ଭୁବନେଶ୍ୱର,୨୦।୫(ବ୍ୟୁରୋ): ରାଜଧାନୀ ଭୁବନେଶ୍ୱରର ବିଭିନ୍ନ ସ୍ଥାନରୁ ଲୁଟପାଟ୍ କରି ଏହାକୁ ବିକ୍ରି କରୁଥିବା ଗ୍ୟାଙ୍ଗକୁ ତମୋଣ୍ଡା ଥାନା ପୋଲିସ ଗିରଫ କରିଛି । ଏଥିରେ ୨ ଲୁଟେରା ଓ ୩ ଜଣ ରିସିଭର ଅଛନ୍ତି । ଲୁଟେରା ଦ୍ୱୟ ହେଲେ ଲିଙ୍ଗରାଜ ଥାନା ଅଞ୍ଚଳରେ ରହୁଥିବା ଅଂଶୁମାନ ତ୍ରିପାଠୀ ଓରଫ ଆୟୁଷ ଏବଂ ୟୁନିଟ-୧ କ୍ୟାପିଟାଲ ଥାନା ଅଞ୍ଚଳରେ ରହୁଥିବା ନିର୍ମଳ ରଣସିଂହ ଓରଫ ମିଥୁନ। ସେହିପରି ୩ଜଣ ରିସଭର ହେଲେ ଭୀମଟାଙ୍ଗି ଅଞ୍ଚର ଭରତ ସାହୁ, ତପନ ସାହୁ ଓ ଲୋକନାଥ ବେହେରା। ଏମାନଙ୍କଠାରୁ ୧୨ଟି ସୁନାଚେନ, ୨ମଙ୍ଗଳସୂତ୍ର ଜବତ କରାଯାଇଛି, ଯାହାର ଓଜନ ୧୦୧ ଗ୍ରାମ ୭୫୦ ମିଲିଗ୍ରାମ ବୋଲି ଜଣାପଡ଼ିଛି। ସେହିଭଳି ୮ଟି ମୋବାଇଲ ଫୋନ ଜବତ ହୋଇଛି। ଏ ନେଇ ତମାଣ୍ଡୋ ଥାନା ପୋଲିସ ଏକ ମାମଲା (ନଂ. ୧୨୫/୨୨) ରୁଜୁ କରି ଅଭିଯୁକ୍ତମାନଙ୍କୁ ଗୁରୁବାର କୋର୍ଟ ଚାଲାଣ କରିଛି। ଲୁଟେରା ଦ୍ୱୟ ଚକରା ଗ୍ୟାଙ୍ଗରେ ସଂପୃକ୍ତ ଥିବା ପୋଲିସ କହିଛି।
ସୂଚନାନୁଯାୟୀ, ଗତ ୧୪ ତାରିଖରେ ତମାଣ୍ଡୋ ଥାନା ଅଞ୍ଚଳର ବାଞ୍ଛାନିଧି ତ୍ରିପାଠୀଙ୍କ ବୋହୁ କଳିଙ୍ଗ ବିହାରରୁ ଘରକୁ ଫେରୁଥିବା ବେଳେ ୨ଜଣ ଦୁର୍ବୃତ୍ତ ଏକ ପଲସର ଗାଡ଼ି (ନଂ. ଓଡି-୦୨-ବିପି-୩୪୧୫)ରେ ଆସି ତାଙ୍କଠାରୁ ସୁନାଚେନ ଝାମ୍ପି ନେଇ ଫେରାର ହୋଇଯାଇଥିଲେ। ଏନେଇ ସେ ତମାଣ୍ଡୋ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଗାଡ଼ି ନମ୍ବରରେ ଟ୍ରେସ କରି ଆୟୁଷଙ୍କୁ ଧରିଥିଲେ। ପଚରାଉଚୁରା କରିବା ସମୟରେ ସେ ବିଭିନ୍ନ ଜାଗାରୁ ସୁନା, ମୋବାଇଲ ଫୋନ୍ ଆଦି ଲୁଟ କରି ଏହାକୁ ବିକ୍ରି କରିବା ପାଇଁ ଭରତ, ତପନ, ଲେକନାଥଙ୍କୁ କିଛି କମିଶନ ଦିଅନ୍ତି। ଫଳରେ ସେମାନେ ଏହି ଚୋରା ଜିନିଷକୁ ବିଭିନ୍ନ ବସ୍ତି ସମେତ ଦୋକାନରେ ବିକ୍ରି କରିଥାନ୍ତି ବୋଲି ସ୍ବୀକାର କରିଥିବା ପୋଲିସ କହିଛି। ପୋଲିସ ତତନ୍ତ କରି ୩ ରିସିଭରଙ୍କୁ ମଧ୍ୟ ଗିରଫ କରିଛି। ଅଂଶୁମାନ ଓ ମିଥୁନଙ୍କ ନାଁରେ କ୍ୟାପିଟାଲ, ଖାରବେଳନଗର, ଖଣ୍ଡଗିରି, ନୂଆପଲ୍ଲୀ ଓ ଚନ୍ଦ୍ରଶେଖରପୁର ଆଦି ଥାନାରେ ଅନେକ ମାମଲା ରହିଛି ବୋଲି ପୋଲିସ ପକ୍ଷରୁ ସୂଚନା ମିଳିଛି।
