ବରଗଡ଼,୨୯।୬(ପ୍ରେମାନନ୍ଦ ଖମାରୀ)ବରଗଡ଼ ଜିଲାରେ ୩ଲକ୍ଷ ୪୮ହଜାର ୭୪୭ହେକ୍ଟର କୃଷି ଉପଯୋଗୀ ଜମି ରହିଥିବାବେଳେ ସେଥିମଧ୍ୟରୁ ୨ଲକ୍ଷ ୫୨ହଜାର ୬୫୬ହେକ୍ଟର ଜମିରେ ଧାନଚାଷ ହୋଇଥାଏ। ସେହିପରି ଅନ୍ୟ ଚାଷ ତୁଳନାରେ ଧାନ ଫସଲ ପାଇଁ ଅଧିକ ସାର, କୀଟନାଶକ ଆବଶ୍ୟକତା ରହିଛି। ଏହି ଦୃଷ୍ଟିରୁ ରାଜ୍ୟର ଅନ୍ୟ ଜିଲା ଅପେକ୍ଷା ବରଗଡ଼ ଜିଲାରେ ସାର, କୀଟନାଶକର ସର୍ବାଧିକ ବିକ୍ରିବଟା ହୋଇଥାଏ। କିନ୍ତୁ ବିଭାଗୀୟ ଅପାରଗତା ଯୋଗୁ ଜିଲାରେ ସାର, କୀଟନାଶକର ନକଲି କାରବାର ଜୋର୍ ଧରିଛି। ଅନ୍ୟପଟେ ଏହାର ଦର ଆକାଶଛୁଆଁ ହୋଇଛି। ଖରିଫ ଚାଷ ଆରମ୍ଭରୁ ବରଗଡ଼ ଜିଲାରେ ଏଭଳି ସ୍ଥିତି ଉପୁଜିବା ଚାଷୀଙ୍କ ପାଇଁ ଚିନ୍ତାଜନକ ହୋଇପଡ଼ିଛି। ଗତ ମାର୍ଚ୍ଚ ଶେଷ ସପ୍ତାହରେ ଜିଲାର ଜାମମାଳ ଗ୍ରାମରେ ନକଲି ପଟାସ ସାର ପ୍ରସ୍ତୁତ ହେଉଥିବା ପୋଲିସ ହାତରେ ଧରାପଡ଼ି ଥିବାବେଳେ ମଙ୍ଗଳବାର ବରପାଲି ଥାନା ତୁଲଣ୍ଡି ଗ୍ରାମର ଏକ ଗୋଦାମରୁ ୯୦ପକେଟ୍ ପଟାସ୍ ସାର, ଲୁଣ ବସ୍ତା, ରଙ୍ଗ ସମେତ ସେଠାରୁ ଖାଲି ପକେଟ୍ ମଧ୍ୟ କୃଷି ବିଭାଗ ଜବତ କରିଛି। ତେବେ ତାହା ମଧ୍ୟ ନକଲି ବୋଲି ସନ୍ଦେହ ଦୃଢ଼ୀଭୂତ ହୋଇଛି। କେବଳ ଉକ୍ତ ୨ଟି ସ୍ଥାନ ନୁହେଁ, ଜିଲାର ଅନେକ ସ୍ଥାନରେ ଏଭଳି ଚାଲିଥିବା ଆଲୋଚନା ହେଉଛି। ଆରମ୍ଭରୁ ଯଦି କୃଷି ବିଭାଗ ତାହା ରୋକିବାକୁ ତତ୍ପର ନ ହୁଏ, ଆଗାମୀ ଦିନରେ ଜିଲାର ଅନେକ ଚାଷୀ ସେଭଳି ମୁନାଫାଖୋର ବ୍ୟବସାୟୀଙ୍କ ଦ୍ୱାରା ଶୋଷିତ ହେବା ଆଶଙ୍କା ରହିଛି।
