![](https://www.dharitri.com/wp-content/uploads/2021/09/bhograi-subarnarekha--1568x1176.jpg)
ଭୋଗରାଇ, ୨୪।୯(ଡି.ଏନ.ଏ.)-ସୁବର୍ଣ୍ଣରେଖା ଉପରମୁଣ୍ଡ ରାଞ୍ଚତ୍ ମାଳଭୂମି ଅଞ୍ଚଳରେ ଘୂର୍ଣ୍ଣିବଳୟ ସକ୍ରିୟ ରହୁଥିବାରୁ ପ୍ରବଳ ବର୍ଷା ଲାଗି ରହିଛି। ଏହାର ପ୍ରଭାବରେ ଚାନ୍ଦିଲି ଡ୍ୟାମ୍ ସହିତ ଗାଲୁଡିହି, କରକାଇ, ବାଙ୍କବଲ ଆଦି ଜଳାଧାରରୁ ଉଦ୍ବୃତ୍ତ ବର୍ଷାଜଳ ପର୍ଯ୍ୟାୟକ୍ରମେ ସୁବର୍ଣ୍ଣରେଖାକୁ ନିଷ୍କାସିତ ହେଉଛି। ଆସନ୍ତା ୨୫ରୁ ମତ୍ସ୍ୟଜୀବୀଙ୍କୁ ସମୁଦ୍ରକୁ ମଧ୍ୟକୁ ନ ଯିବାକୁ ସତର୍କ କରାଯାଇଛି। ସୁବର୍ଣ୍ଣରେଖାରେ ଜୁଲାଇରୁ ଅଦ୍ୟାବଧି ୩ଟି ମଧ୍ୟମ ଧରଣର ବନ୍ୟା ଆସିଥିବା ବେଳେ ପୁଣି ଏକ ବନ୍ୟା ଉତ୍ତରବାଲେଶ୍ୱବାସୀ ସାମ୍ନା କରିବାକୁ ଯାଉଛନ୍ତି। ଘନ ଘନ ଲଘୁଚାପ ସହ ମୌସୁମୀ ସକ୍ରିୟ ହୋଇ ତୁହାକୁ ତୁହା ବର୍ଷା ଲାଗି ରହିଥିବାରୁ ଉତ୍ତରବାଲେଶ୍ୱର ଜଳାର୍ଣ୍ଣବ ହୋଇଛି। ଏଥିସହିତ ଜଳକା ନଦୀର ଆକସ୍ମିକ ବନ୍ୟା ସହ ସୁବର୍ଣ୍ଣରେଖାର କ୍ରମାଗତ ବନ୍ୟା ଜନଜୀବନକୁ ଦୁର୍ବିଷହ କରିଦେଇଛି।
ବିଗତ ବନ୍ୟା ଓ ବର୍ଷାରେ ଭୋଗରାଇ, ଜଳେଶ୍ୱର, ବାଲିଆପାଳ ଓ ବସ୍ତା ଉବୁଟୁବୁ ହୋଇଥିବା ବେଳ ଗୋଟିଏ ଗାଁରୁ ଅନ୍ୟ ଗାଁକୁ ଗମନାଗମନ ବିଚ୍ଛିନ୍ନ ହୋଇଛି। ଭୋଗରାଇର ୨୦ ପଞ୍ଚାୟତର ଶତାଧିକ ଓ ବାଲିଆପାଳର ୫ ପଞ୍ଚାୟତର ଅନ୍ୟୁନ ୨୦ଟି ଗାଁ ପାଣିରେ ଭାସୁଥିବା ବେଳେ ଲକ୍ଷାଧିକ ଲୋକ ଜଳବନ୍ଦୀ ରହିଛନ୍ତି। ମିଆଁମାର ଓ ବାଂଲାଦେଶ ଉପକୂଳରେ ଘୂର୍ଣ୍ଣିବଳୟ ପୂର୍ବ ମଧ୍ୟ କେନ୍ଦ୍ରୀୟ ବଙ୍ଗୋପସଗାରରେ ପୁଣି ଏକ ଲଘୁଚାପ ସୃଷ୍ଟି ହୋଇ ଗାଙ୍ଗେୟ ସମତଳ ଓ ଝାଡ଼ଖଣ୍ଡ ମାଳ ଅଞ୍ଚଳରେ ପ୍ରବଳ ବର୍ଷିବ ବୋଲି ପାଣିପାଗ ବିଜ୍ଞାନୀମାନେ ସୂଚନା ଦେଉଥିବାରୁ ଜିଲା ପ୍ରଶାସନ ଲୋକଙ୍କୁ ସତର୍କ କରାଇଛନ୍ତି। ଭୋଗରାଇ, ବାଲିଆପାଳ ତଳିଆ ଅଞ୍ଚଳରେ ଜନଜୀବନ ଅସ୍ତବ୍ୟସ୍ତ ହୋଇପଡୁଥିବା ବେଳେ ପୁଣି ଲଘୁଚାପ ବନ୍ୟା ବିପନ୍ନଙ୍କ ବିପତ୍ତି ବଢ଼ିବାରେ ଲାଗିଛି।
ବୁଧବାର ରାଜଘାଟଠାରେ ସୁବର୍ଣ୍ଣରେଖାର ଜଳପତ୍ତନ ବୃଦ୍ଧି ପାଇ ୧୦.୩୫ ବିପଦସଙ୍କେତ ତଳେ ପ୍ରବାହିତ ହେଉଥିବା ବେଳେ ଗୁରୁବାର ମଧ୍ୟରାତ୍ରରେ ବିପଦସଙ୍କେତ ୧୦.୩୬ ମିଟର ଊର୍ଦ୍ଧ୍ୱରେ ପ୍ରବାହିତ ହେବ ବୋଲି କେନ୍ଦ୍ରୀୟ ଜଳ ଆୟୋଗ ସୂଚନା ଦେଇଛି। ପଶ୍ଚିମବଙ୍ଗର କେଲେଘାଇ ନଦୀବନ୍ଧ ଭାଙ୍ଗି ସେଠାରେ ବିପର୍ଯ୍ୟୟ ସୃଷ୍ଟି କରିଥିବା ବେଳେ ଏହି ଉଦ୍ବୃତ୍ତ ବର୍ଷା ଜଳ ଭୋଗରାଇ ଧୋୟା ଅଞ୍ଚଳକୁ ମାଡ଼ି ଆସି ଚାଷବାସକୁ ସଙ୍ଗୀନ କରିଛି। ନଦୀର ଉଭୟ ପାର୍ଶ୍ୱରେ ନଦୀ ବନ୍ଧ ଦୁର୍ବଳ ଥିବାରୁ ସେଚ ବିଭାଗ ତୀକ୍ଷ୍ଣ ନଜର ରଖିଥିବା ବେଳେ ଜିଲା ପ୍ରଶାସନ ସତର୍କ ରହିବାକୁ ପରାମର୍ଶ ଦେଇଛି।