ବର୍ତ୍ତମାନ ବର୍ଷାଦିନ। ଏହି ସମୟରେ ଖାଦ୍ୟପେୟ ପ୍ରତି ଅଧିକ ସତର୍କ ରହିବା ନିହାତି ଜରୁରୀ। କାରଣ ଉକ୍ତ ଋତୁରେ ଖାଇବାରେ ଏପଟସେପଟ ହେଲେ ପେଟଜନିତ ରୋଗ ହେବାର ଆଶଙ୍କା ରହିଛି। ଅନେକେ ନିଜର ମନୋଲୋଭା ଖାଦ୍ୟ ଖାଇବାକୁ ପସନ୍ଦ କରିଥାଆନ୍ତି। ବିଶେଷ ଭାବରେ ଯୁବପିଢ଼ି ଫାଷ୍ଟଫୁଡ୍ ଜାତୀୟ ଖାଦ୍ୟ ଖାଇବାକୁ ମନ ବଳାଇଥାଆନ୍ତି। ହେଲେ ଏପରି ଖାଦ୍ୟ ଅଭ୍ୟାସରେ ପରିଣତ ହେଲେ ତାହା କେତେକ ରୋଗର କାରଣ ହୋଇଥାଏ। ବର୍ଷାଦିନେ ଏଣୁତେଣୁ ଖାଦ୍ୟ ଖାଇଲେ ଏବଂ ଦୂଷିତ ପାଣି ପିଇଲେ ତାହା ଫୁଡ୍ ପଏଜନିଂ ପରି ସମସ୍ୟା ସୃଷ୍ଟି କରିଥାଏ। ପୁଣି ଏହି ସମସ୍ୟା ଯଦି ଗୁରୁତର ହେଲା ତେବେ ହସ୍ପିଟାଲରେ ଆଡ୍ମିଶନ ହୋଇ ଚିକିତ୍ସିତ ହେବାକୁ ପଡ଼େ। ତେବେ ଏପରି ସ୍ବାସ୍ଥ୍ୟ ସମସ୍ୟାଠାରୁ କିପରି ନିଜକୁ ଦୂରେଇ ରଖିବେ ସେଥିପାଇଁ କେତୋଟି ବିଷୟ ପ୍ରତି ସତର୍କ ରହିବାକୁ ପଡ଼ିଥାଏ। ପ୍ରଥମତଃ ଖାଦ୍ୟ ଖାଇବା ପୂର୍ବରୁ ଭଲ ଭାବରେ ସାବୁନ୍ରେ ହାତ ଧୁଅନ୍ତୁ। କାରଣ ହାତ ଉପରକୁ ଯେତେ ପରିଷ୍କାର ଦେଖାଯାଉଥିଲେ ମଧ୍ୟ ସେଥିରେ ଜୀବାଣୁ ଲୁଚି ରହିଥାଆନ୍ତି। ଏହି ଋତୁରେ ଯଦି ଫଳମୂଳ ଖାଉଛନ୍ତି ତେବେ ସେଗୁଡ଼ିକୁ ପ୍ରଥମେ ପରିଷ୍କାର ପାଣିରେ ଭଲ ଭାବରେ ଧୁଅନ୍ତୁ। ତା’ପରେ ଖାଆନ୍ତୁ। ସବୁବେଳେ ତଟକା ଖାଦ୍ୟ ଖାଆନ୍ତୁ। ରୋଷେଇ ହୋଇଥିବା ଖାଦ୍ୟ ପଦାର୍ଥକୁ ଭଲ ଭାବରେ ପରିଷ୍କାର ବାସନକୁସନରେ ଘୋଡ଼ାଇ ରଖନ୍ତୁ। ବର୍ଷା ହେଉ ଅବା ଅନ୍ୟ କୌଣସି ଋତୁ-ଏହି ସମୟରେ ବାସି ଖାଦ୍ୟ ଆଦୌ ଖାଆନ୍ତୁ ନାହିଁ। କାରଣ ଏହା ପେଟଜନିତ ରୋଗ ସୃଷ୍ଟି କରିବାରେ ସାହାଯ୍ୟ କରିଥାଏ। ଖାଦ୍ୟ ପଦାର୍ଥଗୁଡ଼ିକୁ ପରିଷ୍କାର ସ୍ଥାନରେ ରଖନ୍ତୁ। ଏହି ଋତୁରେ ଯେତେ ଫାଷ୍ଟଫୁଡ୍ ଏବଂ ମସଲାଜାତୀୟ ଖାଦ୍ୟ କମ୍ ଖାଇବେ ସେତେ ଭଲ। ବାହାର ଖାଦ୍ୟ ଖାଉଥିଲେ ତାହାର ଗୁଣବତ୍ତା ସମ୍ପର୍କରେ ପ୍ରଥମେ ଜାଣିନିଅନ୍ତୁ। ଯଦି କୌଣସି ଖାଦ୍ୟ ଖାଇବା ଉପଯୋଗୀ ନୁହେଁ କିମ୍ବା ଅଳ୍ପ ସମୟ ରହିବା ପରେ ଖରାପ ହୋଇଯିବ ବୋଲି ଭାବୁଛନ୍ତି ତେବେ ସେପରି ଖାଦ୍ୟକୁ ସାଇତି ରଖିବା ପରିବର୍ତ୍ତେ ଫୋପାଡି ଦିଅନ୍ତୁ। ଯଦି ଆପଣ ଫୁଡ୍ ପଏଜନିଂର ଲକ୍ଷଣ ଜାଣିବାକୁ ପାଉଛନ୍ତି ତେବେ ବିଳମ୍ବ ନ କରି ଡାକ୍ତରଙ୍କ ସହ ପରାମର୍ଶ କରନ୍ତୁ।
