କେନ୍ଦୁଝର,୨୨।୨(ସ୍ବ.ପ୍ର): କେନ୍ଦୁଝର ବନଖଣ୍ଡ ସହାୟତାରେ ସଦର ବନାଞ୍ଚଳ ଅନ୍ତର୍ଗତ ପଳାସପଙ୍ଗା ସେକ୍ସନ ଅଧୀନସ୍ଥ ୧୫ଟି ବନ ସୁରକ୍ଷା ସମିତି ଦ୍ୱାରା ଜଙ୍ଗଲ ନିଆଁ ପ୍ରତିକାର ପାଇଁ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଉଛି। କାର୍ଯ୍ୟକ୍ରମରେ ସ୍ବୟଂ ସହାୟିକା ଗୋଷ୍ଠୀର ମହିଳାମାନେ ସାମିଲ ହୋଇ ଜଙ୍ଗଲରେ ପଡ଼ିଥିବା ପତ୍ରକୁ ଅଲଗା (ଫାୟାର ଲାଇନ୍) କାମ କରୁଛନ୍ତି। ଏଥିରେ ପଳାସପଙ୍ଗା ସେକ୍ସନର ଆହାରପସି, କଣ୍ଡରାପସି, ଆମୁଣିପୁର, ନଇଗାଁ ଓ ସଣ୍ଡିଆପସି ବନ ସୁରକ୍ଷା ସମିତିରେ ସଚେତନତା ସଭା ଅନୁଷ୍ଠିତ ହେବା ଫାୟାର ଲାଇନ କାମ ସରିଛି। ବଉଳମାଳ ଓ କଶିରା ପାଟଣାରେ କାର୍ଯ୍ୟକ୍ରମ ଚାଲୁ ରହିଛି। ବଉଳମାଳ ବନ ସୁରକ୍ଷା ସମିତି ଆନୁକୂଲ୍ୟରେ ଅନୁଷ୍ଠିତ ସଚେତନତା ସଭା ଓ ଫାୟାର ଲାଇନ କାମ ଅବସରରେ ପଳାସପଙ୍ଗା ବନପାଳ ଜୟକୃଷ୍ଣ ଦାସ, ବନରକ୍ଷୀ ସୁବାଷିନୀ ଗିରି, ବଉଳମାଳ ବନ ସୁରକ୍ଷା ସମିତିର କର୍ମକର୍ତ୍ତା ପୂର୍ଣ୍ଣେନ୍ଦୁ ପୂର୍ଣ୍ଣଚନ୍ଦ୍ର ମହାନ୍ତ, ରମେଶ ଚନ୍ଦ୍ର ମହାପାତ୍ର, ଅନିତା ନାୟକ, ସଦସ୍ୟ ନିରଞ୍ଜନ ମହାନ୍ତ, ଭାଗବତ ନାୟକ ଓ ଲଳିତ ମହାକୁଡ଼ ଯୋଗଦେଇ ଜଙ୍ଗଲ ସୁରକ୍ଷା ପାଇଁ ଗ୍ରାମବାସୀଙ୍କର ଭୂମିକା ବୁଝାଇଥିଲେ। କାର୍ଯ୍ୟକ୍ରମରେ ଉପସ୍ଥିତ ସମସ୍ତ ସଭ୍ୟାସଭ୍ୟ, ସ୍ବୟଂ ସହାୟିକା ଗୋଷ୍ଠୀର ମହିଳା ଓ ଗ୍ରାମର ଭଦ୍ର ବ୍ୟକ୍ତିଗଣ ଜଙ୍ଗଲ ସୁରକ୍ଷା ଦିଗରେ ଯତ୍ନବାନ ହେବାକୁ ଶପଥପାଠ କରିଥିଲେ। ଏହି ଅବସରରେ ବନ ବିଭାଗ କର୍ମଚାରୀ ଓ ବନସୁରକ୍ଷା ସମିତିର ସଦସ୍ୟଙ୍କ ତତ୍ତ୍ୱାବଧାନରେ ଗ୍ରାମର ୧୬ ମହିଳା ସ୍ବୟଂ ସହାୟିକା ଗୋଷ୍ଠୀର ସଦସ୍ୟା ଫାୟାର ଲାଇନ କାମ କରିବା ସହିତ ଲୋକମାନଙ୍କୁ ସଚେତନ କରାଉଛନ୍ତି। ସେହିପରି କଶିରା ପାଟଣାରେ ମଧ୍ୟ ଫାୟାର ଲାଇନ କାମ ଚାଲିଛି। ଖୁବ୍ ଶୀଘ୍ର ଆଉ ୮ଟି ବନ ସୁରକ୍ଷା ସମିତିରେ ଏହି କାମ କରାଯିବା ସହିତ ଜଙ୍ଗଲ ପାର୍ଶ୍ୱବର୍ତ୍ତୀ ଗ୍ରାମ ଗୁଡ଼ିକରେ ବ୍ୟାପକ ସଚେତନତା କରାଯିବ ବୋଲି ପଳାସପଙ୍ଗା ବନପାଳ କହିଛନ୍ତି।
