ଢେଙ୍କାନାଳ ଅଫିସ, ୧୬।୫: ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟ ସଭାଗୃହରେ ମଙ୍ଗଳବାର ଜିଲାସ୍ତରୀୟ ଜାତୀୟ ଡେଙ୍ଗୁ ଦିବସ ପାଳିତ ହୋଇଯାଇଛି। ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ) ଡା. ଅଶୋକ କୁମାର ଦାଶ ଏଥିରେ ଅଧ୍ୟକ୍ଷତା କରି କହିଲେ, ଜିଲାରେ ଡେଙ୍ଗୁ ପ୍ରକୋପ କମିଛି। ଜିଲାରେ ୨୦୧୩ରେ ସର୍ବାଧିକ ୪୧୬ ଡେଙ୍ଗୁ ରୋଗୀ ଚିହ୍ନଟ ହୋଇଥିଲେ। ୨୦୧୪ରେ ୨୭୪, ୨୦୧୫ରେ ୪୪, ୨୦୧୬ରେ ୧୧୭, ୨୦୧୭ରେ ୫୧, ୨୦୧୮ରେ ୬୧, ୨୦୧୯ରେ ୯୬, ୨୦୨୦ରେ ୫, ୨୦୨୧ରେ ୫୧, ୨୦୨୨ରେ ୭୯ ଏବଂ ୨୦୨୩ ମେ’ ଦ୍ୱିତୀୟ ସପ୍ତାହ ସୁଦ୍ଧା ମାତ୍ର ଜଣେ ରୋଗୀ ଚିହ୍ନଟ ହୋଇଛନ୍ତି। ୨୦୧୩ରୁ ଅଦ୍ୟାବଧି ଡେଙ୍ଗୁରେ କାହାରି ଜୀବନ ଯାଇ ନ ଥିବା ସିଡିଏମ୍ଓ ସୂଚନା ଦେଇଛନ୍ତି। ସମସ୍ତେ ମିଳିମିଶି କାର୍ଯ୍ୟକଲେ ଜିଲା ଡେଙ୍ଗୁ ମୁକ୍ତ ହୋଇପାରିବ। ପରିବେଶକୁ ପରିଷ୍କାର ରଖିବା, ଆଶା, ଅଙ୍ଗନଓ୍ବାଡି, ସ୍ବାସ୍ଥ୍ୟକର୍ମୀଙ୍କ ସହାୟତାରେ ଜନ ସଚେତନତା କାର୍ଯ୍ୟକ୍ରମ ଜାରି ରଖିବା, ରୋଗ ଚିହ୍ନଟ, ତୁରନ୍ତ ଚିକିତ୍ସା ସେବା ଯୋଗାଇଦେବା ଲାଗି ସିଡିଏମ୍ଓ ପରାମର୍ଶ ଦେଇଛନ୍ତି।
ଜିଲା ଭେକ୍ଟରବାହିତ ରୋଗ ପରାମର୍ଶଦାତା ତପନ କୁମାର ସାହୁ ଆଲୋଚନାରେ ଭାଗନେଇ କହିଲେ, ଡେଙ୍ଗୁରେ ଆକ୍ରାନ୍ତ ରୋଗୀଙ୍କୁ ଭୀଷଣ ଜ୍ୱର, ଗଣ୍ଠି ବିନ୍ଧା, ବାନ୍ତି, ମୁଣ୍ଡବ୍ୟଥା ହୋଇଥାଏ। ଶରୀରରେ ଲାଲ୍ ଦାଗ ପଡ଼ିଯାଏ। ଏଭଳି ଲକ୍ଷଣ ଦେଖାଦେଲେ ତୁରନ୍ତ ମେଡିକାଲରେ ପରାମର୍ଶ କରିବା ଜରୁରୀ। ଡେଙ୍ଗୁ ରୋଗ ପାଇଁ କୌଣସି ପ୍ରତିଷେଧକ ଟିକା କିମ୍ବା ଔଷଧ ନାହିଁ। ଲକ୍ଷଣକୁ ଦେଖି ରୋଗର ଚିକିତ୍ସା କରାଯାଇଥାଏ। ଜିଲା ଚିକିତ୍ସାଳୟର ଦ୍ୱିତୀୟ ମହଲା ୯୩ନଂ. କୋଠରିରେ ନିଃଶୁଳ୍କ ଡେଙ୍ଗୁ ପରୀକ୍ଷା କରାଯାଉଛି ବୋଲି ସୂଚନା ଦିଆଯାଇଥିଲା।
ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଜ୍ୟୋତିଷ ଚନ୍ଦ୍ର ମହାପାତ୍ର କହିଲେ, ପାଣି ଜମି ରହୁଥିବା ସ୍ଥାନରେ ଏଡିସ୍ ମଶା ଲାର୍ଭା ଦେଇଥାଏ। ତେଣୁ ୨-୩ ଦିନ ଅନ୍ତରରେ ପାଣିପାତ୍ର, ଟାଙ୍କି, କୁଲର ପାଣି ବଦଳାଇବା ଜରୁରୀ। ନିୟମିତ ମଶାରି ବ୍ୟବହାର ଦ୍ୱାରା ମାରାତ୍ମକ ଡେଙ୍ଗୁରୁ ଅନେକାଂଶରେ ସୁରକ୍ଷା ମିଳିପାରିବ ବୋଲି ସେ କହିଥିଲେ। ଜିଲା ଯକ୍ଷ୍ମା ନିୟନ୍ତ୍ରଣ ଅଧିକାରୀ ଡା. ଗୁରୁପ୍ରସାଦ ଜେନା, ଜିଲା ଭେକ୍ଟରବାହିତ ରୋଗ ଅଧିକାରୀ ଡା. ହିମାଂଶୁ ଶେଖର ହେମ୍ବ୍ରମ ଡେଙ୍ଗୁର ପ୍ରତିକାର ଉପରେ ଗୁରୁତ୍ୱାରୋପ କରିଥିଲେ। ବୈଠକରେ ଏଡିଏମ୍ଓ (ମେଡିକାଲ) ଡା. ଜୟକୃଷ୍ଣ ନାୟକ, ସ୍ବାସ୍ଥ୍ୟ ମିଶନ ପରିଚାଳିକା ସୋନାଲି ପ୍ରିୟଦର୍ଶିନୀ, ଜିଲା କୋଷାଧ୍ୟକ୍ଷ ଗଗନ ବିହାରୀ ସାହୁ, ମହାମାରୀ ବିଶେଷଜ୍ଞ ଡା. କଲ୍ଲୋଳ ଦାସ ପ୍ରମୁଖ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ଏହି ଅବସରରେ ଏକ ପୁସ୍ତିକା ଉନ୍ମୋଚନ କରାଯାଇଥିଲା।
