ଖ୍ରୀଷ୍ଟଚର୍ଚ୍ଚ,୨୩ା୨(ଏପି)-ସୋମବାର ଅନୁଷ୍ଠିତ ଅଷ୍ଟ୍ରେଲିଆ ବିପକ୍ଷ ପ୍ରଥମ ଅନ୍ତର୍ଜାତୀୟ ଟି୨୦ ମ୍ୟାଚକୁ ନ୍ୟୁଜିଲାଣ୍ଡ ୫୩ ରନରେ ଜିତି ନେଇଛି। ଏହି ବିଜୟ ଦ୍ୱାରା ଆୟୋଜକ ଦଳ ୫ ମ୍ୟାଚ ବିଶିଷ୍ଟ ସିରିଜ ୧-୦ରେ ଅଗ୍ରଣୀ ଲାଭ କରିଛି। ନ୍ୟୁଜିଲାଣ୍ଡକୁ ଜିତାଇବାରେ ଡେଭନ କନଓ୍ବେ ମୁଖ୍ୟ ଭୂମିକା ଗ୍ରହଣ କରିଛନ୍ତି। ସେ ୫୯ ବଲ୍ରେ ୯୯ ରନ କରି ଅପରାଜିତ ରହିଥିଲେ। ଅନ୍ତର୍ଜାତୀୟ ଟି୨୦ରେ ଦକ୍ଷିଣ ଆଫ୍ରିକାରେ ଜନ୍ମିତ ଏହି ଖେଳାଳିଙ୍କର ସର୍ବୋଚ୍ଚ ସ୍କୋର ୬୫ ରହିଥିଲା। କନଓ୍ବେ ବ୍ୟାଟିଂ କରିବାକୁ ଆସିବା ବେଳେ ନ୍ୟୁଜିଲାଣ୍ଡ ୧୧ ରନରେ ଏହାର ୨ ଉଇକେଟ ହରାଇ ସାରିଥିଲା। ସେ ଇନିଂସର ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଟସ୍ ଜିତି ପ୍ରଥମେ ବ୍ୟାଟିଂ ନେଇଥିବା ନ୍ୟୁଜିଲାଣ୍ଡ ନିର୍ଦ୍ଧାରିତ ଓଭରରେ ୫ ଉଇକେଟ ବିନିମୟରେ ୧୮୪ ରନ କରିଥିଲା। ଜବାବରେ ଅଷ୍ଟ୍ରେଲିଆ ୧୩୧ରେ ଅଲ୍ଆଉଟ ହୋଇଯାଇଥିଲା।
ଇନିଂସର ଅନ୍ତିମ ଓଭର ବେଳକୁ କନଓ୍ବେ ୮୭ ରନ କରି ନଟଆଉଟ ଥିଲେ। ଏହି ଓଭରରେ ସେ ଏକ ସିଙ୍ଗଲ, ଏକ ଚୌକା ଓ ଏବଂ ଏକ ଛକା ମାରିଥିଲେ। ଶେଷ ବଲ ବେଳକୁ ତାଙ୍କର ବ୍ୟକ୍ତିଗତ ସ୍କୋର ୯୮ରେ ପହଞ୍ଚତ୍ୟାଇଥିଲା। ମାତ୍ର ଏହି ବଲ୍ରେ ସେ ମାତ୍ର ଗୋଟିଏ ରନ ସଂଗ୍ରହ କରିବାରେ ସକ୍ଷମ ହୋଇଥିଲେ। କନଓ୍ବେ ବ୍ୟାଟିଂରେ ଯୋଗ ଦେବା ପୂର୍ବରୁ ନ୍ୟୁଜିଲାଣ୍ଡ ଆରମ୍ଭରୁ ଅଷ୍ଟ୍ରେଲିଆ ପେସ୍ ବୋଲର ଡାନିଲ ସାମ୍ସ, ଝେ ରିଚାର୍ଡସନ ଓ କେନ୍ ରିଚାର୍ଡସନଙ୍କ ବିପକ୍ଷରେ ସଂଘର୍ଷ ଚଳାଇଥିଲା। ଇନିଂସର ତୃତୀୟ ବଲ୍ରେ ସାମ୍ସ ଓପନର ମାର୍ଟିନ ଗୁପ୍ଟିଲଙ୍କୁ ଆଉଟ କରିଦେଇଥିଲେ। ପରେ ସେ ଅଧିନାୟକ କେନ୍ ଓ୍ବିଲିୟମସନ (୧୨)ଙ୍କୁ ପ୍ୟାଭିଲିଅନକୁ ପଠାଇ ଦେଇଥିଲେ। ଟିମ୍ ସିଫର୍ଟ (୧)ଙ୍କୁ ଝେ ରିଚାର୍ଡସନ ବୋଲ୍ଡ କରିଦେଇଥିଲେ। ଘରୋଇ ଦଳ ୧୯ରନରେ ଏହାର ୩ ବ୍ୟାଟ୍ସମ୍ୟାନଙ୍କୁ ହରାଇ ସାରିଥିଲା। କନଓ୍ବେ ନ୍ୟୁଜିଲାଣ୍ଡ ବ୍ୟାଟିଂରେ ସୁଧାର ଆଣିଥିଲେ। ସେ ଓ ଗ୍ଲେନ ଫିଲିପ୍ସ (୩୦) ଚତୁର୍ଥ ଉଇକେଟ ପାର୍ଟନରଶିପ୍ରେ ୭୪ରନ, ଜିମ୍ମି ନିଶାମ (୨୬)ଙ୍କ ସହ ୫ମ ଉଇକେଟରେ ୪୭ ଏବଂ ମିଚେଲ ସାଣ୍ଟନର (୭)ଙ୍କ ସହ ପାର୍ଟନରଶିପ୍ରେ ୪୪ରନ ଯୋଗ କରିଥିଲେ। ହାଗ୍ଲେ ଓଭାଲଠାରେ ଫ୍ଲଡ୍ଲାଇଟ୍ରେ ଖେଳାଯାଇଥିବା ଏହି ମ୍ୟାଚରେ ନ୍ୟୁଜିଲାଣ୍ଡ ଭଳି ଅଷ୍ଟ୍ରେଲିଆ ମଧ୍ୟ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଦଳ ଏକଦା ମାତ୍ର ୧୯ ରନରେ ୪ଟି ଉଇକେଟ ହରାଇସାରିଥିଲା। ଟପ୍ ସ୍କୋରର ମିଚେଲ ମାର୍ଶ ୪୫, ଆଷ୍ଟନ ଅଗର ୨୩ ରନ କରିଥିଲେ। ନ୍ୟୁଜିଲାଣ୍ଡର ଇସ୍ ସୋଧି ୨୮ ରନ ଦେଇ ୪ଟି ଉଇକେଟ ନେଇଥିବାବେଳେ ଟିମ୍ ସୌଦି ଓ ଟ୍ରେଣ୍ଟ ବୋଲ୍ଟ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର
ନ୍ୟୁଜିଲାଣ୍ଡ: ୨୦ ଓଭରରେ ୧୮୪/୫ (କନଓ୍ବେ-୯୯*, ଗ୍ଲେନ୍ ଫିଲିପ୍ସ-୩୦, ନିଶାମ-୨୬; ଡାନିଏଲ ସାମ୍ସ-୨/୪୦, ଝେ ରିଚାର୍ଡସନ-୨/୩୧)।
ଅଷ୍ଟ୍ରେଲିଆ : ୧୭.୩ ଓଭରରେ ୧୩୧/ଅଲଆଉଟ (ମିଚେଲ ମାର୍ଶ-୪୫: ଇସ୍ ସୋଧି-୪/୨୮, ସୌଦି-୨/୧୦, ଟ୍ରେଣ୍ଟ ବୋଲ୍ଟ-୨/୨୨ )।
