ଅତାବିରା/ଗୋଡ଼ଭଗା, ୭/୮(ଯୁଧିଷ୍ଠିର ମହାପାତ୍ର / ସୁରେଶ ଦାଶ ): ବରଗଡ଼ ଜିଲା ଅତାବିରା ବ୍ଲକ ଅନ୍ତର୍ଗତ ଲହଣ୍ଡା ପଞ୍ଚାୟତ ସ୍ଥିତ ୟୁକୋ ବ୍ୟାଙ୍କରେ ବିଳମ୍ବିତ ରାତିରେ ଚୋରି ଉଦ୍ୟମ ଘଟିଥିବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। କିଛି ଦୁର୍ବୃତ୍ତ ବ୍ୟାଙ୍କର ତାଲା ଭାଙ୍ଗି ଭିତରକୁ ପ୍ରବେଶ କରିଥିବା ବେଳେ କାର୍ଯ୍ୟାଳୟର ବିଭିନ୍ନ କାଗଜପତ୍ର ଏଣେତେଣେ ଫିଙ୍ଗି ଦେଇଥିବା ଜଣାପଡ଼ିଛି।
ଘଟଣାର ସୂଚନା ପାଇ ଅତାବିରା ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରାଥମିକ ସୂଚନା ଅନୁଯାୟୀ, ପୋଲିସ ଏହି ଘଟଣାରେ ସଂପୃକ୍ତ ସନ୍ଦେହରେ ତିନି ଜଣଙ୍କୁ ଅଟକ ରଖି ପଚରାଉଚରା କରୁଥିବା ସୂଚନା ମିଳିଛି। ତେବେ ପୋଲିସ ପକ୍ଷରୁ ଏନେଇ କୌଣସି ସରକାରୀ ସୂଚନା ଜାରି କରାଯାଇନାହିଁ। ତଦନ୍ତ ସମୟରେ ଅନୁସନ୍ଧାନୀ କୁକୁରର ସହାୟତାରେ ଦୁର୍ବୃତ୍ତମାନେ ବ୍ୟବହାର କରିଥିବା ଏକ କାର୍କୁ ପୋଲିସ ଠାବ କରିଥିଲା। ସୂଚନା ଅନୁସାରେ, ବ୍ୟାଙ୍କରେ ଚୋରି ଉଦ୍ୟମ ପୂର୍ବରୁ ଦୁର୍ବୃତ୍ତମାନେ ଲହଣ୍ଡା ଗ୍ରାମର ଜଣେ ବ୍ୟକ୍ତିଙ୍କର କିଛି ଛେଳି ଚୋରି କରି କାର୍ ରଖିଥିବା ସ୍ଥାନରେ ବାନ୍ଧି ରଖିଥିଲେ। ପରେ ଗ୍ରାମବାସୀ ଖବରପାଇ ସେହି ଛେଳିଗୁଡ଼ିକୁ ଉଦ୍ଧାର କରିଥିଲେ। ଅତାବିରା ପୋଲିସ ସନ୍ଦିଗ୍ଧ କାର୍କୁ ଜବତ କରିଥିବା ବେଳେ ଘଟଣାର ସମସ୍ତ ଦିଗକୁ ନେଇ ତଦନ୍ତ ଜାରି ରହିଛି। ବ୍ୟାଙ୍କରୁ କୌଣସି ନଗଦ ଟଙ୍କା କିମ୍ବା ମୂଲ୍ୟବାନ ସାମଗ୍ରୀ ଚୋରି ହୋଇଛି କି ନାହିଁ, ତାହାର ସଠିକ ସୂଚନା ବ୍ୟାଙ୍କ କର୍ତ୍ତୃପକ୍ଷଙ୍କ ପକ୍ଷରୁ ଯାଞ୍ଚ ପରେ ସ୍ପଷ୍ଟ ହେବ ବୋଲି ଅତାବିରା ଆଇଆଇସି ପ୍ରକାଶ କର୍ଣ୍ଣ କହିଛନ୍ତି l
