ଢେଙ୍କାନାଳ ଅଫିସ, ୨୫।୨: ଡକାୟତି କରିବା ପାଇଁ ଯୋଜନା କରୁଥିବାବେଳେ ଢେଙ୍କାନାଳ ଜିଲା କାମାକ୍ଷାନଗର ପୋଲିସ ହାତରେ ଧରାପଡ଼ିଛି ଏକ ୫ଜ ଣିଆ ଗ୍ୟାଙ୍ଗ୍। ସେମାନେ ହେଲେ କାମାକ୍ଷାନଗର ଥାନା ଗୋରାଡ଼ିଆ ଗ୍ରାମର ରଜନ୍ତୀକାନ୍ତ ମଲ୍ଲିକ (୩୦), ବାଦଲ ମଲ୍ଲିକ ଓରଫ ବାଇନ (୨୪), ନୀଳକଣ୍ଠ ମଲ୍ଲିକ ଓରଫ କାଳିଆ (୩୫), ସୁଶାନ୍ତ ମଲ୍ଲିକ ଓରଫ ଗୁରୁ (୩୪) ଏବଂ ଅଜିତ ମଲ୍ଲିକ (୩୧)। ସେମାନଙ୍କଠାରୁ ୨ଟି ବାଇକ୍, ୪ ମୋବାଇଲ, ୨ ଛୁରି, ଗୋଟିଏ ପିସ୍ତଲ, ୨ ଅଫୁଟା ଗୁଳି, ବୋମା ତିଆରି ସରଞ୍ଜାମ ଆଦି ଜବତ କରାଯାଇଛି। ଗିରଫ ଅଭିଯୁକ୍ତମାନେ ଏକାଧିକ ଡକାୟତି ମାମଲାରେ ସାମିଲ ଥିବା ଶୁକ୍ରବାର କାମାକ୍ଷାନଗର ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍ଡିପିଓ ରଞ୍ଜନ କୁମାର ଦେ ସୂଚନା ଦେଇଛନ୍ତି।
ଜିରାଳ ନିକଟ ବ୍ରାହ୍ମଣୀ ନଦୀ ଉପରେ ଚାଲିଥିବା ସେତୁ ନିର୍ମାଣ ଦାୟିତ୍ୱ ନେଇଥିବା ଠିକାସଂସ୍ଥା ଏସ୍ପି ସିଙ୍ଗ୍ଲା କନଷ୍ଟ୍ରକ୍ଶନ କ୍ୟାମ୍ପରୁ ଡକାୟତି କରିବା ପାଇଁ ଅଭିଯୁକ୍ତମାନେ ଜିରାଳ କଲେଜ ନିକଟ କାଜୁ ବଗିଚା ପଡ଼ିଆରେ ଗୁରୁବାର ଯୋଜନା କରୁଥିବା ଗୋଇନ୍ଦା ସୂଚନା ମିଳିଥିଲା। ଏହାପରେ ପୋଲିସ ଚଢ଼ାଉ କରି ସମ୍ପୃକ୍ତ ୫ଜଣ ଧରିଥିଲା। ଏ ନେଇ ଥାନାରେ ନଂ. ୬୪/୨୩ରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତମାନେ କାମାକ୍ଷାନଗର ଥାନା ଅଞ୍ଚଳରେ ପୂର୍ବରୁ ଘଟିଥିବା ଏକାଧିକ ଡକାୟତି ମାମଲାରେ ସାମିଲ ଅଛନ୍ତି। ସେମାନେ ସମ୍ପୃକ୍ତ ଠିକାସଂସ୍ଥା କର୍ତ୍ତୃପକ୍ଷଙ୍କୁ ଭୟଭୀତ କରାଇ ଦାଦାବଟି ମାଗୁଥିବା ଏସ୍ଡିପିଓ ସୂଚନା ଦେଇଛନ୍ତି। ଚଢ଼ାଉରେ ଥାନା ଅଧିକାରୀ ଶରତ ଚନ୍ଦ୍ର ମହାଳିକ, ଏସ୍ଆଇ ସ୍ବର୍ଣ୍ଣଲତା ସାହୁ, ଏଏସ୍ଆଇ ଜିତେନ୍ଦ୍ର ପ୍ରଧାନ ସାମିଲ ଥିଲେ।
