ବାଗ୍ଦାଦ, ୨୫।୪: ଇରାକ ରାଜଧାନୀ ବାଗ୍ଦାଦର ଦିୟାଲା ବ୍ରିଜ୍ ଅଞ୍ଚଳରେ ଥିବା ଇବ୍ନ ଖାଟିବ୍ ହସ୍ପିଟାଲରେ ଶନିବାର ଘଟିଥିବା ଅଗ୍ନିକାଣ୍ଡ ଯୋଗୁ ୮୨ ଜଣଙ୍କ ମୃତ୍ୟୁ ହୋଇଛି। ଏହି ଘଟଣା ୧୧୦ ଜଣ ଆହତ ହୋଇଛନ୍ତି। ଅକ୍ସିଜେନ୍ ଟାଙ୍କିରେ ବିସ୍ଫୋରଣ କାରଣରୁ ଘଟିଛି ଏହି ଅଗ୍ନିକାଣ୍ଡ। ଏ ନେଇ ସୂଚନା ଦେଇଛନ୍ତି ଦେଶର ଗୃହ ମନ୍ତ୍ରଣାଳୟ ମୁଖପାତ୍ର। ଏଭଳି ଦୁଃଖଦ ଘଟଣା ଭବିଷ୍ୟତରେ ଯେପରି ନ ଘଟେ ସେଥିପାଇଁ ସମସ୍ତ ହସ୍ପିଟାଲର ସୁରକ୍ଷାବ୍ୟବସ୍ଥା ଯାଞ୍ଚ କରାଯିବ ବୋଲି ସେ କହିଛନ୍ତି।
ନିଆଁ ଲାଗିବା ପରେ ହସ୍ପିଟାଲ ଭିତରେ ରୋଗୀ, ସେମାନଙ୍କ ସମ୍ପର୍କୀୟ ଓ ହସ୍ପିଟାଲ କର୍ମୀଙ୍କ ମଧ୍ୟରେ ଖେଳିଯାଇଥିଲା ଆତଙ୍କ। କେତେଜଣ ସମ୍ପର୍କୀୟ ସେମାନଙ୍କ ରୋଗୀଙ୍କୁ କାନ୍ଧରେ ବୋହି ତଳକୁ ନେଇଆସିଥିଲେ। ଡାକ୍ତରମାନେ ମଧ୍ୟ ଜୀବନ ବିକଳରେ ଉପର ମହଲାରୁ ତଳକୁ ଡେଇଁଥିଲେ ବୋଲି ପ୍ରତ୍ୟକ୍ଷଦର୍ଶୀ କହିଛନ୍ତି।
