ଭୁବନେଶ୍ୱର,(ବ୍ୟୁରୋ)/ପୁରୁଣା ଭୁବନେଶ୍ୱର (ଡି.ଏନ୍.ଏ.), ୨୦।୫: ଧଉଳି ଥାନା ଅନ୍ତର୍ଗତ ଦୟା ବ୍ରିଜ ନିକଟରେ ଗୁରୁବାର ସାରେ ଏକ ଦୁର୍ଘଟଣା ଘଟିଛି। ଚୋରା ମାଙ୍କଡ଼ା ପଥର ବୋଝେଇ ଟ୍ରକ୍ ଏକ ବାଇକକୁ ଧକ୍କା ଦେବାରୁ ବାଇକ୍ ଆରୋହୀ ଆହତ ହୋଇଥିବାବେଳେ ତାଙ୍କ ସ୍ତ୍ରୀ ଏବଂ ଶିଶୁ ବର୍ତ୍ତି ଯାଇଛନ୍ତି। ଆହତ ଜଣକ ହେଲେ ବାଲିପାଟଣା ଅଞ୍ଚଳର ଅନିଲ କୁମାର ଦାସ। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ଦେଖାଦେଇଥିଲା। ଦୁର୍ଘଟଣା ଘଟାଇଥିବା ଟ୍ରକ୍ ଓ ଡ୍ରାଇଭରଙ୍କୁ ସ୍ଥାନୀୟ ଲୋକେ ଅଟକାଇଥିବାବେଳେ ଅତିରିକ୍ତ ତହସିଲଦାର ମିନାକ୍ଷୀ ଦାସ ଘଟଣାସ୍ଥଳରେ ପହଞ୍ଚତ୍ ଡ୍ରାଇଭରଙ୍କୁ ଗାଡ଼ି ସାଇଡ୍ କରି ପଥର ଚାଲାଣର କାଗଜ ଦେଖାଇବାକୁ କହିଥିଲେ। ଗାଡ଼ି ସାଇଡ୍ କରିବାର ସୁଯୋଗ ନେଇ ଡ୍ରାଇଭର ଟ୍ରକ୍ଟିକୁ ଦ୍ରୁତ ଗତିରେ ଚଳାଇ ସେଠାରୁ ଫେରାର ହୋଇଯାଇଥିଲେ। ଟ୍ରକ୍ ଫେରାର ହୋଇଯିବା ଦେଖି ଲୋକମାନେ ଅତିରିକ୍ତ ତହସିଲ୍ଦାର ଏବଂ ପୋଲିସକୁ ଘେରିଯାଇଥିଲେ। ଟ୍ରକ୍ ଡ୍ରାଇଭରଙ୍କୁ ଜାଣିଶୁଣି ଅତିରିକ୍ତ ତହସିଲ୍ଦାର ଫେରାର କରିଥିବା ନେଇ ଅଭିଯୋଗ କରିବା ସହ କ୍ଷତିପୂରଣ ଦାବି କରିଥିଲେ। ଘଟଣାସ୍ଥଳରେ ଅଧିକ ପୋଲିସ ପହଞ୍ଚି ଲୋକଙ୍କୁ ବୁଝାଶୁଝା କରି ଅତିରିକ୍ତ ତହସିଲଦାରଙ୍କୁ ଲୋକଙ୍କ କବଳରୁ ଉଦ୍ଧାର କରିଥିଲେ। ଏନେଇ ଆହତ ଅନିଲଙ୍କ ସ୍ତ୍ରୀ ମଧୁସ୍ମିତା ଧଉଳି ଥାନାରେ ଅଭିଯୋଗ କରିଛନ୍ତି। ଟ୍ରକ୍ ଧକ୍କା ଯୋଗୁ ସ୍ବାମୀ ଆହତ ହୋଇଥିବାରୁ କ୍ଷତିପୂରଣ ଦିଆଯାଉ ବୋଲି ସେ ଦାବି କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ମାମଲା (ନଂ ୧୦୬/୨୨) ରୁଜୁ କରି ଫେରାର ଡ୍ରାଇଭରଙ୍କୁ ଧରିବା ପାଇଁ ତଦନ୍ତ ଆରମ୍ଭ କରିଛି । ପ୍ରକାଶ ଯେ, ଏକ ଟ୍ରକ ବେଆଇନ ଭାବେ ମାଙ୍କଡ଼ାପଥର ଚୋରାଚାଲାଣ କରି ଉତ୍ତରାରୁ ଭୁବନେଶ୍ୱର ଆଡ଼କୁ ଯାଉଥିଲା। ବିଶେଷ ସୂତ୍ରରୁ ଖବର ପାଇ ଅତିରିକ୍ତ ତହସିଲଦାର ମିନାକ୍ଷୀ ଟ୍ରକ୍କୁ ପିଛା କରୁଥିବା ଜାଣି ଡ୍ରାଇଭର ଜଣକ ଦ୍ରୁତ ଗତିରେ ଗାଡ଼ି ଚଲାଇଥିଲେ। ଏହି ସମୟରେ ସ୍ତ୍ରୀ ପିଲାଙ୍କୁ ଧରି ଭୁବନେଶ୍ୱର ଅଭିମୁଖେ ଯାଉଥିବା ଅନିଲଙ୍କ ବାଇକ୍କୁ ଟ୍ରକ୍ଟି ଧକ୍କା ଦେଇଥିଲା। ଫଳରେ ସେ ତଳେ ପଡିଯିବାରୁ ଆହତ ହୋଇଥିଲେ ।
