଇଁ କେନ୍ଦ୍ର ସରକାରଙ୍କ ପକ୍ଷରୁ ଅନୁଦାନ ଆସିଛି। ଟ୍ରେନ୍ ଧାରଣାରେ ହାତୀମୃତ୍ୟୁ ରୋକିବା ଲାଗି ଗୁରୁତ୍ୱ ଦିଆଯାଉଛି। ହାତୀ ଚଲାପଥ ଦେଇ ଯାତାୟାତ ବେଳେ ଟ୍ରେନ୍ ବେଗ କମ୍ କରିବାକୁ ଖୋର୍ଦ୍ଧାରୋଡ୍ କଣ୍ଟ୍ରୋଲ୍ ରୁମ୍କୁ ଅବଗତ କରାଯାଉଥିବା ସେ ସୂଚନା ଦେଇଛନ୍ତି।
