ନୂଆଦିଲ୍ଲୀ,୧୧।୭: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରାୟତଃ ବିଦେଶ ଗସ୍ତରେ ରହିଥାନ୍ତି। ଏହି ସମୟରେ ମଧ୍ୟ ପିଏମ ତିନୋଟି ଦେଶର ଯାତ୍ରାରେ ଅଛନ୍ତି। ବର୍ତ୍ତମାନ ସେ ଏହି ଯାତ୍ରାର ଶେଷ ପର୍ଯ୍ୟାୟରେ ନ୍ୟୁଜିଲ୍ୟାଣ୍ଡରେ ପହଞ୍ଚିଛନ୍ତି। ନିଜର ବିଦେଶ ଗସ୍ତ ସମୟରେ ପିଏମ ମୋଦି ପ୍ରାୟତଃ ଅନେକ ଜିନିଷ ମଧ୍ୟ କିଣିଥାନ୍ତି, କିନ୍ତୁ ଆପଣ କେବେ ଭାବିଛନ୍ତି କି ପିଏମ ବିଦେଶରେ ପେମେଣ୍ଟ (ଟଙ୍କା ପୈଠ) କିପରି କରନ୍ତି? ଭାବି ନଥିବେ ନା? ତେବେ ଆସନ୍ତୁ ଆମେ ଆପଣଙ୍କୁ ଜଣାଉଛୁ।
ପିଏମ ମୋଦି ୨୦୧୮ ମସିହାରେ ଯେତେବେଳେ ସିଙ୍ଗାପୁର ଗସ୍ତରେ ଥିଲେ, ସେହି ସମୟରେ ସେ ସେଠାରୁ ଏକ ମଧୁବନୀ ପେଣ୍ଟିଂ କିଣିଥିଲେ। ଏହି ପେଣ୍ଟିଂ କିଣିବା ସମୟରେ ସେ RuPay(ରୁପେ) କାର୍ଡ ବ୍ୟବହାର କରିଥିଲେ। ସେହିପରି ଅଗଷ୍ଟ ୨୦୧୯ରେ ଭୁଟାନର ଏକ ଆଧିକାରିକ ଗସ୍ତ ସମୟରେ ମଧ୍ୟ ସେ ସ୍ଥାନୀୟ ଭୁଟାନୀ ହସ୍ତଶିଳ୍ପ ସାମଗ୍ରୀ କିଣିଥିଲେ ଏବଂ RuPay କାର୍ଡ ବ୍ୟବହାର କରିଥିଲେ।
ସେହିପରି ଫେବୃଆରୀ ୨୦୨୪ରେ ଆବୁଧାବି ଗସ୍ତ ସମୟରେ ପିଏମ ମୋଦୀ ଏବଂ ୟୁଏଇ (UAE)ର ରାଷ୍ଟ୍ରପତି ଶେଖ ମହମ୍ମଦ ବିନ ଜାୟଦ ଅଲ ନାହୟାନ ଭାରତର UPIକୁ ୟୁଏଇର ‘AANI’ ପେମେଣ୍ଟ ସିଷ୍ଟମ ସହିତ ଏବଂ ରୁପେ କାର୍ଡକୁ ସେଠାକାର ‘JAYWAN’ କାର୍ଡ ସହିତ ଯୋଡ଼ିବାର ଶୁଭାରମ୍ଭ କରିଥିଲେ। ଏହି ସମୟରେ ଉଭୟ ନେତା ପରସ୍ପରର କାର୍ଡ ସୱାଇପ କରି ଲାଇଭ ଟ୍ରାଞ୍ଜାକ୍ସନ (ପେମେଣ୍ଟ) ହେଉଥିବାର ମଧ୍ୟ ଦେଖିଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ବିଦେଶରେ ଏହିସବୁ ସାମଗ୍ରୀ କିଣିବା ଏବଂ ନିଜେ ପେମେଣ୍ଟ କରିବାର ଉଦ୍ଦେଶ୍ୟ ହେଉଛି ଭାରତୀୟ ପର୍ଯ୍ୟଟକ ଏବଂ ସମଗ୍ର ବିଶ୍ୱକୁ ଏହା ଦେଖାଇବା ଯେ ଭାରତର ଫିନଟେକ ବ୍ରାଣ୍ଡ ଯେପରିକି UPI ଏବଂ RuPay ଏବେ ଆନ୍ତର୍ଜାତୀୟ ସ୍ତରରେ ମଧ୍ୟ ସମ୍ପୂର୍ଣ୍ଣ ସୁରକ୍ଷିତ ଏବଂ ଗ୍ରହଣୀୟ। ଏଭଳି ପରିସ୍ଥିତିରେ ଭାରତୀୟ ଲୋକମାନେ ମଧ୍ୟ ବିଦେଶ ଗସ୍ତରେ ଗଲେ କରେନ୍ସି ଏକ୍ସଚେଞ୍ଜ (ଟଙ୍କା ଅଦଳବଦଳ) ନକରି ଏହି ପ୍ରଯୁକ୍ତିବିଦ୍ୟାର ବ୍ୟବହାର କରନ୍ତୁ।
ଭାରତୀୟ UPI ଏବଂ RuPay ଭାରତ ସମେତ ଫ୍ରାନ୍ସ, ସଂଯୁକ୍ତ ଆରବ ଏମିରେଟ୍ସ (UAE), ସିଙ୍ଗାପୁର, ଭୁଟାନ, ନେପାଳ, ଶ୍ରୀଲଙ୍କା, ମରିସସ, କତାର, ଓମାନ, ଦକ୍ଷିଣ କୋରିଆ ଭଳି ଦେଶରେ ଚାଲିଥାଏ। ଯଦିଓ ଫ୍ରାନ୍ସର କିଛି ଅଞ୍ଚଳରେ RuPay ଚାଲେ ନାହିଁ, କିନ୍ତୁ କିଛି ର୍ନିଦ୍ଦିଷ୍ଟ ଅଞ୍ଚଳରେ ଏହା କାମ କରିଥାଏ।
