କେପ୍ ଟାଉନ,୧୩।୧: ଏଠାରେ ଚାଲିଥିବା ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଚାଲିଥିବା ତୃତୀୟ ତଥା ନିର୍ଣ୍ଣାୟକ ଟେଷ୍ଟ ଅନ୍ତିମ ମୋଢ଼ରେ ପହଞ୍ଚିଛି। ମ୍ୟାଚ୍ରେ ଦୁଇ ଦିନ ବାକି ଥିବାରୁ ଫଳାଫଳ ବାହାରିବା ନିଶ୍ଚିତ। ଘରୋଇ ଦଳକୁ ଜିତିବା ପାଇଁ ୧୧୧ ରନ୍ ଦରକାର ଥିବାବେଳେ ହାତରେ ଅଛି ୮ ଉଇକେଟ। ଅନ୍ୟପକ୍ଷରେ ଭାରତ ପାଇଁ ଗୁରୁତ୍ୱପୂର୍ଣ୍ଣ ହେଲା ଡିନ ଏଲଗାର ଆଉଟ୍ ହୋଇସାରିଛନ୍ତି।
ତୃତୀୟ ଦିନ ଆରମ୍ଭରୁ ଭାରତ ଦୁଇ ଓଭରରେ ଚେତେଶ୍ୱର ପୂଜାରା (୯) ଓ ଅଜିଙ୍କ୍ୟ ରାହାନେ (୧)ଙ୍କ ଉଇକେଟ ହରାଇଥିଲା। ଫଳରେ ଭାରତୀୟ ଦଳ ୫୮ ରନ୍ ମଧ୍ୟରେ ୪ ଉଇକେଟ ହରାଇ ସଙ୍କଟରେ ପଡ଼ିଥିଲା ଟିମ୍ ଇଣ୍ଡିଆ। ପରିସ୍ଥିତି ବିପଦଜନକ ଥିଲା ହେଲେ ଅଧିନାୟକ ବିରାଟ କୋହଲି (୨୯) ଓ ରିଷଭ ପନ୍ତ (୧୦୦*) ୫ ଉଇକେଟ ପାଇଁ ୯୪ ରନ୍ ଯୋଡ଼ିଥିଲେ। ଅଧିନାୟକ କ୍ରିଜରେ ଜମି ସାରିଥିବା କୋହଲିଙ୍କ ଉଇକେଟ ନେଇଥିଲା ପୁରୁଣା ଭୁଲ। ସେ ପ୍ୟାଭିଲିଅନ ଫେରିବା ପରେ ଏକାକୀ ପନ୍ତ ଦଳୀୟ ସ୍କୋରକୁ ୧୯୮ ପର୍ଯ୍ୟନ୍ତ ନେଇଥିଲେ। ଫଳରେ ଘରୋଇ ଦଳ ଆଗରେ ଛିଡ଼ା ହୋଇଥିବା ୨୧୨ ରନ୍ର ବିଜୟ ଲକ୍ଷ୍ୟ। ଜବାବରେ ଘରୋଇ ଦଳ ଆରମ୍ଭରୁ ଏଡେନ ମାର୍କମଙ୍କ ଉଇକେଟ ହରାଇଥିଲା। କିନ୍ତୁ ତା’ ପରେ ଡିନ ଏଲଗାର (୩୦) ଏବଂ କିଗାନ ପିଟରସନ (୪୮) ଦ୍ୱିତୀୟ ଉଇକେଟ ପାଇଁ ୭୮ ରନ୍ ଯୋଡ଼ିଥିଲେ। ଭାରତୀୟ ବୋଲରଙ୍କ ଖୁବ୍ ପରିଶ୍ରମ ପରେ ମିଳିଥିଲା ଏଲଗାରଙ୍କ ଉଇକେଟ। ଫଳରେ ଦକ୍ଷିଣ ଆଫ୍ରିକା ତୃତୀୟ ଦିନ ଶେଷ ସୁଦ୍ଧା ୨ ଉଇକେଟ ହରାଇ ୧୦୧ ରନ୍ କରିଛି।
