ନୂଆଦିଲ୍ଲୀ,୧।୧: ବର୍ଷ ଆରମ୍ଭରୁ ମହଙ୍ଗା ହେଲା ସେବା । ଅନଲାଇନରେ ଖାଦ୍ୟ ଅର୍ଡରଠାରୁ ଆରମ୍ଭ କରି ଟ୍ୟାକ୍ସି ସେବା ଆଦି ଶନିବାରଠାରୁ ମହଙ୍ଗା ହୋଇଛି। ସ୍ବିଗି ଓ ଜୋମାଟୋ ଡେଲିଭରି ଆପ୍ରେ ଖାଦ୍ୟ ମଗାଇବା ଉପରେ ଅତିରିକ୍ତ ୫ ପ୍ରତିଶତ ଜିଏସ୍ଟି ଲାଗୁ ହୋଇଛି। ଫଳରେ ଅନଲାଇନ୍ରେ ଖାଦ୍ୟ ମଗାଇ ଖାଉଥିବା ଲୋକଙ୍କୁ ଅଧିକ ଟଙ୍କା ଦେବାକୁ ହେବ। ଏଭଳି ନିଷ୍ପତ୍ତି ଦ୍ୱାରା କେବଳ ଗ୍ରାହକଙ୍କୁ ପ୍ରଭାବିତ କରିବ ତା’ନୁହେଁ ବରଂ ଏହା ଦ୍ୱାରା ଛୋଟ ରେଷ୍ଟୁରାଣ୍ଟ, ଡେଲିଭରୀ ପ୍ଲାଟଫର୍ମ ମଧ୍ୟ ପ୍ରଭାବିତ ହେବ । ଏଥିଯୋଗୁ ଛୋଟ ହୋଟେଲ ଖାଦ୍ୟ ସାମଗ୍ରୀ ଦର ବଢ଼ାଇବେ ନଚେତ ଅନଲାଇନ୍ ପ୍ଲାଟଫର୍ମରେ ଖାଦ୍ୟ ବିକ୍ରି ବନ୍ଦ କରିବାକୁ ବାଧ୍ୟ ହେବେ ।
ପୂର୍ବରୁ ରେଷ୍ଟୁରାଣ୍ଟ ଖାଦ୍ୟ ଉପରେ ୧୮ ପ୍ରତିଶତ ଜିଏସ୍ଟି ଦେବାକୁ ପଡ଼ୁଥିଲା। ଏଥିରେ ଆଜିଠାରୁ ଅତିରିକ୍ତ ୫ ପ୍ରତିଶତ କର ଲାଗୁ ହୋଇଛି । ପୂର୍ବଭଳି ଅଫଲାଇନ୍ ଅଟୋ ସେବା ଟିକସମୁକ୍ତ ରହିବ । ଏହାଛଡ଼ା ଅନଲାଇନ ଫୁଡ ଡେଲିଭରୀ ଓ ଅନଲାଇନ ଟ୍ୟାକ୍ସି ସେବା ମହଙ୍ଗା ହୋଇଥିବା ବେଳେ ନୂଆବର୍ଷରୁ ଆଧାର କାର୍ଡ ବାଧ୍ୟତାମୂଳକ କରାଯାଇଛି । ଜିଏସଟି ଆଇନ ଅନୁସାରେ, ଜିଏସଟି ରିଫଣ୍ଡ ପାଇଁ ସମସ୍ତ ବ୍ୟବସାୟ ପ୍ରତିଷ୍ଠାନ ଆଧାର କାର୍ଡ ଦେବେ । ଆଧାର କାର୍ଡ ତଥ୍ୟ ନଦେଲେ ଜିଏସ୍ଟି ରିଫଣ୍ଡ ମିଳିବ ନାହିଁ ବୋଲି କୁହାଯାଇଛି।
