ହାମିଲଟନ,୫।୧୨(ଏପି): ଅଧିନାୟକ କେନ୍ ଓ୍ବିଲିୟମସନଙ୍କ ଦମ୍ଦାର ଦ୍ୱିଶତକ ବଳରେ ନୁଜିଲାଣ୍ଡ ଓ୍ବେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ତା’ର ସ୍ଥିତି ଦୃଢ କରିଛି। ଶୁକ୍ରବାର ଦ୍ୱିତୀୟ ଦିନରେ ଓ୍ବିଲିୟମସନ ହିରୋ ସାବ୍ୟସ୍ତ ହୋଇଛନ୍ତି। ୪୧୨ଟି ବଲ୍ ଖେଳି ୬୨୪ ମିନିଟ୍ ଅର୍ଥାତ ୧୦ ଘଣ୍ଟା ୪୦ ମିନିଟ୍ କ୍ରିଜ୍ରେ ରହି ୩୪ ଚୌକା ଓ ୨ ଛକା ସହ ଓ୍ବିଲିୟମସନ ୨୫୧ ରନର ଲଢୁଆ ଦ୍ୱିଶତକୀୟ ପାଳି ଖେଳି ଭ୍ରମଣକାରୀ ଦଳକୁ ନିରାଶ କରିଥିଲେ। ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିବା ନ୍ୟୁଜିଲାଣ୍ଡ ପ୍ରଥମ ଇନିଂସରେ ୧୪୫ ଓଭରରେ ୭ ଉଇକେଟ ହରାଇ ୫୧୯ ରନ କରି ପାଳି ଘୋଷଣା କରିଥିଲା। ଜବାବରେ ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ ଆରମ୍ଭ କରି ଦ୍ୱିତୀୟ ଦିନ ଖେଳ ଶେଷ ସୁଦ୍ଧା ୨୬ ଓଭରରେ କୌଣସି ଉଇକେଟ ନ ହରାଇ ୪୯ ରନ ସଂଗ୍ରହ କରିଛି। ଫଳରେ ୧୦ ଉଇକେଟ ହାତରେ ରଖି ୪୭୦ ରନ ପଛରେ ପଡିଛି। ଦୁଇ ଓପନର କ୍ରେଗ୍ ବ୍ରାଥଓ୍ବେଟ୍ ୨୦ ଓ ଜନ କ୍ୟାମ୍ପବେଲ ୨୨ ରନ କରି ଅପରାଜିତ ରହିଛନ୍ତି।
ଅସମାପ୍ତ ସ୍କୋର ୨୪୩/୨ରୁ ନୁଜିଲାଣ୍ଡ ଖେଳ ଆରମ୍ଭ କରିଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ଓ୍ବିଲିୟମସନ ୯୭ରୁ ଖେଳ ଆରମ୍ଭ କରି ଆଉ ୩ ରନକରି ଶତକ ଅର୍ଜନ କରିଥିଲେ ଓ କ୍ୟାରିୟରର ତୃତୀୟ ଦ୍ୱିଶତକ ଅର୍ଜନ କରିଥିଲେ। ୨୫୧ ରନର ପାଳି ଖେଳି ଜୋଶେଫ୍ ଅଲଜାରୀଙ୍କ ବଲ୍ରେ ମିଡ୍ଉଇକେଟରେ ରୋଷ୍ଟନ ଚେଜ୍ଙ୍କୁ କ୍ୟାଚ୍ ଦେଇ ଆଉଟ ହେବା ପରେ ସେ ଟେଷ୍ଟରେ ନିଜର ବ୍ୟକ୍ତିଗତ ସର୍ବାଧିକ ସ୍କୋର କରିଥିଲେ। ସେହିପରି ୩୧ରନରୁ ଖେଳ ଆରମ୍ଭ କରି ଅଭିଜ୍ଞ ରସ୍ ଟେଲର ୩୮ ରନକରି ପ୍ୟାଭିଲିୟନ ଫେରିଥିଲେ। ଅନ୍ୟମାନଙ୍କ ମଧ୍ୟରେ ହେନେରୀ ନିକୋଲ୍ସ ୭, ଉଇକେଟକିପର ବ୍ୟାଟ୍ସମ୍ୟାନ ଟମ୍ ବ୍ଲଣ୍ଡେଲ ୧୪, ଡାରିଲ ମିଚେଲ ୯ ରନକରି ଆଉଟ ହୋଇଥିଲେ। କାଏଲ ଜେମିଶନ ୫୧ ଓ ଟିମ୍ ସୌଦି ୧୧ ରନକରି ଅପରାଜିତ ରହିଥିଲେ। ନିଲ ଓ୍ବାଗନର ଓ ଟ୍ରେଣ୍ଟ ବୋଲ୍ଟ ବ୍ୟାଟିଂ କରି ନ ଥିଲେ। ବୋଲିଂରେ ଓ୍ବେଷ୍ଟଇଣ୍ଡିଜ ତରଫରୁ କେମର ରୋଚ ଓ ସାନନ ଗାବ୍ରିଏଲ୍ ୩ଟି ଲେଖାଏ, ଅଲଜାରି ଜୋଶେଫ୍ ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ନ୍ୟୁଜିଲାଣ୍ଡ ପ୍ରଥମ ଇନିଂସ ୧୪୫ ଓଭରରେ ୫୧୯/୭ ଇନିଂସ ଘୋଷଣା (ଓ୍ବିଲିୟମସନ- ୨୫୧, ଲଥାମ- ୮୬, ଜେମିସନ- ୫୧*, ସୌଦି- ୧୧*, ଟେଲର- ୩୮, ବ୍ଲଣ୍ଡେଲ- ୧୪, ରୋଚ- ୩/୧୧୪, ଗାବ୍ରିଏଲ- ୩/ ୮୯, ଜୋଶେଫ୍- ୧/୯୯)।
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ: ୨୬ ଓଭରରେ ୪୯/୦ (ବ୍ରାଥ୍ଓ୍ବେଟ- ୨୦, କ୍ୟାମ୍ପବେଲ- ୨୨)।
