ନୂଆଦିଲ୍ଲୀ,୨୪।୨: କ୍ରିକେଟର ଭଗବାନ କୁହାଯାଉଥିବା ସଚିନ ତେନ୍ଦୁଲକରଙ୍କ ପାଇଁ ଫେବୃଆରୀ ୨୪ ଏକ ଅତ୍ୟନ୍ତ ସ୍ବତନ୍ତ୍ର ଦିନ। ଏହି ଦିନ ସେ ଦିନିକିଆରେ ଦ୍ୱିଶତକ ହାସଲ କରିଥିବା ପ୍ରଥମ ବ୍ୟକ୍ତି ହୋଇଥିଲେ। ଆଜି, ଅର୍ଥାତ୍ ୨୪ ଫେବୃଆରୀ ୨୦୨୫ରେ, ସେହି ଐତିହାସିକ ମୁହୂର୍ତ୍ତକୁ ୧୫ ବର୍ଷ ବିତିଗଲାଣି। ଦକ୍ଷିଣ ଆଫ୍ରିକା ଦଳ ବିପକ୍ଷରେ ସଚିନ ତେନ୍ଦୁଲକର ଏହି କୃତିତ୍ୱ ହାସଲ କରିଥିଲେ। ସେ ବର୍ତ୍ତମାନ ଅନ୍ତର୍ଜାତୀୟ ମାଷ୍ଟର୍ସ ଲିଗରେ ଇଣ୍ଡିଆ ମାଷ୍ଟର୍ସ ଦଳର ଅଧିନାୟକ ଅଛନ୍ତି। ଏହି ଲିଗ ସମୟରେ, ସଚିନଙ୍କୁ ସାଥୀ ଖେଳାଳିମାନେ ତାଙ୍କୁ ଏକ ବଡ଼ ସରପ୍ରାଇଜ୍ ଦେଇଥିଲେ।
କ୍ରିକେଟ କିମ୍ବଦନ୍ତୀମାନେ ଅନ୍ତର୍ଜାତୀୟ ମାଷ୍ଟର୍ସ ଲିଗରେ ଖେଳୁଛନ୍ତି, ଯେଉଁଥିରେ ସଚିନ ତେନ୍ଦୁଲକରଙ୍କ ନାମ ମଧ୍ୟ ସାମିଲ ଅଛି। ସଚିନ ସୋସିଆଲ ମିଡିଆରେ ଏକ ଭିଡିଓ ଶେୟାର କରିଛନ୍ତି, ଯେଉଁଥିରେ ସେ ତାଙ୍କର ଦ୍ୱିଶତକର ୧୫ ବର୍ଷ ପୂରଣର ଉତ୍ସବ ପାଳନ କରିଛନ୍ତି। ଭିଡିଓରେ ଦେଖାଯାଉଛି, ସଚିନ ଅଭ୍ୟାସରୁ ଡ୍ରେସିଂ ରୁମକୁ ଫେରୁଥିଲେ, ଏଠାରେ ଯୁବରାଜ ସିଂହଙ୍କ ସମେତ ଅନ୍ୟ ସମସ୍ତ ଖେଳାଳି କେକ ଧରି ତାଙ୍କ ପାଇଁ ଅପେକ୍ଷା କରିଥିଲେ। ଏହା ପରେ ସଚିନ କେକ କାଟି ସମସ୍ତ ଖେଳାଳିଙ୍କୁ ଧନ୍ୟବାଦ ଜଣାଇଥିଲେ। ଭିଡିଓଟି ଶେୟାର କରି ସେ ଲେଖିଛନ୍ତି, ପ୍ରଚୁର ପ୍ରେମରେ ପରିପୂର୍ଣ୍ଣ ଏକ ସୁନ୍ଦର ସରପ୍ରାଇଜ୍! ଧନ୍ୟବାଦ ଟିମ୍।
୨୦୧୦ରେ ଦକ୍ଷିଣ ଆଫ୍ରିକା ଦଳ ଭାରତ ଗସ୍ତରେ ଆସିଥିଲା। ଏହି ସମୟ ମଧ୍ୟରେ, ଦୁଇ ଦଳ ମଧ୍ୟରେ ତିନି ମ୍ୟାଚ ବିଶିଷ୍ଟ ଏକଦିବସୀୟ ସିରିଜ ଖେଳାଯାଇଥିଲା। ସିରିଜର ଦ୍ୱିତୀୟ ମ୍ୟାଚ ୨୪ ଫେବୃଆରୀରେ ଗ୍ବାଲିୟରର କ୍ୟାପ୍ଟେନ ରୂପ ସିଂହ ଷ୍ଟାଡିୟମରେ ଖେଳାଯାଇଥିଲା। ସେହି ମ୍ୟାଚ୍ରେ ସଚିନ ତେନ୍ଦୁଲକର ୧୪୭ଟି ବଲ୍ର ସମ୍ମୁଖୀନ ହୋଇ ଅପରାଜିତ ୨୦୦ ରନ କରିଥିଲେ, ଯେଉଁଥିରେ ୨୫ଟି ଚୌକା ଏବଂ ୩ଟି ଛକା ସାମିଲ ଥିଲା। ଏହା ସହିତ, ସେ ଦିନିକିଆରେ ଦ୍ୱିଶତକ ହାସଲ କରିବାରେ ବିଶ୍ୱର ପ୍ରଥମ ବ୍ୟକ୍ତି ହୋଇଥିଲେ।
Nice surprise filled with dher sara pyaar! ❤️
Thank you Team. pic.twitter.com/ovwQXfXVNX
— Sachin Tendulkar (@sachin_rt) February 24, 2025
