ବୈପାରୀଗୁଡା,୧୨ା୯(ଡି.ଏନ୍.ଏ.): କୋରାପୁଟ ଜିଲା ବୈପାରୀଗୁଡା ବ୍ଲକ ବାଲଗାଁ ପଞ୍ଚାୟତରେ ଜଣେ ମହିଳା ସ୍ବାସ୍ଥ୍ୟକର୍ମୀ ଓ ଅଙ୍ଗନୱାଡି କର୍ମୀ ଲୋକଙ୍କୁ ସେବା ଯୋଗାଇ ଦେବାପାଇଁ ନିଜ ଜୀବନକୁ ବାଜି ଲଗାଇ ଦେଇଛନ୍ତି। ଚାଲିଥିବା ଟିକାକରଣ କାର୍ଯ୍ୟକ୍ରମରେ ଲୋକଙ୍କୁ ଟିକାଦେବାକୁ ଉଭୟ ପାଣି ଭର୍ତ୍ତି ଖରସ୍ରୋତା ନାଳ ପାରି ହୋଇ ଲୋକଙ୍କୁ ଟିକା ଦେଇ ନିଜ କାର୍ଯ୍ୟଦକ୍ଷତାର ପରିଚୟ ଦେଇଛନ୍ତି।
ଖବରରୁ ଜଣାପଡିଛି, ଶୁକ୍ରବାର ମୁଣ୍ଡାଗୁଡ଼ା ଗ୍ରାମବାସୀଙ୍କୁ କରୋନା ଟିକାଦେବାକୁ ସ୍ଥିର ହୋଇଥିଲା। ତେବେ ବର୍ଷା ଯୋଗୁ ଗ୍ରାମବାସୀ ଟିକାଦାନ କେନ୍ଦ୍ରକୁ ନାଳ ପାରି ହୋଇ ଆସିପାରି ନ ଥିଲେ। ମୁଣ୍ଡାଗୁଡ଼ା ଗ୍ରାମକୁ ଯିବା ରାସ୍ତାରେ ଏହି ନାଳ ପଡ଼ିଥାଏ। ଖରାଦିନେ ଉକ୍ତ ନାଳରେ ପାରିହୋଇ ଯିବା କୌଣସି ସମସ୍ୟା ନ ଥାଏ ା ମାତ୍ର ବର୍ଷା ଦିନେ ନାଳରେ ପାଣି ଉଛୁଳି ଥାଏ । ଶୁକ୍ରବାର ମୁଣ୍ଡାଗୁଡ଼ାବାସୀଙ୍କୁ କରୋନା ଟିକା ଦେବାକୁ ସ୍ଥିର ହୋଇଥିଲେ ମଧ୍ୟ ନାଳରେ ପାଣି ଅଧିକ ଆସିବାରୁ ନାଳ ଆରପଟ ଥିବା ଗ୍ରାମବାସୀ ଟିକା ନେବାକୁ ଟିକାଦାନ କେନ୍ଦ୍ରକୁ ଆସିପାରି ନ ଥିଲେ। ଏ ପରିସ୍ଥିତିରେ ଲୋକଙ୍କୁ ସେବା ଯୋଗାଇ ଦେବାପାଇଁ ମହିଳା ସ୍ବାସ୍ଥ୍ୟକର୍ମୀ ସୁଧାମଣି ମାର୍ଣ୍ଡି ଓ ଅଙ୍ଗନୱାଡି କର୍ମୀ ସୁଲୋଚନା ନାୟକ ଅଣ୍ଟା ଭିଡ଼ିଲେ। ନିଜ ଜୀବନକୁ ବାଜି ଲଗାଇ ଉଭୟ ନାଳ ପାରହୋଇ ଆରପଟେ ପହଞ୍ଚତ୍ ଗ୍ରାମବାସୀଙ୍କୁ ଟିକା ଦେଇଥିଲେ। ଉଭୟ କର୍ମଚାରୀଙ୍କ ଏପରି ସାହସିକତାକୁ ଅଞ୍ଚଳବାସୀ ପ୍ରଶଂସା କରିଛନ୍ତି।
