ବରୀ,୨୪।୭(ଡି.ଏନ.ଏ.): ରାସ୍ତା ଅବରୋଧ ଯୋଗୁ ବରୀ ବ୍ଲକ୍ ଅଧୀନ ଅରଙ୍ଗାବାଦ ପଞ୍ଚାୟତ ୭ନଂ. ଓ୍ବାର୍ଡର ୧୦ରୁ ଊର୍ଦ୍ଧ୍ୱ ପରିବାର ଯାତାୟାତ ନିମନ୍ତେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ୧୦ବର୍ଷ ପୂର୍ବରୁ ଏହି ଗ୍ରାମର ଜମିଦାର ଉକ୍ତ ଓ୍ବାର୍ଡର ରାସ୍ତା ଅବରୋଧର ଶିକାର ହୋଇଥିବା ପରିବାର ସଦସ୍ୟଙ୍କୁ ନିଜ ବାସଗୃହ ସହ ଯାତାୟାତ ନିମନ୍ତେ ଜମି ଯୋଗାଇ ଦେଇଥିଲେ। ମାତ୍ର ଗତ ପଞ୍ଚାୟତ ନିର୍ବାଚନ ସମୟରେ ରାଜନୈତିକ ତିକ୍ତତା ଯୋଗୁ ସମ୍ପୃକ୍ତ ଓ୍ବାର୍ଡର ଜଣେ ବ୍ୟକ୍ତି ରାସ୍ତା ଉପରେ ବାଡ଼ ବୁଜି ଦେଇଛନ୍ତି। ଫଳରେ ରାସ୍ତା ଉପରେ ନିର୍ଭର କରୁଥିବା ପରିବାର ସଦସ୍ୟମାନେ ବିଲରେ ପଶି ଯାତାୟାତ କରୁଛନ୍ତି। ଏତଦ୍ବ୍ୟତୀତ ବିଭିନ୍ନ ବିଦ୍ୟାଳୟରେ ଅଧ୍ୟୟନରତ ଛାତ୍ରୀଛାତ୍ରୀ ପାଣି କାଦୁଅରେ ପଶି ଯିବା ଆସିବା କରୁଛନ୍ତି। ଫଳରେ ସେମାନେ ବିଭିନ୍ନ ସମୟରେ ଥଣ୍ଡା ଜ୍ୱରରେ ଆକ୍ରାନ୍ତ ହେଉଛନ୍ତି। ରୋଗୀମାନେ ନିକଟସ୍ଥ ସ୍ବାସ୍ଥ୍ୟକେନ୍ଦ୍ରକୁ ଯିବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଓ୍ବାର୍ଡର ବାନାମ୍ବର ମଲିକ, ଦେବେନ୍ଦ୍ର ମଲିକ, ଘନଶ୍ୟାମ ମଲିକଙ୍କ ସମେତ ଅନ୍ୟ ପରିବାର ଯାଜପୁର ଜିଲାପାଳ, ବରୀ ତହସିଲଦାର ଓ ବରୀ ମଣ୍ଡଳ ଉନ୍ନୟନ ଅଧିକାରୀଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ତେବେ ବରୀ ତହସିଲର ରାଜସ୍ବ ନିରୀକ୍ଷକ ତଦନ୍ତ କରି ଫେରି ଯାଇଥିଲେ ମଧ୍ୟ ରାସ୍ତାରୁ ବାଡ଼ ହଟାଇବା କ୍ଷେତ୍ରରେ କୌଣସି ପଦକ୍ଷେପ ନିଆଯାଇ ନ ଥିବା ଦେଖିବାକୁ ମିଳିଛି। ଆଗାମୀ ଦିନିରେ ଯାତାୟାତ ସମସ୍ୟା ସମାଧାନ ନ ହେଲେ ଲୋକେ ବରୀ ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବେ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ ତହସିଲ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳି ପାରିନାହିଁ।
