ମହାକାଳପଡ଼ା, ୩୦ା୮(ଡି.ଏନ.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକରେ ମୋଟ ଚାଷ ଜମି ୨୮,୫୦୦ ହେକ୍ଟରରୁ ଅଧିକ। ସେଥିମଧ୍ୟରୁ ୨୪ ହଜାର ହେକ୍ଟରରୁ ଅଧିକ ଜମିରେ ଖରିଫ ଧାନ ଫସଲ ହେଉଛି। ଏହି ଅଞ୍ଚଳରେ ୭ ହଜାରରୁ ଅଧିକ ଜଳସେଚନ ଜମି ରହିଛି। ଭାଦ୍ରବ ମାସ ଅଧା ହେଲାଣି ଚାଷ ଜମିରେ ଅଧିକାଂଶ ସ୍ଥାନରେ ବନ୍ୟାଜଳ ପ୍ରବେଶ ଯୋଗୁ ଖରିଫ୍ ଫସଲ ଉତ୍ପାଦନ ହ୍ରାସ ପାଇବା ଆଶଙ୍କା ଦେଖାଦେଇଛି। ଜମିରେ ଭଲ ଅମଳ ପାଇଁ ସାର ଦରକାର ପଡୁଛି। କିନ୍ତୁ ଆବଶ୍ୟକ ପରିମାଣରେ ସାର ମିଳୁ ନ ଥିବାରୁ ଚାଷୀମାନେ ଚଢା ଦରର ଖୁଚୁରା ବ୍ୟବସାୟୀଙ୍କଠାରୁ କିଣିବାକୁ ବାଧ୍ୟ ହେଉଛନ୍ତି। ବ୍ଲକରେ ସରକାରୀ ଭାବେ ୨୪ଟି ସମବାୟ ସମିତିରୁ କେତେକ ସମିତି ପକ୍ଷରୁ କୃଷକମାନଙ୍କୁ ରିହାତି ଦରରେ ସାର ବିକ୍ରି କରାଯାଉଛି। ଶତାଧିକ ଚାଷୀ ସରକାରୀ ଦରରେ ସାର କିଣିବାରୁ ବଞ୍ଚତ୍ତ ହେଉଛନ୍ତି। ଅପରପକ୍ଷରେ ବ୍ଲକରେ ୩୦ରୁ ଊର୍ଦ୍ଧ୍ୱ ବ୍ୟବସାୟୀଙ୍କୁ ସରକାରୀ ଭାବେ ଲାଇସେନ୍ସ ପାଇ ସାର ବିକ୍ରି କରିବାକୁ ଅନୁମତି ମିଳିଛି। କିନ୍ତୁ ସାର ଯୋଗାଣରେ ବ୍ୟାଘାତ ସୃଷ୍ଟି ହେଉଛି। ଚାଷୀଙ୍କ ଆବଶ୍ୟକ ଅନୁସାରେ ସାର ମିଳୁନାହିଁ ବୋଲି ଅଭିଯୋଗ ହେଉଛି।
ମହାକାଳପଡ଼ା ବ୍ଲକ ଚାଷୀଙ୍କୁ ସାର ମିଳୁନାହିଁ। ଫଳରେ ଅଞ୍ଚଳର ଚାଷୀମାନେ ବାଧ୍ୟ ହୋଇ ଚଢ଼ା ଦରରେ ସାର କମ୍ପାନୀ ସର୍ବାଧିକ ଧାର୍ଯ୍ୟ ମୂଲ୍ୟଠାରୁ ଅଧିକ ଦରରେ କିଣୁଛନ୍ତି। ୟୁରିଆ, ଗ୍ରୋମୋର, ଡିଏପି ଓ ଅନ୍ୟ ସାର ବସ୍ତା ପ୍ରତି ୨ରୁ ୩ ଶହ ଟଙ୍କା ଅଧିକରେ ବିକ୍ରି ହେଉଥିବା ସ୍ଥାନୀୟ ଅଞ୍ଚଳର ଚାଷୀ ବାବାଜୀ ବେହେରା, ସଦାଶିବ ରାଉତ, ହରି ଗୋଛାୟତ, କୈଳାସ ରାଉତ, ବାବାଜୀ ଜେନା, ଅଭୟ ନାୟକଙ୍କ ସମେତ ପ୍ରାକ୍ତନ ସରପଞ୍ଚ ନାଥ କୁମାର ଭୋଳ ଅଭିଯୋଗ କରିଛନ୍ତି। ବ୍ଲକ ବିଭିନ୍ନ ସ୍ଥାନର ଖୁଚୁରା ବ୍ୟବସାୟୀମାନେ ଚଢ଼ା ଦରରେ ଚାଷୀମାନଙ୍କୁ ସାର ବିକ୍ରି କରୁଛନ୍ତି। ସେମାନଙ୍କୁ ପଚାରିଲେ ଉପରୁ ସାରା ଯୋଗାଣ କମ୍ ଆସୁଛି। ଆମେ ବାଧ୍ୟହୋଇ ଚଢ଼ା ଦରରେ ସାର ବିକ୍ରି କରିବାକୁ ପଡୁଛି ବୋଲି ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି। ଏ ସମ୍ପର୍କରେ ମାର୍ଶାଘାଇସ୍ଥିତ ଜିଲା କୃଷି ଅଧିକାରୀ ସଞ୍ଜୀବ କୁମାର ମୁଦୁଲିଙ୍କୁ ପଚାରିବାରେ କଳାବଜାରକାରୀ ସାର ବ୍ୟବସାୟୀଙ୍କ ଉପରେ ବିଭାଗ ସତର୍କ ଦୃଷ୍ଟି ରଖିଛି। ବିଭାଗ ପକ୍ଷରୁ ସ୍ବତନ୍ତ୍ର ଟିମ୍ ଗଠନ କରାଯାଇ ଚଢାଉ କରାଯିବ। ଖୁବ୍ଶୀଘ୍ର ଚାଷୀଙ୍କ ସମସ୍ୟା ଦୂର ହେବ ବୋଲି ସେ କହିଛନ୍ତି।
